¹ Bolou Sailasiti tialeu Debi oe daialu isi tialea Lisitula oe daialu. Oo kele evievi ata abuti u ulu keala Timotiu au aiati. Aiave keu Diuia keate isege mamave keu Gulikia malaha. ² Ige evievi ataea Lisitula, isi Aikoniamue uvale ata keale Timoti ke eahaleva keu vou dua. ³ Katealelu Bolou avolu olai ke meialemei avoti tai. Isito Diuia ataea dibage mamave keu Gulikia ata olialelu Bolou laviai veuivale vate letulilu. ⁴ Isi kateai au kaimaleali oo igaligalila aloloai ata haivei tialea Dielusalemae abositolo isi Dubu kosive kea Basuale nona ke loui evievi ata ke haiveva isi avoe basu nona ko evisi lovai teve. ⁵ Ige ekalesiaea ke evisi abo evievi kele meliaevelu ige ata volea ke ivai IESU lovaevelu. ⁶ Ivaga vali voleo Bolou au kaimaleali olai Eisia vatae tai isito munanau tuvu olae solilu abo keveo taevelivelu. Ige abo kalevai Biligia vatae tievelu isi galatia vatava kenenile aloloai tilu. ⁷ Tialea isia vatavae daiai olale Betenia vatae taevelivelu asege IESU munana tuvu kuvaebe bavulu. ⁸ Ige abo Misia vatae tialea ovole Toloasie daiavelu. ⁹ Keveo daiage vavive kele Bolou nai naoisege Magidonia malaha voleu lavisi toiavai avoe lolivelu koveo lo duluge. ¹⁰ Bolou nao ke ageto lo olai Magidoniae tai kosealelu lo dibage DILAVAla nao ke lo haivelu olale lo talivelu kotou dua loui haivei ata kea olalelu louive. ¹¹ Katealeluga lo Toloasi oo kalevai bouti vai tialea Samotasiae daialu isi vali voleo tialea Magidonia vatala daialu isi lilikata tialea Samutalasia. Isi vavita vole Niabolosie daialu. ¹² Isi otolovai vatala tievelu tai oo vole kitae Bilibaie daialu. Lomeni ata moeagaea kele ulu kelega lo tai vali moeagale ulu. ¹³ Uale bulale huhuai kosealu Diu ataeale eu bavae tai guliguliagei. Isi kateai tige keate volea keveo igalile vole bevuai ueviva ige lo tai kotou dua loui haivelu. ¹⁴ Ige Taiatala keate vole Lidia keu loi koto eviva keule ogona dua taote ke ataele voiavale keate. Keu Diuia ata olie solilu isito DILAVA hoeaseavale keatela ige DILAVAu keate ke uvu alavage au Bolo koto louvale ke evisi au uvu vai IESU vavulu. ¹⁵ Ige keate keu ole uvale ke nenia IESU lovai babatisoalu ige keate ke lo lavigei avoe la huhuige da evievi keate olige loevelively di oe uve isi kateai meliai louge lo aboili oveo tilu. ¹⁶ Vali voleo lo guligulilu tisege va voleu loele loevelu au ataeali, va ke vileo munana toela ulu. Iale aule vaoe vadeu loale ke ivai lougei ige kosive keale laviage aule ke ai ele moni kitae agievigei. ¹⁷ Iale va keu lo lovegei genuhamai loui avoe atao malaha koea DILAVAu kaiamaleala koea. Iale keale lale oleve kateai ukolikoli agiveve kelabo ko louva. ¹⁸ Vali moeaga kateai louvaga Bolou avolu tuvuai kuialai munana toela ke laviai avoe IESU KELISOu ivile da aa lavialu va ke kalei te. Ige solekata munanau toale keu va ke kalei tilu. ¹⁹ Ige va keu biagea ke ivai loui avoe loeale ba oleveo kateai va ko vileo moni agisi ke loui Bolota Sailasi ta vai kotalu tilu. ²⁰ Ke agigei tiale Lomeni kosive kea nile otovei loui avoe ata koea Diu ataea iale abo lailoi oo kole aveve toela aeviva. ²¹ Kea abo aveve loui oo kole Lomeni lailoi basute lehosivalu iale lai ba ea avevete lovai lailoele kalevalivelu bele. ²² Kateai louge ou ataea ke evisi olale Bolota Sailasita agigei kavei. Ige Lomeni kosivea ogonaeabe kela holisi davuai kaimale lavigege abo visukaeavelu. ²³ Abo visugevelogo agisi dibulae hanavelu isi dibula kosi ke laviai avoe ko agigei otovei nalige dua aso. ²⁴ Ige dibulau kosive keu ke evisi agigei ou uvue otovei abo idi kobuale ke uvue genaeabe agisi otovei bavugelu. ²⁵ Ivaga vaviu minale Bolou Sailasiti ane loui DILAVA hoeaseavasege dibula volea ke eviva. ²⁶ Isege hamu kitaeau katulu ige dibula oo keu hadai tailoige dibulaea ou anaka keta alavage seiniu soai lavulu. ²⁷ Ige dubulaea kosive keu kobelai ivage ou anaka kea alavai uge eu huhuai avoe ataea isoho iluvisi tiatilu isi au gaia vai amiga bisi. ²⁸ Kateisege Bolou genuhamai toai avoe amiga bilive loko nenia bahata koea ulu. Kateai louge dibulaea kosi keu au ese volelu louge lameba vai vavuge vai Bolou Sailasiti uale ou uvue tai teteta vudiabele kome bokoai vata bisi hoeaseavelu. ³⁰ Isi lohomegei loi belagei avoe di kosivea dale vadeu ai mauli vai. ³¹ Ige ea laviai avoe ai uvu vai IESU KELISO vavui ai eseali ba mauli vaso. ³² Kateai louito DILAVAu koto loui haivui ovele uvale keta haivegelu. ³³ Kateivale vavi kele dibulaea kosi kitae keu Bolota Sailasitalu eu vuvuneta vateabe oke ke totogei hoeaseavelu au ole uvale ke neniali babatisoalu. ³⁴ Ige kosive ke Bolota Sailasi lohomegei au oe tai lovi vavege ea ilu. Ige malaha keu au eseali abo uvu vai IESU vileo vaeavale kelu sisila kitae aevelu. ³⁵ Iale vavita Lomeni Gamani au bisimani ke hanavege tialea dibulau kosi kitae ke laviai avoe ata ke hanavege abo tai. ³⁶ Ige dibula naligei uvale keu tai Bolo laviai avoe Lomani kosivea koto hanavai avoe au Sailasiti keve iale kalevai taevelivelu u dua ave. ³⁷ Isito Bolou tai bukate ke lavigei avoe kea lo agigei kotai ataea nile lo visukaeavei lo agisi dibulae otovelu. Isito aike olale lo tai, lo ba talivelu bele kosealelu loea Lomeni ata iale Lomeni kosi kea ba loi lo hanavege lo tai. ³⁸ Kateai louge bukatea tai Lomani kosive lavigei avoe ata abuti kea Lomeni atala kea ige kea ke evisi vabualu. ³⁹ Isi tialea Bolota Sailasita sovaeavei avoe la nohovu lo kateale keu toelalu. La oo ko kalevai tige keu duave. ⁴⁰ Kateige Bolou Sailasi dibula kalei Lidiau oe tilu tialea evievi ata ivei nona haivei melitigelogo kalevei tievelu.