¹ NaJesu wakapingula, akavereketazve kwavari ngemiyezaniso esiti, ² “Umambo womudhenga hunoezaniswa nomundhu uri mambo, wakaitira mumwana wake dhiri lomuchadho. ³ Naye wakatuma varanda vake kudhaidja avo vakakokwa kumabhiko omuchado, navo avato kudha kuviya. ⁴ Wakatumazve varanda vamweni esiti, ‘Bvunjanhi avo vakakokwa kuti, penhai ndanasirira kudya kwangu; n'ombe djangu nedjakanuna djangu djaulawa, nazvo zvese zvanasirirwa; uyai kudiri lomuchado''. ⁵ Asi avo vakazvirerusa, vakaenda, umwe kumunda wake noumweni kootengesa kake, ⁶ navo vakasala vakabata varanda vake, vakavashononesa, vakavaulaya. ⁷ Naapo mambo azwa izvi wakatseneka, naye wakatuma hondo djake, akavaulaya avo vaurayi, akapisa doroba lavo. ⁸ Naapo wakati kuvaranda vake, ‘Diri lomuchado lanasirirwa, asi avo vakakokwa vainga vasikasisiri. ⁹ Ndizvo endai pamhalalano djogwanja, navo vese vomunozoona, mwechivakoka kuti vauye kudiri lomuchado''. ¹⁰ Naavo varanda vakabhuda, vakaenda mugwanja, vakaunganidja vese avo vevakandoona, vese vakashata nevakanaka; nhumbs yodiri lomuchado yakazala ngovayeni. ¹¹ Asi apo mambo apotera kuninguira vayeni, wakaona dwaiya asikazi kupfeka bachi lomuchado. ¹² Naye wakati kwaari, ‘Hama, waita mapoterenhi muno usina bachi lomuchado?’ Asi yena wakanhalala. ¹³ Naapo mambo wakati kuvaranda vake, ‘Mechimusunga soka nonhala, mechimukandira muchidhima chiri kubherere; kunozoiteyo kubhoorera nokukwetsana kwemazino''. ¹⁴ Ngokuti vazinji vanodhaidjwa, asi vashomani vanozoketwa. ¹⁵ Naapo vaFarisi vakaenda, vakaita bhangano lokuti vamuteye mukuvereketa kake. ¹⁶ Navo vakatumira kwaari vadjidji vavo pamwepo nevaHerodi vesiti, “Mudjidjisi, tinozia kuti yewe uri wegwinhiso, unodjidjisa gwanja laMwari ngegwinhiso, autunumadji mundhu; ngokuti aupenhi hope yomundhu. ¹⁷ Tironzere zvinopano unopinimidjenhi. Ndizvo here kuti tibadare chibalo kunaSiza nokuti tisabadala? ¹⁸ Asi Jesu, echiziva kushata kwavo, wakati, “Munondiyedja ngenhi, yemwi vadjiitisi? ¹⁹ Ndipangidjirenhi mare yomuthelo.” Navo vakaunza kwaari chigurwa chemare chinozwi denariusi. ²⁰ Naye wakati kwavari, “Ngovananhi uwu mutodjaniso nouku kunhorwa? ²¹ Vakati, “NgezvaSiza.” Naapo wakati kwavari, “Ndizvo mwechihina kunaSiza zvaSiza, nokunaMwari izvo zviri zvaMwari''. :22 ²² Naapo vazwa, vakashamiswa, vakamusiya vakaenda. ²³ Ngozuva lelo, vaSadusi avo vanoti akuna kumuka kwevakafa, vakaviya kwaari, vakamubvunja. ²⁴ vesiti, “Mudjidjisi, Mosi wakati, ‘Kuti mundhu akafa, asina vana, munun'una wake unozoloola mukadji wake abherekere mukoma wake vana''. ²⁵ Ndizvo kaivapo nesu vakoma vanomwe; nouwo wokutanga wakaloola, wakafa asina vana, wakasiya mukadji wake kune munukuna wake. ²⁶ Ngokudhalozve newechipiri newechitatu, kumbhera kupedjisira ngowechinomwe. ²⁷ Napakugumisira kwavo vese mukadji wakazofawo. ²⁸ Ndizvo mukumuka kovakafa, unozoita mukadji waani kwavari vanomwe? Ngokuti vese vakamuloola''. ²⁹ Jesu wakapingula, akati kwavari, “Munokangaidjwa ngokusikaziva zvinhorwa nokuti simba laMwari. ³⁰ Ngokuti mukumuka kwavakafa, avalooli, zve avaloorwi, asi vari vakadhai ngengilosi djiri mudhenga. ³¹ Asi ngendaa yokumuka kwevakafa, amuto kutongodjidja here icho chakavereketwa kwamuri ndiMwari esiti, ³² ‘Yeni ndiri Mwari waAbrahama naMwari waIsaka naMwari waJakobe?’ Mwari aasiri Mwari wevakafa akadhi, asi wevanopona''. ³³ Naapo mbungano yazwa izvi, yakashamiswa ngokudjidjisa kwake. ³⁴ Asi apo vaFarisi vazwa kuti wainga anhalarisa vaSadusi, vakaungana pamwepo. ³⁵ Umwe wavo wainga gweta, wakamubvunja mubvunjo, esimuyedja esiti, ³⁶ “Mudjidjisi, ngouri mupango mukuru muMupango?” ³⁷ Jesu wakati kwavari, “Unozomudha Mambo Mwari wako ngomweyo wako wese, ngomweya wako wese nomulangariro yako yese''. ³⁸ Ichi chiri mupango mukuru nowokutanga. ³⁹ Newechipiri wakadhai ngouwu, “Unozomudha muchigarisano chako kudhai ngokudjida yewe. ⁴⁰ Kuneiyi mupango miviri ndipo pasingwisingwi yeMupango yese novaprofiti''. ⁴¹ Zvinopano vaFarisi vaungana, Jesu wakavabvunja; ⁴² esiti, “Munofunguenhi ndiKristu? Mwana waani?” Vakati kwaari, “Mwana waDavhida.''. ⁴³ Wakati kwavari, “Ndizvo ngenhi Davhida, ari muMweya, unomudhaidja kuti Mambo esiti, ⁴⁴ ‘Mambo wakati kunaMambo wangu, gala ngokumurwo kangu, kumbhera ndiite vavengui vako chitambarariro chosoka djako? ⁴⁵ Ndizvo, kuti Davhida akamudhaidja kuti Mambo, zvino uri mwana wake ngokuitawani?” ⁴⁶ Kainga kusina mundhu aikona kumupingula neizwi, zve, kwaiva kusina mundhu kubvira ngezuva iro waishinga kumubvunja mibvunjo.