¹ Abo aboili usege Diudea malaha volea loaleu Anitiokae evievi ata lavigei avoe Mouseseu basuale keu louale kelate lale lai veuavale vate boisito ba ukolikoli mauli vave. ² Kateai louge Bolou Banabasiti aboili vole lai loui tuvuage ekalesiaea loi Bolota Banabasita lavigei avoe evievi ata vole agigei tai Dielusalemae Dubu kosi isi abositoloele koto ke kaoai baive evive. ³ Kateai ke hanavege tialea Benaisi vatae daiai tialea Samalia vatae daialu vata abutita kele oo moeagaea ulu iale oo igaligalile aloloai lavigei avoe Diu ata oliesoliale kea ave IESU nona evisi lovaeviva ige kea ke evisi sisila kitae aevelu. ⁴ Ige abo Dielusalemae daiage abositoloe ai Dubuu kosivea isi ekalesia ataea sisilaeabe kitae aevelu. Ige Bolou Bananbasiti kosiveu hau asege DILAVAu dulugevale ke loui ekalesia bahata ke haivelu. ⁵ Ige Balisese ata volea evie solivale ata keali loui avoe lo olale Diu ata olie soliale kea abo vudiu vate boisito Mousese basuale ke lovai tai. ⁶ Kateai louge abositolo isi Dubu kosive kea vole abouai olai koto ke kaoai. ⁷ Abo koto ke ai belalai usege Bitau kobelai loui avoe di kakoluvuia la dibage DILAVAu vali voleo da letatavage da tialeu Diu ata olie soliale ke haivege abo DILAVAu koto evisi lovaevelu. ⁸ Ige atau uvu ivale DILAVA keu Diuia ata olie soliale ke haivege ba DILAVAu nile duave olige eu au munanau tuvu lailoameale kelate vavelu. ⁹ Diu ata isi Diu ata oliesoliale kea DILAVAu nile vole lateala Diu ata olie soliale ke abo uvu vai DILAVA vavuge eu toelaeabe totoalu. ¹⁰ Iale la vadeuluga la olai DILAVA aveve kaoai evievi ata kele Mouseseu memila louale ke louge abo ke ai memila lai loi vavivuia basuale isute ke vai lovage keu abole isuai malomaloalu. Ige lai lota ke lovaveve keta lailoele malomaloalu. ¹¹ Isito lailoi kosive IESU KELISOu lailo huhugei lailo dulugeale kele lailole lailoi uvu vai DILAVA vavui uluaga lailole mauli agisi isi Diu ata olie soliale keale abota agisi. ¹² Bitau kateai louge ata bahataea ke evisi sekiai uevelu isege Bolou Banabasiti aloloasege DILAVAu dulugevesege ea ivai teteivale moeaga keta loui haivelu. ¹³ Abo koto ke loui vesuiavasege Dieimisiu kobelai loui avoe di kakoluvuia di koto evive. ¹⁴ Saimoni bitau la haiveale keu kosealu DILAVAu aike Diu ata olie soliale ke huhugei olale ke vole agige abo atave olisi. ¹⁵ Iale memila belovetaea louale ke ave leleve olilu. ¹⁶ Au loui avoe kosiveule vaoe valivole loige dale Deividiu atate kea olate bokohovoale ke letatavai kouge au tota dogave olisi. ¹⁷ Ige valivelu ata bahataeale da kaoige dale Diu ata olie soliale ke toiavege abole loi di ata leleve olievei. ¹⁸ DILAVAu memila koto ke ivala ai loulu. ¹⁹ Katealelu da huhuige lai loea Diu ata olie soliale ata kele basu moeaga a kalevai kea olaeabeu DILAVA lovai tai. ²⁰ Iale lai bavuevege toelalu isito abolai koseale ai lai levaleva kisaiai lavigei koseai labea momai abo mesia vadeu agisi loi abo dilava hoeaseavale ke ievivale isi volea keateali navaevivale isi momai mesia kavage taoveu lotie soliale ke ilive isi taove ievivale lai koto ke ula loui kisaiai vai abolai hanavai. ²¹ Kosealelu lahani igali uvule bula igaligaliai Mouseseu basuale ke vai dodavelogo vai Diuia oo igaligalila dodavei haivei tilu. ²² Dieimisiu kateai louge abositoloea dubu kosive kea ekalesia ata keali nonai ata abutita vai Bolota Banabasita vavui hanavege abo levaleva kisaiale ke vai Anitiokae tai, iale ata abuti kea iviala koea Diudasi ivive volela Basabasita Sailasi. ²³ Abo levaleva ke kisaiai avoe loi kakoluvuia Diu ata olie solialea Anitioka vatae uvale Silia vatae uvale isi Silisia vatae uvale lalaiga lo koto ko kisaiai hanavalu. Abositoloea Dubu kosivea is ekalesia ata Dielusalemae uvale lola lalai koto ko kisaiai hanavalu. ²⁴ Lo evige loi kaimale volea keveo tai koto vole louge lai uvu lulualu. Abo aveve kateale ale ke lo ke hanave solilu isi lo ke dibage solilu olea ale ke. ²⁵ Kateige lo vole bevuai nonahamala ai ese abuti ko makagei hanavege loi kakoluvu Banabasita Bolota lohomegei laeo lolu. ²⁶ Abositolo abuti kea lailoi kosive IESU KELISOu hau avaga ataea olai kavege abo vovoi. ²⁷ Lo Diudasita Sailasita hanaveale ke belagege abole lalai lo louale ke lalai loui. ²⁸ Munanau tuvu lolai loula age lo lalai loui lo olae soliale la loi basu moeaga lovai kele isualivelu. Isito lo louale ke ula lovave. ²⁹ Labea momai abo mesia kavei agisi loi abo silava hoeaseavale ke ievivale. Isi mesia taou lotie soliale ke ievivale isi labea momai lai kakolu keateti nalive. Lale lo louale ko aluaga aveve dua ave, loi kotou kele kateai vesulu, la nohovu. ³⁰ Abo levaleva ke kisaiai vai kaimale ke vavege abo vai Anitiokae tilu. Tialea ekalesia keneni toiavege loevei igalile usege abo levaleva ke vai vavelu. ³¹ Ige Anitiokae ata kea levaleva ke dodavelu isi abolai kotou dua kisaiale ke evisi sisila kitae aevelu. ³² Ige Diudasiu Sailasiti beloveta ata olievei Anitioka ekalesia ke haivevaga abo evievile meliai uevelu. ³³ Ige kea valini voleo aboili uevelohoto ba kalevei sisila kitaeta kuiakavai Dielusalemae loevelu. ³⁴ Abo tisege Saelasiu olai okele ui. ³⁵ Isege Bolou Banabasiti Anitiokae ui ata voleali DILAVAu koto loui haiveva. 'Bolou Banabasiti vole kalevelu'. ³⁶ Ueveale vali voleo Bolou Banabasi laviai avoe lati kuiakavai tai kai memila DILAVAu koto haiveale ke ivei, au kea udua ava o uveveabeu toelalu. ³⁷ Kateai louge Banabasiu avoe lati Dioni Makata vai tai. ³⁸ Isito Bolo homasiavalu eu aboili hauai tiloho Babilia vata keveo kalevei kuialai au oe tilu. ³⁹ Kateai ke loui avoti volelai tuvuage kele vole kalevege Banabasiu Dioni Maka vai avoti bouti vai Saibalasi vatae tilu. ⁴⁰ Isege Bolou Sailasi vai avoti tige ekalesia kea lavigei avoe DILAVAule ba la huhugei la hoeaseavei. ⁴¹ Ige abo kalevei Silia isi Silisia vatae ekalesia haivege ea abo evievile melitavai ulu.