1
Iale vali voleo Diuia sisila vali lolu benitikosi ige vali kela IESU mohoho kea vo bevuai oigalile uevelu.
2
Igali kele usege lulu voleu hanunu ke lateu Otogole luluai loaleu ou uvu ketale luluai loige abo evilu.
3
Isege veneu vodale ke lateu kineabe kele igali galiai ui lotilu ige ea niai ke ivalu.
4
Aveve keu DILAVAu munana tuvula keu aboele ui agigei vuvune tigelu. Ige abo igaligalia koto ni voletele nona loui lotilu.
5
Vali kela DILAVA hoeaseavale Diu ata moeagaea Dielusalemae ulu. Kea Dielusalema ata olie solisito vatava vole atatea loalea e bouai DILAVA hoeaseavaeviva.
6
Iale kea lulu ke evisi viliviliai oo keveo loevelu loalea oo kela daiai tetehamalu kosealelu evige IESU disaiboloea kotoeabele igaligaliai nonai lotige.
7
Abo ke evisi tetehamai loui avoe lai dibage ata kea Galileia ataeala kea lailoi koto dibalu.
8
Iale oleveo kateilabo ai lailoi kotole nonava.
9
Lailoea oo igaligaliai vatava voleo loevelu, Batia, Media, Elami, Mesobotamia, Diudea, Kabodosia, Botasi Eisia vata kele lolu.
10
Isi Vilisia, Babilia, Egubito, Keliti, Alabia, Libia keu Sailini vavae vata kele loevelu. Isege lailovolea Loma oo kitae kele loevelu, lailo volea Diu ata leleve isege lailo vola Diuia ata olie solisito Diuia avale ke ava.
11
Lailoea vata ni volete kele lolu isito lai malaha kea koto evige lailoi koto lelevele DILAVAu avete kela abo ke louva lailoi nonale.
12
Kateai tetehamai vole lavigei avoe vadeualeluga abo aveve kateale ava.
13
Isi kateige volea koele hamai loui avoe baa kea eu toela ilabo ai ke ava.
14
Abo kateai louge Bitau abositolo voleali ke evilu ige Bitau kobelai baita lavigei avoe Diuia ata laea Dielusalemae uale ko evive da olale aveve ko galave loui laa lavigei.
15
La huhuige loo eu toela ilu isito keu koto leleve olie solilu ivave vala kou aike alaviva iale la huhuige au ata beule vavita eu toela isi be.
16
Isito beloveta Dioelau memila voleo kisai vole ale kela ese koea aike ke aeviva.
17
Dioelau kisaiale koto keu kosealu DILAVAu loui avoe dale vali vaovela di munanau tuvu hanavege aule dobai loi la bahata vuvune vavege lai eseale vadeu vao loiveve ke loui ata bahata haivei, lavigei isege lai atau dogave keale naoasege lai malaha kosive keale tababuai hau moeaga ivegei.
18
Ige munana tuvuteule dobai loi di hau avale ke agigei melitigei malaha keate keale bahata valevadeuia vao loiveve ke loui ata haivegei.
19
Ige dale vale vole Otogole hanavege valiunile guguasege bataule taoai isege ddia lavui.
20
Isege kaie vata koveo tao veneu dio kitaele ui keu kateisege iave keveo kosiveu vali kitaeule loi.
21
Aveve katealeu loige olea kosive ivi loui DILAVA laviale ke aule agigei.
22
Iselala ataea di koto evie IESU keu Nasaleta ole loige DILAVAu duluai au vuvune vavuge hau moeaga ai ivai teteivale moeaga agelu iale au vadeu ale ke la ivalela.
23
Isito la olale kavage voeleai isi kateai vai atau toela vavege abo vai idiu dole kavage voelealu isito memila vole DILAVAu au lulelele lai aveve ke ivai loui avoe abole kateai ialela la ke alu.
24
IESUu vateu tuvu vai voeleige DILAVAu isage kobelalu kosealelu voeleu vuvuneu vage au abatale uale keu avoele malomaloage eu kobelalu. `
25
Deividiu memila Samusi uvule IESU aveve koseale kisaiai avoe da ivage kosiveu vali bahata dati uva keu di vavale ualelu aveve isuteule daele loige da ba kele dobalivelu bele.
26
Ialelu di uvuu sisila kitaeta da DILAVA hoeaseavale kele koto louva. Da huhuige dale voeleai isito aule ba da isai.
27
Iale dale voeleige au di munana kalege tai odavae ulivelu bele. Isi ba au ata tuvute ke kalevege gulile ui kisialivelu bele.
28
Au ukolikoli kuva da haivui vali bahata dati uge da kelu sisila kitae alu.
29
Di kakoluvuia da olale lailoi vavivuia Deividi keu aveve louge luleleave. Keu mouke, memila voeleige abo vai abavulu iale vutave keu ave uva.
30
Deividi keu DILAVAu beloveta olisi luleleige DILAVAu au vadeu louale ke aule ai. Au Deividi laviai avoe dale ai ese kele vole vage kosive olisi ai telona kele ugulumai.
31
Ige Deividiu ke evisi DILAVAu vaoe avevete ke ivalu. KELISOu loi voeleige munana keu ba odavae tai ulivelu bele isi kalege au bae gulile ui sakavalivelu vele.
32
Koto kateai loualelu DILAVAu isage kobelage loo ivalu.
33
DILAVAu IESU letatavai vai a ada vaiteveo vaeavai au louale kelate au munana tuvute vavuge eu munanau tuvu loamege lo siauvele kotove louge la evilu.
34
Deividiu IESU ale kelate ai eue tie solilu isito ke memila loui avoe DILAVAu di kosivelu loui avoe di ada vaiteo uguluma.
35
Isege daa aa kavale, aa vai toelativale ke agigei ai genau valale otovege kosiabe oli.
36
Iselala ata bahataea koto ko evive la IESU vai i dole kavale kela DILAVAu isage kobelai kosive olisi ata dulugeveve kea Keliso olilu.
37
Bitau koto kateale louge abo ke evisi huhui vole tolove ae velu. Isi kateai Bita ta Abositolo voleta lavigei avoe loi kakoluvuia loeale vadeu aevei.
38
Ige Bitau lavigei avoe la bahata lai aveve toela ke kalevave isi IESU KELISOu ivile babatisiave ige DILAVAule lai aveve toela ke totoai o au munanau tuvu lamei.
39
DILAVAu olale au munana tuvu lamei lai ese vavei olea ogela uale keta vavei kea DILAVAu nona evialelu.
40
Bitau koto ke loui koto voleta lavigei avoe ave vata kole ataea aveveu toela age DILAVAule ibilaeabe vavei iale kelu kuiakavage DILAVAule laa agigei.
41
Kateai louge vali kele ata moeagaea koto ke evisi abo uvu vai avole vaeavai babatisoalu ata bahata tili taoseni kea babatisoai IESU abositoloeali IESU haukala alu.
42
Isi vali bahata aboili igalitoai abositoloea louale ke evisi meliai aboili guliguliai aleto isi DILAVA hoeaseavaeviva.
43
Abositolo ata kea ivai teteivale ke moeaga ai aveve nivole ke aevege ataea ke ivai tetehamai.
44
Ata olea abo uvu vai IESU vavuale kea igalitoai loi DILAVA hoeaseavai abo valevile aliai volea hauiabea ue soliale ke vavelu.
45
Isi abo vata abo hau voievei moni agisi hauiabe ue soliale ke vaveva.
46
Abole vali bahata dubu kitaeo tai igali toai guliguliagei isi oe tieveluaga igalitoai lovi isi sisilai vole dulugei.
47
Kea kateai DILAVA hoeaseavage ata volea ke ivai sisilaeabe ai kosiveu koto evige au ke agige abo IESU abositoloeali igalitoalu.