¹ Ivaga vali nii abutita igalitau '3' vesusege kosivele Vesitasiu au oo Sesalia kalei Dielusalemae tilu. ² Tialeu keveo velevage Diuia Dubu kosive isi ou kosive volea avoe loalea Bolou avale deiadave o ionive loui lavialu. ³ Laviai avoe au ale Bolo hanavage Dielusalemae loi abo koto ke loui olale Bolou loisege abo kuvau tavae kavagau voeleai. ⁴ Abo kateai louge kosive keu lavigei avoe Bolou aike Sesiliae dibulale ulu iale da kuialai tiveve vuguvugualu. ⁵ Ialelu la olea vuvune agiale kea daluvuta talivelu Sesiliae Bolo vai avoe aveveve toela kaoave. ⁶ Vesitasiu koto kateale louge ue solige aboili bula vole ke uvule aboili uito vole ke uvule aboili Sesiliae tilu. Iale vavita tai au kotau lovole ugulumai louge abo Bolo vai loevelu. ⁷ Bolo vai loige Diuia ata kea Dielusalemae loale kea loi Bolo vai nonale vaeavai. Bolou asoliale keta louvaga kuva keu nenie solilu. ⁸ Kateige Bolo kotoeabe ke kavai loui avoe dau Diuia basu isi dubuiabe ke vai toelatie solilu isi Lomeni gamani kitae Sisa keta vai toelatie solilu. ⁹ Kateai louge Vesitasiu olale Diuia ola ai Bolo laviai avoe ale olage lai tai Dielusalemae kotai koto ko vai lilikatisi. ¹⁰ Ige Bolou avolu loui avoe da ba keveo talivelu bele Lomeni gamani kitae keu kotavale kole dale dii nona keneni baita louge au vesui da dibage dau Diuia ata kole avevebe toela a solilu ige at di aveve dibalu. ¹¹ Iale isoho da avevebe toela ai basu vusage aa daa kavage daa voeleale keta duave. Isito daa aveve toela a solisege. Aa baa davai ata ko vavelivelu bele da olale Lomeni gamani kosi kitae Sisa keu di aveve evisi. ¹² Katea louge Vesitasiu au kaimaleali voleali nonaito loi laviai avoe duave a olale Lomenia gamani kitae Sisa u ai koto evisi ialelu lole aa hanavage te. ¹³ Vali voleo kini Agulibau au amakini benisiti Sesaliae deiai Venitasie lolu. ¹⁴ Loalea vali ni volele avoluvita usege au Bolou deiadave vole loui Aguliba laviai avoe da Velisi lovo vage eu loui avoe dibulae ata volela da ke kalevage ulu. ¹⁵ Ige da vali voleo Dielusalemae tige Diuia Dubu kosi isi ou kosivea daele ata keu aveve vole daele kaoai olale da ke kavage voeleai. ¹⁶ Ige da ke haivei kosealu keu Lomenia gamania aveve olie solilu iale lale luta volea vudile lavisi aveveve kaoai ivala aito ba kavage voeleava. ¹⁷ Iale abo koveo kotalive loige da vavita solekata tialeu kotavale keveo ugulumai louge abo Bolo vai daeo loevelu. ¹⁸ Isi loige Diu ataea kobekavai aveveve toela louge da huhuai kosealu isoho abole toelave kitaebe loui isito abo kate solilu. ¹⁹ Isito abo guliguliale ke ula louva ige Bolou malaha vole IESU voeleale kele loui avoe keu kobelalu. ²⁰ Abo kateige da malomaloai huhuai kosealu dale oleveo kateai koto ko bai vai. isi Bolo laviai kosealu au lati Dielusalemae tai kotai koto ko bai evisi. ²¹ Ige Bolou katealivelu homasiai olale tige Lomenia gamaniu ba kotove evisi ige da hanavage dibulae tilu isege da avolu kuva agau ba tai. ²² Velisiu koto kateale louvaga Agulibau loui avoe data da olai kotove evisi ige Velisiu avoe duave, livu vavita loi kotove evi. ²³ Iale vavita Agulibau Benisiti Bolo ivalivelu loige ata moeagata loevelu. Olai ivei abo kotale ke amea kosive isi ou kosita laluvai loevelu, kateisege Vesitasiu louge abo Bolo vai loevelu. ²⁴ Ige Vesitasiu loui avoe kini Aguliba isi la bahata malaha ko ivave, keveo isi Dielusalemae Diu ataea da laviage dale maliha ko kavage voeleai. ²⁵ Kateige da ata ko aveveve kaoige toelabeu avoele ue solilu ige da kavaveve kuva keta ue solilu. Isito biageu isiviale Lomenia kosi kitae ke ivai ialelu dale hanavage aule tai. ²⁶ Isito dale hanavaluage koto vadeuta kisaiai hanavai Lomenia gamani haivui kateila age da vai lae lolu. Iale kini Aguliba daa olale au neniai ata ko koto evisi ba da haivuge da levaleva kisaiai haivui Lomea kosi ke. ²⁷ Kosealelu da dibula ata ke aveveve toela diba solisi levaleva kisai kavai hanavage keu daele toelalu, kelu toelave ivai louge da levaleva vole kisaiaito vai avota hanavai.