¹ Vali kateivalela vatau kosi kitae Helodi keu ekalesia ata vole dikaiavelu. ² Isi loug vove voleu gaiata Dioni kaka Dieimisi bige voelealu. ³ Helodau aveve kateale age Diuia kosi kea ke ivai sisilage au tota au ese hanavege abo tai Bita umuvai vai lolu Diuia sisila vali ni kitae basiova vali kelagabo ke aevelu. ⁴ Kateai Bita umuvai vai loi dibulage solodia voa '4' kea ke naliavai uva. Ivaga basiova sisila keu vesusege Heloda olale lBita vai ataea nile kotai. ⁵ Kateige Bitau dibulae usege ekalesiaea avolu meliai guliguliava. ⁶ Bitau dibulae uale vavita Helodau olale vai ataea nile kotai isito vavi kele hau voleu avoele lolu. Solodia abutitau seini abuti vai Bitau ada umuvai vai abo minale vaeavage nasege ami abutiu anakale lavisi ulu. ⁷ Ige solekata IESU Anelu voleu loi o ke uvule lavige atagave kitaeu ou uvule kalui ulu ige Anelu keu Bitau adala holisi isasege seini abuti kea adavele soai lavulu ige Anelu keu Bitau adala holisi isai avoe solekata kobela. ⁸ Ige Anelu keu Bita laviai avoe ai beleti ke legigimai ai genau vate katu ige Bitau ke age loui avoe ai dabau ogona katui da lovai lo. ⁹ Ige Bitau Anelu ke lovai tilu dibula kalevaive ige Bitau tai huhuai avoe au da naola ko ava bela lelevela da ko nita ava. ¹⁰ Isi avoti loalea solodia abuti ke leiviai loevelu. Loevealea tota ami abutiu laviale ke leivigei lolu loisege aulita ale anaka keu amiga alava kavalu ige ea daiai vatae kuva kitaela tigeto Anelu ue solilu. ¹¹ Ige Bitau vadeu avoele loale ke huhuai avoe da ave ivage DILAVAu au Anelu hanavage loi da duluage Helodau vuvune keu daele siaue solilu katealelu Diuia ata kea ba avevebe toela daele alivelu bele. ¹² Kateaito kalei Dioni Maka aia Meli keu oe tilu tialeu kaie ui evisege ata moeagaea vole bevuai guliguliava Bitalu. ¹³ Guliguliasege Bitau loaleu ou anakale lavisi kavai vatovatoage kele hauivale va vole Lodau keu loi Bitau koto valitilu. ¹⁴ Kotove evisi valitisi anaka alavasolisi sisilata tai ata laivgei avoe evive Bitau loaleu kaie uva. ¹⁵ Ige abo laviai avoe ale tilogoalu ige Loda loui avoe be leleveta Bitau lolu ige abo avoe be munanavela eu. ¹⁶ Kateai lousege Bitau meliai oo kavage abo anaka alavai ivage ma leleve Bitala kou ige ago vikoai tetehamai avolu sisila kitae alu. ¹⁷ Ige Bitau adata lavigvege ea koto solisi sekiai usege au dibulale kosiveu hanavale ke galave loui haivel isi loui avoe taeveilivelu Dieimisi ta memeloeabeta ke lavigeve kateai loui lavigei to kalei o voletilu. ¹⁸ Isege vau alavage ame le kea Bita kaoai loui avoe Bitau oleve katealu. ¹⁹ Ige Helodau louge abo Bita kaovaga ue solige Heloda ami ke agigei kotai louge memeloeabe ami ke kavege vovolu keu iae Helodau Diudea vata kalei tialeu Sesilia vatae tai ulu. ²⁰ Vali voleo Taea ata isi Saidoni ata kea aveve vole age kini Helodau abolai tuvuai ulu ige ea vole bevuai olai loi Heloda ivalivelu loevelu. Loi kosi vole lBalasita ke sovaeavai laviai avoe lo olale au lolai kuva age lolu lo vatavelega loviai iva ialelu lo olai avoluvita uu dua ai tuvu kalevaito. ²¹ Kateai louge eu abolai valivole vaeavalu iale vali keu loige Helodau au ogonau dua ke katui loi ugulumalu au telonale ugulumai koto loulu. ²² Ige abo kotove ke evisi genuhamai baita kotoai avoe keu ata olie solilu isito DILAVAla keu nonava. ²³ Kateai lousege DILAVAu Anelu dobai Heloda kavage hatitiu toela valu hatitive keu kosealu vui moeagaea avoele ui uvue ke ige eu voelealu. Kosealelu eu ataea koto evisi huhuaito DILAVAu koto evisi hoeaseava solilu. ²⁴ Eu voeleige DILAVAu nonau ata bahataele tilu ige ataea DILAVAu nona evilu. ²⁵ Isege Solou Banabasiti moni agisi Dielusalemae tievelu tai Dubu ekalesia kosive vaveito kuiakavai Dioni Makata meialemei loi tota Anitiokae tievelu.