¹ Manese ali ne myaka yakufyalwa ikumi limo na ibili uluntu atampile ukuteka; atekele amakumi yasano naisano, ne shina lyakwa nyina ni Hefisiba. ² Ena acitile ifyabubi mu mulola wakwa Yahweh, kubati fintu fyakuselausha ifya nko isho Yahweh afumishe mu menso ya bantu bakwa Israeli. ³ Pantu ena alikulile cipya cipya incende sha kusumbuka ishakupepelamo isho Hesekiya wishi aonaiwile, elo alikulile amalambo ya kuba Baali, alishimpile ne fimuti fya Ashera, nge fyo Ahabu imfumu ya bena Israeli yacitile, elo alifukamine ne ntanda sha mu mulu shonse no kufinshishimuna. ⁴ Manase alikulile amalambo mu ng'anda yakwa Yahweh, ne lyofye Yahweh abakonkomeshe ati, ''Nimu Yerusalemu emo ishina lyandi likaba umuyayaya.'' ⁵ Ena aishile kukula intanda shonse isha mu mulu amalambo mu mansa shibili isha ng'anda Yakwa Yahweh. ⁶ Ena aishile kupisha umwana mwaume wakwe mu mulilo, ena alikucita ifinjelengwe ne mbuko no kwipusha kuli abo abalekulanda ne mipashi ya bafwa na kuli abo abalekulanda ne mipashi. Ena aishile kucita ifya bubi ifingi kumulola wakwa Yahweh, ku kusonkomona ubukali bwakwe. ^{7 8} Icimpashanya cakubasa icakwa Ashera ico ena apangile, aishile kucibika mu ng'anda yakwa Yahweh. Cali palwa iyi ng'anda ukuti Yahweh walandile kuli Davidi na kuli Solomoni umwana mwaume wakwe; aishile kulanda ati: ''Ni muli ino ng'anda na mu Yerusalemu, umo nebo na sala ukufuma mu miyindu yonse iya bena Israeli, umo nebo nkabika ishina lyandi umuyayaya. Nebo ntakapishe amakasa ya bena Israeli mukululumba konse ukufuma mu calo ico nebo napele ku fikolwe fyabo, nga cakutila baumfwila fyonse ifyo nebo nabakonkomeshe, no kukonka ifunde lyonse ilyo umubomfi wandi Mose alikubakonkomesha.'' ⁹ Lelo abantu tabalikumfwa, na Manase alikubaleka ukucita imisango ya bubifi ukucilapo pa nko isho Yahweh aonaiwile mu menso ya bena Israeli. ¹⁰ Eico Yahweh walilandile mu babomfi bakwe bakasesema, ukweba ati, ¹¹ ''Pamulandu Manase imfumu yaba Yuda ilicitile ifintu fya kuselausha, no kuficitila mukubifya ukucila bonse abena Amore abo abamutangilileko, elo nakabili alengele Yuda ukubembuka na tu lesa twakwe, ¹² eico Yahweh, Lesa wakwa Israeli, alanda ati: Bona, nebo ndinokuleta ububi ubu pali Yerusalemu na pali Yuda ukuti uyo onse uukomfwa amatwi yakwe yonse ya kawela. ¹³ Nkatambulwila pali Yerusalemu intambo ya kupiminako iyo babomfeshe pali Smaria, ne cakulinganishishako ico balinganishisheko ing'anda yakwa Ahabu; nebo nkawamya Yerusalemu bwino, nge fyo umuntu awamya imbale, aiwamya kunuma no kuikupika panshi. ¹⁴ Nebo nkaposa abashalapo abacikwatwa candi no kubapa mukuboko kwa balwani babo. Bnea bakesakuba abamilandu ne cakutapwa pa balwani babo bonse, ¹⁵ pamulandu balicitile ububi ku mulola wandi elo balisonsombele ubukali bwandi, ukutula ubushiku ifikolwe fyabo fya fumine mu bena Egypto, ukufika na lelo. ¹⁶ Nakucilisha, Manase walisumishe umulopa wabakaele uwingi, mpaka aisusha Yerusalemu nemfwa ukufuma ku kutampa na kukupwa. Ifi fyalundilekofye ku masambi pakulenga Yuda ukubembuka, uluntu bena bacitile ububi kumulola wakwa Yahweh. ¹⁷ Nomba pamilandu imbi iyakwa Manase, nefyo acitile fyonse, ne membu isho acitile, bushe tafyalembwa mu citabo ca fyalekucita pa shamfumu sha bena Yuda? ¹⁸ Manase aishile kulala ne fikolwe fyakwe elo bamushikile mwibala lya pa ng'anda yakwe, mwibala lyakwa Usa. Amoni umwana mwaume wakwe aishile kuba imfumu mwipunda lyakwa wishi. ¹⁹ Amoni ali ne myaka yakufyalwa amakumi yabili ibili uluntu atampile akuteka; ena aishile kuteka imyaka ibili mu Yerusalemu. Ishina lyakwa nyina ni Meshulameta; ali mwana mwanakashi wakwa Herusi uwa mu bena Yotiba. ²⁰ Ena aishile kucita ububi ku cinso cakwa Yahweh, ngefyo Manase wishi acitile. ²¹ Amoni alikonkele inshila shonse isho wishi aendelemo no kushinshimuna utumilungu uto wishi ashinshimwine, no kutufukamina. ²² Ena aishile kusha Yahweh, Lesa wafikolwe fyakwe, elo taendele munshila yakwa Yahweh. ²³ Ababomfi bakwa Amoni balimupangile no kwipaila imfumu mu ng'anda yaiko. ²⁴ Nomba abekala calo balipeye bonse abo abapangile imfumu Amoni, elo bacitile Yosaya umwana mwaume wakwe ukuba imfumu mwi punda lyakwe. ²⁵ Lelo pamilandu iyakumine Amoni iyo ena acitile, bushe tayalembwa mu citabo cafyalikucitika ku mfumu sha bena Yuda? ²⁶ Abantu bali mushikile mu manda yakwe lya limwibala lyakwa Usa, elo Yosaya umwana mwaume wakwe aishile kuba imfumu mwi punda lyakwe.