¹ Anitioka ekalesia ata kele kosive volea ulu volea beloveta ataea isege volea tisa vale ataea kele ulu iale kosi kea ivila koea. Volela Banabasi isege ata bukate vole ivivela Simioni ige Sailini vole Lusiesi ige memila Helodi oo le ui hauivale ata Manieni ige Solo. ² Kosive kea vali voleo lovi ie solisito abobiga vaemigei kosive hoeaseavasege munanau tuvu abolai loui avoe da olale Banabasita Solota makagege abo avoti talivelu da abolai hau louale ke aevei. ³ Kateai louge abo lovi ie solisito DILAVA laviavei aboi ada agisi Solota Banabasita tatale otovei guliguliai to hanavege ea tilu. ⁴ Munanau tuvu Solota Banabasita agigei melitigei hanavege Selucia oe tialea tai bouti vai Saibalasi vatae tievelu. ⁵ Tai keveo daiai oo vole Salamasi kele DILAVAu nona loui Diuia Dubu kele ata haivesege Dioni Makau aboili tialeu dulugei ata haivelu. ⁶ Isi aboili vatala tievelu oo igaligali kela ata haivei tilu tai oo vole Babosi kela daialu oo kele Diu malaha vole Baliesu keu au aveve kele ata seleavei avoe dau Beloveta vole dala kou malaha keu ivive volela Elimasi. ⁷ Iale keu vata kele kosi vole Segiasi Bolasi keti kakoloalu kosi keu lulelete ata iale keu Banabasita Solota laviage ea avoe lolu, kosealelu keu olai DILAVAu koto evisi. ⁸ Isito Elimasiu Solota Banabasita koto kavalu kosea lelu keu olaesolilu kosive keu DILAVAu nona evisi lovalivelu. ⁹ Kateisege munanau tuvu Solo vai melitilu kateivale valila abo Solo ivihai avoe Bolo ige eu Elimasi nimabisi avolu loulu. ¹⁰ Loui avoe aa keu seteneu aveve late ai aveve dua ke bahata agisi toelativale ata alau. Ai uvu kele valevile toelau uge a vali bahata sele nona loui DILAVAu nona leleve ke bavuva. ¹¹ Iale DILAVAu adau vuvuna vai aele vaeavage ale ba nii kelote olisi valiu ataga ivalivelu bele. Ai nii keule keloalivelu vali volea vesusege ba nia. Kateai lousege valevole bukateu dobai loi nive bavuge gusualu ige au ada katui loui avoe loi di adala holisi vai oe teve. ¹² Ige vatau kosive kea ke ivai tetehamai abo uvu vai DILAVA vavulu. ¹³ Vali voleo Bolou au kaimaleali bouti vai vatava vole Babosi kalevai Babilia vatae tievelu. Vata keveo oo vole Bega kele daiaevelu ige Dioni Makau kalevei tota kuialai Dielusalemae lolu. ¹⁴ Isege Bolou Banabasiti Bega kalevai vatava vole Bisidiae tilu vatava keveo ovole ivi Anitioka keveo tai daiai ualea bulau loige abo tai Diuia Dubu uvue ugulelemai ulu. ¹⁵ Ugulelemai usege Diuia kosive kea Mouseseu basuale ta Beloveta Buka keta dodavei vole haivege vesusege abo Bolota Banabasita belagevei avoe loi kakoluvuia au laele kotobeu uge louge lo bahata evisi. ¹⁶ Kateai louge Bolou kobelai loui avoe la volea Diuia ata isege la volea Diu ata olie solilu isito la bahataea DILAVA hoeaseavale ataea di koto evive. ¹⁷ Memila DILAVAu lailoi vavivu agigei makage kea Aguvitoe moeagage DILAVAu ivegei au vuvunele agigelu. ¹⁸ Ige abo tiale lahani voti '40' ke uvule kumoe oasege DILAVAu hoeaseavege ea nenive ula. ¹⁹ Ivaga vali voleo DILAVAu Keinani vata kitae kele ata seveni '7' ke kavei bedovege oo nunuvege ea tisege atave leleve kea vata ke vai avoele uevelu. ²⁰ Lailoi gala kea lahani vo handeleti vivti '450' keu uvule Agubitoe ui kumoe uale ke kalevai Keinanai vatae loevelu ivaga keu iaega DILAVAu ba ke naligeveve ata moeaga hanavelu ige ke dulugevaga bolobeti Samuelau kea iae lolu. ²¹ Ivaga Samuelau vali kela Iselalaea ata kea olai kini vaevelivelu age DILAVAu abolai Kisi voo Solo makage kiniabe olilu. Solo keu Benidiameni valadale lolu, loale lahani voti '40' keu uvule Iselala ata ke bevugei naligelu. ²² Ivaga lahani moeagau ue solisege DILAVAu Solo kalei Dividi makage keu Iselalaea Kini olilu DILAVAu Deividi huhuai loui avoe da ata katealelu olalu da huhuige Diesi voo Deividi keule da vadeu louale ke ai. ²³ DILAVAu kateai louito au louale kelate ai Deividi atatele IESU letatavage au Iselalalaea ata dulugevale kea kosi kitae ata olilu. ²⁴ Isito IESU au lovi a solisege Dioniu Iselala ata bahata haivei avoe lai aveve toela kalevai babatisoave. ²⁵ Ivaga vali voleo Dioni loviu uesolilivelu asege au ata lavigei avoe la huhuige dau ole dala kou. Au la dala ko nikovai uva ba dau ata ke olie solilu isito keu da lovai loiva keu kosi kitae iale daba genave samakave ke bodialivelu bele. ²⁶ Di kakoluvuia lo volea Eibolahamu atatea isege lo volea Diuia ata olie solisito DILAVA hoeaseavaeviva. Isito DILAVAu lailo agiveve koto keu lailo bahata kelai loulu. ²⁷ Isito ata volea Dielusalemae uvale kea IESU ivaito abo kosiveali lovae solilu. Isi abo bulale Belovetaea koto dodaveito kele lulele solilu kateila ai abo IESU kavai Belovetae koto vai lelevetilu. ²⁸ Abo IESU vai kotai avevebe toela avoele iva solilu isito abo melitavai Bailate laviage IESU vai kavage voelealu. ²⁹ Abo aveve kateale avoele age Bukau kotou avolu louale kenenia vesulu. Ige ata volea tai idiu dole vaveai vaitai abavulu. ³⁰ Isito DILAVAu voele kele isage kobelalu. ³¹ Kobelai au luta aboili Galileia isi Dielusalemae oivale ata keveo tilu iale ata keala Iselala ata ke haivei oiva. ³² Iale lo kotove dua kela loui ata haivei oiva. ³³ DILAVAu IESU isage kobelage au memila lailoi vavivulai louale kelateu lailoele velevalu. Deividiu Samusi Bukau uvule kisaiai avoe dau ai mama leleve isege au di voo alau. ³⁴ Ige Aisaiau au Bukau uvule DILAVAu koto kisaiai avoe da Deividilu aveve vole dua loui vaeavale kelate dale alu ai. Koto keu baiveu kosealu DILAVAu IESU isage kobelale keule tota ba voelealivelu bele. ³⁵ Ige Deividiu buka Samuni uvule kisaiai avoe DILAVAu ba au ese tuvute ke kalege guliu uvule ulivelu bele. ³⁶ Lai ivage Deividiu DILAVAu olale au esete naligeloho voeleige abo vai abavuge vesulu. Iale ata tuvute keu Deividi olie solilu. ³⁷ Isito ata vole igali gulile DILAVAu isale keu uesolisito kobelalu. ³⁸ Di kakoluvuia IESU kela lai aveve toela ke bahata uliage ue solilu. ³⁹ Iale lale lai uvu vai IESU vileo vaeavage aule lai aveve toela lai huhuivale toela ke uliai. Kateige DILAVAule lalai loui koseai la kea di nile duave Mouseseu basu ba la agigelivelu bele. ⁴⁰ Katealelu huhu dua ave oloivaga Belovetaea memila louale keu laele loiva. ⁴¹ Beloveta kea DILAVAu koto kisaiai avoe evive ata voleule loluaga da aike lalai vadeu ale ke louge la ba kotove evilivelu bele ialelu lale da koto louale ke homasiavaluaga lale vovove. ⁴² Bolou kateai louge vesusege au Banabasiti kalevasege ataea lavigei avoe vaoe bula kele loevelivelu tota koto vole louge lo evisi. ⁴³ Kea kateai lougeto Bolou Banabasiti kalevei tisege ata volea aboili tilu ata ke volea Diu ataea isege volea Diu ata olie solialea isito DILAVA hoeaseavaeviva. Ige Bolou Banabasiti abolai loui avoe DILAVAu lailo huhugei lailo hoeaseavale ke huhuai lai evievile goadave. ⁴⁴ Iale bula kele oo ke ataeau bahata loalea olale Bolou kosive koto louge abo evisi. ⁴⁵ Ige Diu kosivea ata moeagaea loale ke ivei Bololu mamai avolu tuvuai kotove kavai avolu kotou toela loui vai toelatilu. ⁴⁶ Kateige Bolou Banabasiti meliai lavigei avoe lo olale luta DILAVAu koto ko loui Diu ata la haivei. Isito lale koto ko homasiavai ukolikoli koto kolu homasiavage lole kuiakavai Diu ata olie soliale ke haivelivelu tai. ⁴⁷ Kosiveu koto kateai loui lo lavigei avoe da la letatavage laea atagau ata olilu iale taevelivelu Diuia ata olie soliale ata ke haive dua ai ukolikoli kotou dua loui vatau ata bahata haiveve. ⁴⁸ Abo koto kateale louge Diu ata olie soliale kea ke evisi sisilai kosiveu koto kelu olaevelu ige ukolikoli koto kelu olale kea evievi ata olilu. ⁴⁹ Kateige kosive kotou vata bahata ke bavui tilu. ⁵⁰ Kotou ata ke nenile tige Diu leleve kea ou kosive isi ou keate lulelete ke agigei Bolota Banabasitalai loui agigei toelatigei nunuvege abo tievelu. ⁵¹ Isi oo ke kalevai Aikoniamue talivelu abo genale ou gogea sesiaito tievelu. ⁵² Isege Anitiokae evievi ataeau munana tuvu agialelu sisila kitaealu.