1
Seselia oo kele malaha vole kitae Lomeni ami naligevale Koliniasi keu ulu keu Italia ame ke naligevale ata kitae.
2
Keu au ese keneni hoeaseavei aboili DILAVA vabuiavai hoeaseavaeviva keu meliai Diu ataea hauiabea ue solivale ke dulugei hau moeaga vaveva vali bahata guliguliai DILAVAlu daluiva.
3
Ivaga gutu vole tili '3' okoloki nai naoai ivasege DILAVAu Anelu voleu loaleu laviai avoe Koniliasi.
4
Ige Koniliasiu ke evisi vabuai laviai avoe kosive aa vadeulu olalu ige Anelu keu laviai avoe DILAVAu ai guliguli evisi ai aveve dua ke ivalu isi a huhualu.
5
Iale ale ai ata vole habavege abo talivelu Diobae malaha vole ivive Saimoni Bita laviage au loi.
6
Bita keu Saimoni vole Bolomakau vatele valevile avale ata keti davalau vavae ovele avoti uva.
7
Kateai louito tisege Koniliasiu au ata abuti ovele hauivale ke isi au solodia voleu guliguliava keta toiavegelu.
8
Toiavei lavigei koto keneni haiveito anavege Diobae tievelu.
9
Tavae navai to tiale Dioba ou vavae tievesege Bitau vali ni minale ou tatae guligulialivelu tilu.
10
Keveo tai guliguliaito vagalai olai lovi isi abo lovive vausege Bitau nai naovole alu.
11
Isi ivage Otogou davuhovoge ogona vole bosi baukomale keu dobai lolu.
12
Ogona keu uvule mesia kosealea ulu, ovo, mi, ute, ugu isi moeaga volea keu uvue ulu.
13
Ige koto voleu avolu lolui avoe Bita kobelai ke kavei ige.
14
Ige Bitau loui avoe kosive da ba mesia toela kateale ilivelu bele. Memila lo kelu basu vaeavalu iale da ba ke ilivelu bele.
15
Kateai louge koto keu tota avolu loui avoe DILAVAu valevile dua ai otoveale kelu momai loui koseivale kea toelalu.
16
Koto keu loaleu abutita igalitaea loalea alu niai a kaoiva.
17
Ige Bitau nao ke huhuai olai baive ivai vadeula keu. Isege Koniliasiu ata hanaveale kea daiai Saimoni oo kaoai belaevei loi leleisi ulu.
18
Isi toai avoe au Saimoni Bita keu koveo ulu.
19
Kea toisege Bitau meliai au nao ke huhuai usege munana tuvu laviai avoe evi, malaha abutita igalitaea loalea alu niai aa kaoiva.
20
Iale kobelai tai kaie ivei aboili te, dala ke hanaveale vabualive aboili te.
21
Kateai louge Bitau dobai loi lavigei avoe dala kou la da kaoiva iale la vadeuluga da kaoiva.
22
Ige ea loui avoe amea kosi kitae vole Koniliasi la lo hanavege lo lolu. Loi kosive keu atau dua keu DILAVA hoeaseavage Diuia ata bahata kea avolo ola kitaealu isi sisilave ava iale DILAVAu livu au Anelu vole hanavege lo alu lolu eu olale au talivelu koto louge eu ai koto evisi.
23
Ige Bita malaha ke lavigege vavi igalile aboili navalu isito vavita aboili tilu ige Diobae Diuia evievi ata volea aboili tievelu.
24
Tialea kuvau tavae navaito vavita Seselia oe tai daisege Koniliasiu au ata keneni lavigei loi uevisege Bitau velevai lolu.
25
Loi Koniliasi ou anakale loisege Koniliasiu dobai Bitau vudile kome bokoai vata bisi olale hoeaseavai.
26
Ige Bitau laviai avoe kobelai lavi dau DILAVA oli solilu ata ula dalau.
27
Kateai louge Koniliasiu kobelai lavisi avoti nonaito ou uvue tievely ata moeagaea uale keveo.
28
Tige Bitau lavigei avoe laa ivage dau Diu ata ige loi basu keu kosealu Diu ata kea ba Diu ata olie soliale keali ba igali toalivelu bele. Abole vole gogonigei loui koseai kea atau toelaeala kea.
29
Iale la dalu koto hanavage da malomalo solisito loale ke louge da evisi.
30
Kateige Koniliasiu Bita laviai avoe vali ni abutita abutitau uvule da lovi ie solisi guliguliai loisege gutule tili '3' okoloki uvule malaha voleu ogona taete keu loaleu di vavale lavilu.
31
Isi loui avoe Koniliasi DILAVAu ai guliguli evisi a hau dua avale ke DILAVAu ivai a huhualu.
32
Iale ata vole hanavege abo tai Diobae malaha vole ivive Saimoni Bita ke laviai malaha keu malaha vole Saimoni Tena keu ovou vatele hau moeaga avale ata keu oe ulu. Malaha keu oveu davala vavae ulu.
33
Anelu kateai louge da solekata ata hanavege alu tige a loale keu duave iale lo ko nenia kou ai inohole uva. Lo olale DILAVAu vadeu loui a haivuale ke loui lo haive.
34
Ige Bitau ata ke lavigei avoe da ave luleleige DILAVAu huhuige ata ko nenia ata igali ula.
35
Vatau ata olea DILAVA vabuiavai aveve dua age DILAVAule amigalu ata ke agigei.
36
La ivage DILAVAu au kotou dua Diu ata lolai hanavalu kotou dua keu IESU KELISOu ata agigege abo DILAVA luvita uveve dua agigege eu kosiabe kitae olilu.
37
La dibage ata Babatisogevale Dioni keu memila kotou dua loui Galileia ata haivegeto kele kotou bahata Diudea vatae tilu.
38
La dibage IESU keu Nasaleta malaha ige DILAVAu munanau tuu vavui au siauta vavuale kele au oo bahata kele tiale aveve dua ai. Ata hoeaseavei munanau toelau aboele uvale ke nunuveva kosealelu DILAVAu avoti ualelu louive.
39
Iale IESU keu Diudea ta Dielusalema o kitae kele aveve moeaga avale ke loea ivai dibaevelu lo ivage abo vai idu dole kavale keta lo ivalu ige eu voelealu.
40
Ige valiu ni abutita igalitau vesusege mamave DILAVAu isage kobelalu.
41
Kobelai ata bahatae tiesolilu isito DILAVAu lo makagei au haule otoveale ke ulae tai lovi isi ee ilu.
42
Isi lo lavigei avoe taevelivelu ata bahata haivei loui kosea DILAVAu IESU letatavage aule vovovale isi nita uale kea aveveabe kaoai koto loui.
43
Iale memila Beloveta bahata kea IESU aveve kele koto loui avoe olea abo uvu vai IESU Avavuge aule au ivile aveveabe toela ke vesuiavai.
44
Bitau kateai lavigesege munanau tuvu dobai loalea olea kotove eviale kele ulu.
45
Ige Diuia evievi ataeau Bita luvita Diobae loale kea DILAVAu au munanau tuvu vai Diu ata olie soliale ke vaveale ke ivai vikoai tetehamalu.
46
Kea vikoai tetehamale keu kosealu abo evisege ata kea koto ni voletele koto loui DILAVA hoeaseavaeviva.
47
Ige Bitau Diuia evievi ata lavigei avoe ata koea lai munanau tuvu agiale kelate abota munanau tuvu agievelu iale lai ba abo Babatisolu age bavugelivelu bele.
48
Isi lavigege abo IESU KELISOu ivile Babatisoai isi Bita laviai avoe lo olale valivoleo loili ui koto vole lo haive ige lo luleleai.