¹ Ilogo vali vole kosive kea Bolo vai Italie hanavalivelu kuva kaoai bouti vole vai Bolo ta dibulava voleta agigei amea kosi kitae Diuliasi vavuge eu lohomei tai keu amea gulubu vole Ogasita kea ata kitae. ² Ige lo bouti kele tievelu keu Adalamiti kea boutila loaleu olai Eisia vatae tai. Ige lo kele tige malaha vole Alistakasi keu loili tilu. Malaha keu memila Magidonia vata vole Tesolonia kalevai lolu. ³ Lo vali voleo loale Saidoni oe daiage amea kosive Diuliasiu bolo hoeaseavai laviage eu tialeu au kakoluvu ivege ea olave hau vole vavuevelu. ⁴ Ige lo oke kalevai tige hebulu kitaeu loige lo tiale ke kalei vatava vole Saibalasi iae hogoluvilu. ⁵ Keveo lotialea Silisia vatava keta leiviai tialea Babilia vata keta leiviai tiale Lisia vatae daialu isi tai ovole Maila kele otolovalu. ⁶ Isi kele usege amia kosi keu bouti kaoai tisege bouti voleu Alekisandia keveo lolu. Iale bouti keu Italie talivelu age kosi keu lo agigei ele tilu. ⁷ Ele tiale hebulu kitaeu loige lo saiale tiale oo vole Naidasie daialu isi lilikata tie solisito vovokavai vta vole Keliti leivia tiale vata vole Salomone ke leiviai Keliti vatau iae daiai tilu. ⁸ Keveo lotiale vatau vava ulala tilu davala ee keu vuloai kitaeage saiale tialea boutiu lavivale keu duavele lavilu vatava ke vavale oo vole Lasia keu ulu. ⁹ Ige lo kele otolovai vali ni moeagale uevelu lo olai tai isito davalau toela kitaeage Diuia abo toela totoivale vali keu vesulu. Ige Bolou koto vole loui ata ke haivelu. ¹⁰ Isi avoe daa laa lavigege evive lailole vali kosealele tiluaga boutile toelage hauiale ele tisege boutlile eu uvue tai ue solisege isoho lailoeale vovoi o ui. ¹¹ Bolou kateai lousege amea kosive keu kotove evie solisito bouti ke biageta bouti vatalavale kea koto evilu. ¹² Abo olai ke kalevai oo voleo tai kosealelu boutiu vagalale keveo laviale keu toelalu. Kateige abo olai talivelu Keliti vatae oo vole Vonisi keveo ui. Keu boutiu lavivale vatavau dua hebulu loito loi melie solivale vatava. ¹³ Ilogo vali voleo hebulu eseieveu lolivelu age abo loui avoe lai tai isi abo bouti anika butuhai leiavai vai boutie vaeavai vatau vava ulala tilu. ¹⁴ Tisege hanunu kitaeu lolu bouti vatalvale kea ivie loui avoe Elokadoni keu vatavae velevai boutile lolu. ¹⁵ Keu loi bouti uvui vaitige abo olai bouti lekoveai vai vatavae loi isito hanunu kitaelu loui vaitilu eu minae. ¹⁶ Lo kateaveloho loalea eu nile vata vole Kolada ke iaveo loevelu. Lo ke iae loive vanagi vai bouti iae kunabeale ke vaveai vai bouti uvue vaeavalive age keu isualu. ¹⁷ Ige eu loi bouti kitae ke kavai toelatiale ke lo olai kote vai bouti ke valae tai umuvalivelu age bouti vatalavale kea homasialu isi valai ula letolevage abo huhuai avoe oloivaga hanunu lo agigei tai Avelikae tiluaga vulele vatoge lo voviva. Kateiswge hanunu tota lo agigei eu niole tilu. ¹⁸ Iloho vali voleo eu kitaeage abo ivai hau vole ele katulu olage boutiu vokovokoalivelu. ¹⁹ Iloho vali voleo eu kateige abo tota hau vole davalala katulu. ²⁰ Hanunu kateai vali moeaga loivaga vau bukai logibugibuai uge lo valita didita iva solilu. Isi vole lavigei kosealu lai ba ulivelu bele. ²¹ Kea kateai vali moeaga lovi ie solivaga Bolou mineabele lavisi lavigei avoe evive da Keliti vatae lalai loui kosealu ti kalevave. Ige la di koto evie solige lai loaleluga isu kou velevalu. ²² Isito da koto vole louge evive meliave labeu ba voelealivelu bele lale bahata usege bouti ulaule toelai ue solisi. ²³ Da dibale keu kosealu daa DILAVA kitae ke hoeasavai atave olialelu au livu vavile au Anelu hanavage daeo lolu. ²⁴ Isi loui avoe Bolo momai vabualive ale ba Lomania gamani kitae Sisa keu vudile lavisi ai nona ke neni loui lavia. Ige DILAVAu ai guliguli ke evialelu aluvita tivale ketaeale udua ai. ²⁵ Anelu keu dalu loualela da ke loui la haivealelu loui meliave DILAVAu koto louale keule velevai. ²⁶ Velevage bouti koule tialeu vata voleo vusavusai toelai ue solisi. ²⁷ Bolou kateai lousege hanunu kitaeu bula abuti ke uvule loi bouti vai ee kitae Metetelia keveo tilu tiale vaviu minale bouti vatalavale kea huhuai avoe isoho lai aike vatau vavaega ko loiva. ²⁸ Kateai loui huhuai avoe isho vatau loi vuguvugualu bela egealu. Kateai vule bagumai vai ele ketevege egeveu tai uani hadele tueniti '120'. Ige abo tutehai ulogo vai ketevege nainiti '90'. ²⁹ Kateai vabuai loui avoe lai aike oloivaga vulele tiva. Isi kateai boutiu iae anika abutita abutita ele ele kavatulu avoe kateai usege vau alavai. ³⁰ Isi vabuai olale vanagi vai bouti kitae kalevai vatae taeveid isi seleavei avoe lo vanagi vaitai anika agisi bouti unile katuevei. ³¹ Kateai vanagi vai ketevesege Bolou amea kosiveta kaimaleabeta lavigei avoe koeale bouti kalevaitige laa ko neniale vesui. ³² Bolou kateai louge ame voo voleu vanagiu kote koisi letulige eu vanagi vai tilu. ³³ Ivaga vau alavalu asege Bolou lavigei avoe lovi ive lai valiu ni votini '14' keu uvule lovi ie solialelu. ³⁴ Iale da olale la lovi isi goadave la ba vovolivelu bele. Lailole vateu tuvu agilivelu bele isito lailole vatavae daiai. ³⁵ Kateai loui lavigeito lovi vai vudiabele lavisi hoeaseavaito bokoai ilu. ³⁶ Ige abo bahata ke ivai goadavai lovi ilu. ³⁷ Ata bahata bouti kele ualea tuhadeleti seveniti sigisi '276'. ³⁸ Ata kea bahata lovi ige uniabe, gogoeabeu hanialu. Ige abo tai boutiu uve laisi baiki agisi davalale katulu ige boutiu vokovokoalu. ³⁹ Ivaga vau alavage bouti naliavale o, dalaivala kea vata ivai ke diba solilu isito goneu dua ke ivai olale keveo bouti vaeavai tolovai ui. ⁴⁰ Isi kateai anika kote boisi ela abo bouti tali umuvale ke vaveai olale boutiu uniu goneo tai isi bouti unile valai ese letatavai olale hebulu bouti vai goneo tai. ⁴¹ Isito bouti keu tialeu vulele vatoge univeu vulele vatoi gigiai usege ee kitaeu delive ke kavage vusavusai lavulu. ⁴² Ige tuvali ataea olai dibila ata kavegabo vovoi kosealelu kea vatavae tiluaga abole iluvisi tai. ⁴³ Ige amea kosi ke Bolo huhuai olae solilu abo kavelivelu isi louge etoai eu niole tievelu anabae. ⁴⁴ Isege lo volea etoai ee letulisi tiesolialea bouti bokobokoale ivi agisi ele etoai tievelu lo kenenia maulia tilu.