¹ IESU abositoloea is hauve avale kea bahata Diudeae uale kea evige Diu ata olie soliale kea DILAVAu koto evisi valu. ² Ivaga vali voleo Bitau Dielusalemae loige ata volea avolu tuvuai loulu kosealelu abo olavale Diuia ata olie soliale kea aboi vudiu vate boisito ba DILAVA lovai tai. ³ Ese kea Bita laviai avoe a vudiu vate boie soliale keali lovi ige keu toelalu. ⁴ Kateai louge Bitau vadeu avoele velevale ke loui lavigelu. ⁵ Lavigei avoe da vali voleo Diobae guligulialogo naoai ivasege Otogole ogona voleu omamale keta dobai loaleu di tatale ulu. ⁶ Ige da niai uvuve ke ivage ovo, botou mi, ute isi botou ugu kea ke uvule ulu. ⁷ Ige da evisege koto voleu loi loui avoe kobelai ke kavei iso. ⁸ Ige da loui kosealu kosive kateai lou kale. Memila mesia kateale kele loi basuu ulu iale daba ke ilivelu bele. ⁹ Ige koto keu tota Otogole loui avoe DILAVAu vadeu dua ai otovuale kelu momai loui kosealive toelave. ¹⁰ Koto kateale lou abutita igalitai to ogona ke vukahovoi vaea tilu Otogou uvue. ¹¹ Kateisege da uvale o kele sesilia ata abutita igalitau dalu loevelu '3'. ¹² Ige munana tuvu da laviai avoe malomaloalive aboili te ige Dioba ole malaha sigisi '6' kea daluvita tilu. Lo tai Seselia oe daiai Koniliasiu oe tievelu. ¹³ Tige Koniliasiu lo lavigei avoe Anelu voleu di vavale lavisi da laviai avoe ai ata vole hanavege tai Saimoni Bita meialemei loi. ¹⁴ Au lolivelu la haivege au isi ai ole uvale ke nenia koto kele ukolikoli agive. ¹⁵ Kateai loug da loaleu ke haivesege munanau tuvu memila lai loele loale kelateu aboele lolu. ¹⁶ Ige da IESU louale ke huhualu au loui avoe Dioniu ee ulalega keu ata babatisogelu isito munanau tuvule loi au vuvunekele la vuvune tievegei. ¹⁷ Iale da huhuige kea abo uvu vai IESU vavuge DILAVAu au munanau tuvu lailoameale kelate ke vavelu. Iale DILAVAu kateale asege daba vadeuluga bavuva. ¹⁸ Bitau kateai louge Dielusalemae evievi ata kea ke evisi sisilai DILAVA hoeaseavai loui avoe lo dibage DILAVAu aveve kateale age Diuia ata olie soliale keale abo aveve toela kalevage DILAVAule ukolikoli la vavei. ¹⁹ Abo Sitiveni kavale vali kela ata moeagaea vateu tuvu agisi iluvisi vata igaligali keveo tievelu. Volea Beniesie tievelu volea Saibelesie tievelu volea Anitiokae tai aloloai iu ula haivei tievelu. ²⁰ Kateisege Saibalasi isi Sailini evievi malaha volea iluvisi Anitiokae tai aloloai Diu ata olie soliale keta IESU kotou dua loui haivelu. ²¹ Kateivale valila kosiveu vuvuneu aboili uge ata moeagaea kotoeabe evisi IESU lovaevelu. ²² Kea IESU lovale ke kDielusalemae uale Ekalesia ke evisi Banabasi hanavage Anitiokae tilu. ²³ Tialeu velevage DILAVAu Diu ata olie soliale ke huhugei hoeaseaveale ke ivei sisila kitae ai lavigei avoe lai uvu vai DILAVA vavui lai evievi kele melitavai uve. ²⁴ Banabasi keu atau dua baua isi evievi malaha leleve ata. Au kateige munanau tuvu avoti uge ata moeaga moeagaea DILAVA vileo loevelu. ²⁵ Banabasiu kateaito Tasisie Solo kaoai tilu. ²⁶ Tialeu ivai meialemei avoti Anitioka oe loevelu loi uale lahani igali uvule Ekalesia bahata bevugei agisi igalile otovei haivelu isi evie solivale ata keta haiveva ige Anitiokae evie solivale kea memila koto evite kelai loui avoe Keliso lovai tivale ataea. ²⁷ Kateivalela ekalesia beloveta voleali Dielusalema kalevai Anitiokae loevelu. ²⁸ Ige ata kele beloveta vole Agabasi keu munanau tuvu vuvunele ata lavigei avoe vaoe vagala kitaeule vata bahatale loi. ²⁹ Kateai louge evievi ataea ke evisi huhuai olale abo kakoluvuia bea Diudeae uvale kelai hau hanavai isege volea moniu aboele uale kea abo kakoluvulai hanavai. ³⁰ Isi kateai moni otovei agisi Banabasita Solota vavege ea agisi Diudeae tialea ekalesia kosi kitae ke vavelu. Ialeu Kalodiasiu Lomaniu gavana kosi kitae olivale vali kele vagala kitaeu lolu.