¹ Uevealea vali ni vaiu '5' vesusege Dubu kosi kitae Ananaiasiu Diuia kosi kitae voleali loi kotau luleleivale vole Tetulasi keta meialemei Velisi keu nile leleisi Bolo vai kotaevelu. ² Isi Tetulasi laviage eu kobelai Bolou aveve loui Velisi laviai avoe, loi kosive kitae au lo nimabigei lo hoeasavei vata kole aveve dua age lo kele udua aeviva. ³ Aa kateige lo vali bahata udua ai ai sisila ava. ⁴ Iale lo ola soliale koto moeaga loui egeta butuhai isito loi koto kohame louge evi. ⁵ Lo malahala ko ivage malahau toela keule vali bahata tiluaga vata bahata keveo tiluaga Diu ata bahata agigei toelatigei uvuiabe igei. La ivage IESU keu Nasaleta ata iale laa dibage ata kou IESU lovale kea kosive. ⁶ Vali voleo malaha kou olale Diuia Dubu kitae ke vai toelatigei. Kateivaga lo olale ko vai loi basu tele aveve kaoai. ⁷ Isito amea kosive Lisiasiu solekata loi loi adau uvule adavela holisi vai tilu. ⁸ Isi lo lavigei avoe loi ba taevelivelu Gamani kosi kitae Velisi kele kou aveve toela louve, kateila age lo loi alu ko louvale keu leleve iale belagau ba alu loui. ⁹ Kateai louge Diu ataea kotove ivi letatavai avoe keu lelevelau ke loulu. ¹⁰ Abo kateai louge gamani kosi kitae keu Bololu loui avoe kobelai lavisi ai nona lou ige Bolou kobelai loui avoe da dibage au lahani moeagale vata ko nalisi lo ata ko nenita naligelu iale dale sisilale ai vudile lavisi da ale nona loui. ¹¹ Da loaleu Dielusalemae velevai guligulialeu vali nii tuelou '12' aike vesulu. Ale ata belagevege abole da ale ke loui alaviai. ¹² Da Diuia dubu kitae keveo aboili guliguliai avevebe toela abolai ai agigei toela tigesolilu isoho ebouivale keveo toela be a solilu. ¹³ Iale ata koea daele kotou toela louale keule oleveo kateai koto keu bai vai lelevetisi, keu nenie solilu. ¹⁴ Ata koea loi vavivuia DILAVA hoeaseavai Mouseseu kisaiale isi belovetaea kisaiale lovage dataga ke lovai tiva. Isito IESU kuva leleve ke dau lovai hoeasavai tiva isege abo loui avoe IESU kuva keu sele kuva. ¹⁵ Isito da dibage ata kotaea dibage atau toela, atau duaea vovoale keale ba kobekavai. ¹⁶ Katealelu daa olale dii uvu hoeasavai vali bahata DIALVAu nile isi ataea nitale melitavai aveve dua ula agei. ¹⁷ Daa lahani moeaga Dielusalemae tie solilogoto ba tiale keu kosealu. Daa moni agisi dii ata leleve ke vavege ue solige da kalevei dbue tai mesia kavei vaui DILAVA hoeaseavalu. ¹⁸ Daa keveo ui atabe vai toelatie solisito uu dua ai damiga hoeaseavai uvaga ataea dii aveve ke ivai dibaevelu. ¹⁹ Isito Diuia ata volea Eisiae vatala loale kea Abelabo lolivelu ai vudile lavisi da ale kolate ai dii toela loui aa laviai isito kea loie savalu. ²⁰ Iale ata ko lavigevege abo memila kanisoloea vudile di aveve kaoage di aveveabe toelau ue soliale ke loui aa laviai. ²¹ Isito kateivalela da baita kelai loui kosealu la davai koveo loale keu kosealu da dibage vovovale keale kobekavai. ²² Bolou kateai louge Velisi abo IESU aveve loui lavialelu Bolo vilele kotave ke kalei ata lavigei avoe usege amea kosive Lisiasiu loigeto da koto hanavage loige da ba kotaveve vali louge lai kotove evisi. ²³ Kateai louito au kaimale lavige avoe Bolo meialemei talivelu dibulae bavuito momai avoele dibulaea aveve ke alive. Kakoluvuvea loige kalevege abo loi ivaevei. ²⁴ Ivaga vali volea vesusege Velisiu au keate Dulusilasiti loevelu. Ivuve keu Diuia keate iale kea loi louge abo Bolo vai loevelu ige Bolou aboele evievi vai IESU vileo vaeavaveve ke loui haivelu. ²⁵ Isi lavigei avoe uveveu dua ula aa kalevai lai olateave aa kalevaito IESU olate ke ave. Kosealelu DILAVAule ba vatau ata koea aveveabe bahata kaoai kateai louge Velikisiu vabuai laviai avoe taliveluto vali da vaeavai louge ba lo. ²⁶ Katea olavale Bolou moni vole vavuge eu agisi Bolo hanavage au tai isito eu be vavue solilu. Huhui kele vali igali galile loivaleu Bolo luvita ui tieviva. ²⁷ Kateivaga lahani abutiu '2' vesulu ige gamani vole Bosiasi Vesitasi keu Velikisi lovo valu isege Velikisiu Diuia ata kea ola ai Bolo hanavage dibulae tilu.