¹ Bolou kanisolo ke malihei avoe di kakoluvuia di uvule toelabeu ue solilu di aveve keu DILAVAu nile duave ula. ² Kateai louge dubu kosi kitae Ananaiasiu au kaimale lavigege voleu Bolou aile kavalu. ³ Ige Bolou kosi ke laviai avoe DILAVAule ba aa kavai. Kosealelu ai aveve keu momolu tatale oo beniale kelate. Aa keveo ugulumai lailoi basule di aveve kaoalu isito ai kaimalealai louge abo daa kavale kele aa basu lehosivalu. ⁴ Ige ata volea vavavele uale kea avole loui avoe aa koto kateale louale keu DILAVA dubu kosi kela aa kevai toelativa. ⁵ Ige Bolou abolai loui avoe da ivage keu dubu kosi kitae olibeto da kateai avolu loue solilu. Kosealelu bukau kotou loui avoe labea momai lai lida kelai kotobe toela lougelive. ⁶ Kateai louito ivasege kanisolo volea Sadiuki ataea isege volea Balisese ataea. Ige Bolou genuhamai loui lavigei avoe dau di mamati Balisese ata iale la daele aveve kaoale keu koesalu da dibage voele ata keale kobekavai. ⁷ Bolou kateai louge Balisese ata isi Sadiuki ata kea ke evisi volelai loui tuvuai vole gogonigelu. ⁸ Vole kaleveale kele Sadiuki ataea loui avoe vovoale ata kea ba kobekavalivelu bele, abo vovoge munanaeabe keta ue solilu. Ige Anelu keta ue solilu kea kateai lousege Balisesea abolai loui avoe ba la louale keu kate solilu. ⁹ Kateai louge kotou belalai ulu isege Balisesea basu haivevale malaha voleu kobelai loui avoe malaha kou atau dua. Loo avoele avevebe toela iva solilu iale isoho aluia munanala avolu louva, isoho anelu volela avolu loulu. ¹⁰ Au kateai louge ataea volelai tuvuai baito volelai louge amea kosive keu ke evisi huhuai avoe isoho abole ave Bolo kavai vai toelatisi kateai au kaimale hanavege tiale ataea uvule Bolo vai loevealea amea baliki kele vaeavaevelu. ¹¹ Kateivale vavile IESU loi Bolou vavale lavisi laviai avoe momai vabualive. Aa Dielusalemae ata haiveale kelate ale Lome oo kitae keveo dii koto loui haiveso. ¹² Vavita Diu ata volea vole bevugei igalitoai nonahamai loui avoe lai vavita lovita ee ta ii kalevaito Bolo kavagau voeleigeto ba lovita ee ta ive. ¹³ Ata bahata votiala '40' koto ke huhuai louva. ¹⁴ Isi tiale dubu kosive isi ou kosive ke lavigei avoe lo koto vole isute louale lo bae lovita ee ta ilivelu bele iloho lo Bolo kavage voeleai, igeto lo ba lovita ee ta isi. ¹⁵ Iale laea kanisoloa ata keali Lomeni kosive kelu koto hanavage au Bolo hanavage loisege lo kuvau tavae kavagau voeleai. ¹⁶ Kateai lousege Bolou duvuveu ke evisi tai amea ou uvue tai Bolo lavialu. ¹⁷ Ige Bolo amea voo vole laviage loi Bolou duvu vai tai amea kosi kitae ke haivuge eu koto vole loui amea kosike laviai. ¹⁸ Ige amea vo keu Bolou duvu vai tai amea kosi haivui laviai avoe Bolola ese ko hanavage aa lavialivelu lolu. ¹⁹ Ige amea kosi keu ese ke adala holisi vai tai belai avoe ke lou a vadeula dalu loulivelu lolu. ²⁰ Ige voo keu avolu loui avoe Diuia ata kitae kea olale abole livu kanisolo hanavege abole aa seleavai Bolo vaitai avoele kotou gala kaoai evisi. ²¹ Kelu abo louge Bolo hanavalive kosealelu ata bahata voti '40' kea loui avoe loeale eta lovita ilivelu bele ilogo loo Bolo kavage voeleai, igeto lo ba lovita eta isi. ²² Ige amea kitae keu voo ke laviai avoe koto kobe loui ata haivelive isito sekiai te isi kateai loui hanavage tilu. ²³ Amea kitae keu louge solodiave abutitaea loige au lavigei avoe taevelivelu tuvaliavale ata bahata tu hadeleti '200' agive, isi osile tiveve ata seveniti '70' agisi ke dulugei tiveve ata tu hadeleti '200' keta agigeve isi hau bemotou dua alivelu vaviu naini koloki '9' kobekavai teve Seselia vatavae. ²⁴ Isi osi voeta Bololu valivelu ele tai isi avoluvita tiu dua alivelu gamania kosi kitae Velisi vilela daiave. ²⁵ Kateai louito levaleva vole kisaia vai gamani kosi kitae Velisilu hanavalu. ²⁶ Isi loui avoe di kosi kitae ale duave di ivila Kalodiasi Lisiasi. Da deiada ko louge eviso. ²⁷ Diu ataea olai malaha ko kavage voeleai isito da dibage malaa keu Lomeni ata ige da ke ivai di kaimaleali tiale vai amea oe loevelu. ²⁸ Da ata ke aveve kaoaliveluga vai Diuia kanisolo keveo tilu. ²⁹ Keveo tai kaoige malaha keu avevebe toela a solilu iale dale oleveo kateai. Ke vai kavai o vai dibulae vaeavai. Kea Diuia basu ke ulale koto vai avoele vaeavalu. ³⁰ Ige volea abo Bolo kavaveve ke loula age da hanavage aeo lolu. Iale dale ba Diuia ata hanavege talivelu aveve koto loui a laviai. ³¹ Ila age da vavile tuvali atata levalevaveta ta Bolo ta meialemei tiale oo vole Atibatasie tisege vau alavalu. ³² Ige vavita tuvaliavale ataea kuiakavai vatala amea oe loisege Osile tiale kea Bolo luvita Osile tilu. ³³ Kea ke meialemei tialea Sesalia oe daiai Bolo meialemei gamani kosi kitae oe vaeavalu isi amea kosive keu levaleva vai vavulu. ³⁴ Ige au levaleva ke dodavei Bolo belai avoe au oleveo vata ke ata alau, ige Bolou laviai avoe dau Silisia ata. ³⁵ Ige kosive keu Bolo laviai avoe ai aveve ivai louale kea koveo loigeto daa baa ai nona evisi. Kateai louito au kaimale lavigei avoe Bolou meialemei vai kosive vole Elodiu oo vole bosi kouale keveo bavulivelu tilu.