¹ Vesitasiu kateai louge Agilibau Bolo laviai avoe lavisi aa vadeu ale ke louige Bolou lavisi au ada letatavai loui avoe kini Aguliba da nonau gala ko louge evi. ² Daa ai vudile lavisi Diu ataea daele vadeu louvale ke dale sisilata loui aa laviai. ³ Kosealelu da dibage au Diuia basu isi aveveabe a dibalu. Da olale a homasi kaleito da louale ko evi. ⁴ Daa eseueseta ui loale ke Diu ata koea dibalu isi da di vata lelevele ui kosi olisi bosiai loale Dielusalemae uale abo bahata dibalu. ⁵ Iale abo dibale ke louge duave ea dibage dau Balisese ata iale Balisese keale Diuia basuke lovai avoele meliai ke ava ige data aveveabe kele meliai ke data ava. ⁶ Iale da ave lavisi kotavale keu kosealu da huhuige DILAVAu memila loi vavivulai louale kela ke loaleu ave velevalu. ⁷ Iale koto ke igalila Diuia gala tuelo '12' kea ke kaoai vavita gututa DILAVA hoeaseavaeviva olale ke vai Diuia daa vai kotavale keu da basuiabe ke lehosive solisito IESU voeleai kobelale kela da loui daiage abo davai kotai oiva. ⁸ Iale IESU voeleai kobelale kelega la vadeulu malomaloai oiva. Bela la huhuige DILAVAu vovivale ata isagevale keu avoele malomaloalu. ⁹ Daa memila huhuai kosealu dale aveve toela moeaga ai Nasaleta ata IESU KELISO ke ivi vai toela tisi. ¹⁰ Isi kateai memila Dielusalemae ui aveve kateivale ai tai Diuia kosile vuvune agisi tai IESU ekalesia kavei toelatigei agigei dibulae otoveva. Kosealelu kosive kea olale evievi ata keneni kavegabo vovoatisi ige data katealelu olalu. ¹¹ Vali voleo lo dubu moeagae tivale IESU evievi ata ke kaogei kavei toelatisi agisi tai dibula geva. Lo ola solilu kea IESU lovai tai kotove loui ata voleta haivegei kelu olai kavege abo vovoatisi. ¹² Da kateai vali voleo olai tai Dubu kosile vuvune vaito Damasikasie tai ata kateale kavei toelatigei. ¹³ Isi kateai tiale keu kuvau tavae valini minale tisege ataga kitae valiu niu ataga ke leiviale keu kalui da bavuge di nita keloalu isi daluvita tiale ketale kalulu. ¹⁴ Ige lo bahata vatale dobaluvilu isege da igaliu Diuia kotole koto vole evige loui avoe Solo, Solo aa vadeuluga da dikaiaviva. Aa dii ata kavevale ke kaleva, oloiloho amigata kavai voeleiva. ¹⁵ Ige daa koto ke evisi kosealu kosive ole alau ige eu loui avoe aa daa kavavale IESU dala kou, aa kaviva. ¹⁶ Iale kobelai laviso ige da aeo loi olale au di haukala ata olisi dii haukala aso ige daa koto voleta loui aa haivuge ba keta loui ata lavige. ¹⁷ Isege dale Diu ata isi Diu ata olie soliale kele a duluai avai hanavage abo hauai te. ¹⁸ Ata keo hauai tiluaga niabe alavage abole vaviu avevete keta seteneu aveve ta haivege abo atagau aveveta ivai DILAVA lovai. Abole kateale ai abo evievi vai daele vaeavaluaga dale toelaeabe totoai ige abole Otogoe tai DILAVAu au ata agigeale keali ui. ¹⁹ Bolou kateai loui kini Aguliba lavialu tota loui avoe koto keu Otogole loige daa ke homasiava solisito evilu. ²⁰ Daa ke evisi memila tialeu Damasikasi ata haivei kalei tialeu Dielusalemae velevai ata haivelu. Isi Diu ata isi Diu ata olie soliale keta vata bahatale tai loui kosealu, lai aveve toela ke kalevai DILAVA lovai teve ige lai toela vesuiavage laea ekalesia dua olive. ²¹ Katealeluga daa valivoleo Diuia Dubu kitae keveo usege ea olai da kavage da voeleai. ²² Isito kateivalela DILAVAu da duluavaga daa ualelu kotove loui ata bahata haiveva vatau kosive isi ata bahata ke haiveva. Memila beloveta volea louge Mouseseu avota louale kelatela da ke loui ata haivei oiva. ²³ Abo loui avoe KELISOule voelealuaga aule tota kobelai ukolikoli koto loui Diu ata isi Diu ata olie soliale keta haivege abo luleleai iale kelatela data ke loui. ²⁴ Bolou koto kateale louge Vesitasiu isuta avolu loui avoe Bolo ale tilogoalu. Isoho aa lulele moeaga kaoivaga ai kineu toelalu. ²⁵ Ige Bolou avolu loui avoe kosive daa tilogo solilu isito koto lelevela da ke loulu. ²⁶ Kateai louito kini Aguliba laviai avoe daa huhuige aveve koea hogolaha solige aa vaveve bahata ko dibalu. Iale daa vabue solisito koto ko louva. ²⁷ Iale kini Agiliba ale Belovetaea louale ke evisi valu, maa daa ivage aa evisi valu. ²⁸ Kateai louge Agulibau laviai avoe Bolo, aa huhuige koto eseieve kele ale da vage da evievi ata olisi DILAVA lovai. ²⁹ Ige Bolou laviai avoe koto eseve, oto kitae keta duave isito daa DILAVA lavialu aa isi ata bahata kele uale kea daa late ai evievi ata olisi DILAVA lovai. Daa katealelu DILAVA laviato laa seinita dii ada umuvale kolate alivelu. ³⁰ Bolou kateai louge gamani kosive Vesitasiu kini Agulibau abo amakini Benisiti isi kaimalea beali otolovai vatae tievelu. ³¹ Kaie vatae tai vole lavigei avoe malaha kou avevebe toela asolilu. Lailole oleveo kateai kavage voeleai. ³² Ige kini Agulibau Vesitasi laviai avoe malaha keu Lomenia kosi kitae Sisa ivalivelu louesoliteto lai hanavage oe tilu.