¹ Vali voleo Bolou Banabasiti tai oo kele Diuia Dubule aloloige ata moeagaea koto valu Diu ata isi Diu olie soliale ka koto ke evisi abo uvu vai IESU vavulu. ² Ige Diu ata volea kotou dua ke evie solialea Diu ata olie soliale ke seleavege ea tota kobekavai Bolota Banabasitalu kotou toela loui agigei toelatigelu. ³ Isito kea oo kele ui vali moeaga DILAVAu kotou dua ke loui haiveva ige DILAVAu ke huhugei hoeaseave dua kea avale ke loui haivege ataea ke evige koto keu DILAVAu koto lelevela. Kosealelu DILAVAu au vuvune Abositolo vavege ea hau moeaga aevei ivai vikoivale moeagata aeviva. ⁴ Iale oo kele koto evivale kea Abositoloea koto evisege koto evie site kea Diuia koto eviva. ⁵ Ige Diuia ata olie soliale kea isi Diu ata leleve kea olai abo kosiveali vuleta Abositolo ke kavei. ⁶ Kateige Bolou Banabasiti iluvisi Lisitula ta Debe vatae tilu keu oo kitae Likaonia. ⁷ Keveo daiai aloloai ata bahata haivei tilu. Abo Lisitulata Gebitae ata haivelu. ⁸ Abo Lisitulae usege malaha vole genaveu keu kaleta aiaveu vaeavale keu oo kele avota ulu. ⁹ Iale keu Bolou ata haivege eu ke eviu dua ava ugulumai uive. Ige Bolou ke ivai huhuige malaha keu au uvu vai DILAVA vavulu. Iale kele DILAVAule hoeaseavage aule doadoai. ¹⁰ Bolou huhuai kateai malihai baita avolu loui avoe kobelai laviso. Ige solekata malaha keu kobelai lavisi oalu. ¹¹ Bolou aveve kateale age atamoeagaea ke ivai aboi nonatele genuhamai loui avoe lailoi DILAVAeala koea tolovai ata olisi lailoea loevelu. ¹² Isi aboi dilava vole ivita Banabasi ivihai avoe Susi o Diubita. Isi Bololu loui avoe Hemesi Mekiuliasi kosealelu Bolo keu ona kitae avale ata. ¹³ Abo kateisege dilavaeabe Susi ke Dubu kosivea kea bolomakau agisi valavala agisi Dubu iabe oo ke iae uale ke kalei loale olale ovo kavei. ¹⁴ Kateale alivelu asege Bolou Banabasiti ke evisi abolai tuvuai abo ogonala holisi davuai loi viliviliai ataea uvu kele tihamalu. ¹⁵ Tialea abolai loui avoe vadeuluga la ke ava loea la latea ata kava. Lo kotou duala loui la haiveluga lolu isito la kea seleivale silava hoeaseavaeviva. Iala lo olale la ke kalevai to ukolikoli DILAVA leleveu vata ai, Otogo ai, davala ai avoele valevile ai otoveale ke ula hoeaseavave. ¹⁶ Memila kele DILAVAu ata kalevege abo ola ula aeviva. ¹⁷ Isito vali bahata DILAVAu laele aveve dua avale ke ivai kele luleleave. Keu lalai veni hanavage la lovi kavale kea lalavai baiagei ige la lovi ke isi sisilaeviva. ¹⁸ Kateiai lougeto ataea ke eviesolisi melitavai ovo kavei ata abuti ke hoeaseavei. Isito Bolou Banabasiti olae savai aveveabe bavulu. ¹⁹ Ilogo vali voleo Diu ata volea Anitiokata Aikoniamu oo kitae kele lolu. Loi ata ke seleavege abo ke evisi tuvuai vuleta Bolo kavai butuhai vaitai ou ieae kavatui avoe isoho eu voelealu. ²⁰ Isito evievi ataealoi letatavage eu kobelai tilu tialeu Banabasiti oo ke kalevai Debie tilu. ' Bolou Banabasiti abo vatae tilu. ²¹ Tialea oo keveo kotou dua loui ata ke haivege ata moeagaea evisi IESU lovalu. Oo keveo daiai uitiale vali voleo kuiakavai Aikoniamue tili tiale keveo uale vali voleo tota Bisidia vataea tialea Anitiokala daialu. ²² Abo oo kela ekalesia haivei lavigei avoe lai evievi kele goadave aveve toelau loige ke gogonialivelu lai DILAVAu vatava dogave keveo taevei. ²³ Kateai loui Dubuu Eloda otovei tilu isi vali vole abo lovi kalevai Eloda kelai guliguliai abolai loui avoe la lai uvu vau IESU vavuge aule la hoeaseavei. ²⁴ Kateai louito Bisidia vata kalevai tai babilia vatae daialu. ²⁵ Isi tialea Bega isi Atalia ola daialu isi DILAVAu nona loui ata ke haivelu. ²⁶ Isi Atalia oo kele bouti vai abo oe Anitiokae tievelu. Oo kelega memila ekalesiaea abolai guliguliai avoe DILAVAu au lovi, haukala kele la hoeaseavei da dulugei. ige la hauve ke ave ige ea kosive age vesuge abo oe loevelu. ²⁷ Kuiakavai loeveale ekalesia bahata abougesege Bolou, Banabasiti DILAVAu aboili usege abo hauve avale ke loui haivelu isi avoe DILAVAu kuva alavage Diu ata olie soliale kea aike DILAVAu koto evie savalu. ²⁸ Kateaito ba vali moeaga aboili ulu.