¹ Lo bahata vatavae daiage toelabeu uesolilu ige vatava biagea lo lavigei avoe vatava ko ivila Melita aeleni. ² Isi kateai loili kakoluvualu isege veniu loige dabau loige abo lolai vene beige loele uevelu koevelu ige loi vavau udialu. ³ Ige Bolou abo vene umuvei otoveale vole vailoi venele vausege bosini uteu ke vae ualeu vitoi Bolo adale ualu. ⁴ Uaive adavele vikokeai usege vatava biagea ke ivai avoe ivave malaha kou isoho ata kavevale atau toela volela davalae voele soliale keu ibilavela uteu ke uale voeleai au toela ibilau. ⁵ Kateisege Bolou ada letatavage uteu dobai venele nalu isito Bolou vateu tuvue solilu. ⁶ Abo kateai loui avoe aule aike voeleai isi malihai uvaga eu voele solige tota huhuai avoe isoho lailoi dilavabela keu lolu. ⁷ Kateisege lo loalea vata ke biage Bubulisiau loi sisila ai lo agigei au oe otovege lo valini abutita igalitale ovele uevelu. ⁸ Kele uesege Bubuliasiu mamau hobeai debibiale keta nai uvaga Bolou tai avolu guliguliai au ada vai tatavele vaeavai hoeaseavage eu doadoai kobelai ulu. ⁹ Kateige vata kele hatitite moeagaea loige Bolou abolai guliguliage kenenia doadoaevelu. ¹⁰ Kateige abo hau moeaga loameale bata abutita igalitau vesuge lo bouti vole ivive kavoloe mohoho vaitalivelu age abo hau moeaga agisi boutile otovelu. ¹¹ Bouti keu memila Alekisandiale loaleu hanunu kitaeau loige au loaleu vata kele hanunu ke nikovai ulu. ¹² Lo bouti ke vai Silakusie tialea daiai vali ni abutita igalita uvule aboili uevelu. ¹³ Isi tota kele boti ke igali vai tialea legumu oe daiai vavita hebulu duau loi ia nainoe lo agigei tiale vali nii abuti uvue tialea Buteolie daiavelu. ¹⁴ Keveo daiai otolovai tai evievi ata kaogei tai aboili ue ea louge lo bula igali aboili ulu isito ba vatala Lomeo tievelu. ¹⁵ Isege evievi ataea Lomeo uale kea loi koto evisi loi unie lo beiavei loevealea Abiesie loele lolu. Isege vaoe loale kea tilio Tabenie loele lolu ige Bolou ke ievei sisilai DILAVA hoeaseavalu. ¹⁶ Lo aboili tiale Lomeo daiage Bolou olai auvu oo vole vai ele ui ige amea kosiveu au tuvali ata vole vage Bolo nikovai avoti ulu. ¹⁷ Ivaga valiu ni abutita igalitau vesuge Bolou Diuia kosi kitaeali nonalivelu age ea vole bevuai loevege Bolou lavigei avoe di kakoluvuia da Dielusalemae usege Diuia ataeau olai da vai Lomenia gamani vileo tai kotai da kavage da voeleai isito da lailoi ata dikaiave solilu isi lailoi vavivuia basu ta dikaiave solilu. ¹⁸ Ige Lomea kosiveu di aveve ke kaoai ivage toelabeu daele ue solige olale da hanavage oe tai. ¹⁹ Isito Diuia ataea meliai olae savalu ige data meliai kosive ke laviai kosealu da olai tai Lomenia gamani kitae Sisa ke ivai dii nonau gala loui laviai. Katealeluga da lolu isito da olae soliale kateale ai lailoi ata dikaiavei. ²⁰ Isito da olale laea bahata loige lai nonahamai kosealelu da olale seini kou dulugeveve ke naliai uvale kea ivilega abo da vai dibulae vaeavalu. ²¹ Kateai louge abo laviai avoe lo Diuia ataele kisai be va solisi loi kakoluvuia Diudea vatae uale kele ai avevebe toela evie solilu. ²² Iale lo olale ai deiada evisi lo kosealeave ula evilu vatau ata bahata kea laea evievi ata kelai kotou toela louva. ²³ Abo kateai louito avolu vali vaeavale keu loige Diuia ata moeagaea loige bolou oe igalitoai uge Bolou valile isi vavile aaea DILAVAu adau siaule uveve ke loui. IESU aveve keta loui haiveva isi Mouseseu bukale kisaiale isi belovetaea kisaiale kele IESU aveve ke neni loui haiveva olale abo IESU dibaevei. ²⁴ Kateai haivevaga ata volea evi ulasege volea abo uvuvai IESU vavulu. ²⁵ Abo kateai tilivelu asege Bolou koto vole igali loui lavigei avoe DILAVAu munanau tuvu louale keu lelevela keu au beloveta Aisaia laviage au lai vavivu ke lavigelu. ²⁶ Isi Aisaia laviai avoe talivelu ata ko lavigei kosealale koto ko evisi to ba baive valivelu bele isi kaoalohoto ba neniai dibalivelu bele. ²⁷ Kosealelu uiabe keu toloige golemate olievei ni kelote olievelu isito abole aveve kateale a solisi kuiakavai da lovage abole koto eviu dua ai neniai iva dua ai kele lulele dua aga dale hoeaseavei. ²⁸ Bolou bukau koto ke louito lavigei avoe da olale la dibave la koto evie solialelu DILAVAu ukolikoli koto vai Diu ata olie soliale ke vavege abole koto ke evisi. ²⁹ Kateai louge Diu ataea tuvuai ui volelai louva. ³⁰ Bolou lahani abutita ke uvule au ovale kele usege ataea avoe deiai loisege eu abolai sisilava. ³¹ Aule kateaito ataea DILAVAu adau vuvunele uveve ke loui lailoi kosive IESU KELISO keu deiadata loui haivegei Bolo keu vali bahata au uvu vai kosive vavuale kelu meliai koto louge ataea kotove ke kava soliva, o kelue soliva isito vai leleveti ulava.