¹ Pevaka kwedhera pasinde peJerusarema, vaguma Bhethifaje, kuMutunu wemaOrivhi, Jesu wakatuma vairi vevadzidzi vake. ² Wakati kwavari, “Endai kuguta iro remwakaringirana naro, paripo munozoona mbongoro yakasungwa netsiru pamwepo nayo; mwechidzisunhura, mudziunze kwendiri. ³ Kuti aripo unozoereketa chiro kwomuri, munozoti, ‘Mambo unodzitama,’ chiriporipo unozodzitumira''. ⁴ Izvi zvakaitika kuti kuzadzisike izvo zvakaveretwa ngomuprofiti esiti, ⁵ “Ronzerai mwanasikana weZioni. Penya, Mambo wako unouya kwouri, ari wakapfaa, echigadha padera pembongoro nepadera petsiru rechifuyo chemitwaro''. ⁶ Nevadzjidji vakaenda, vakaita kudhai nguezvavakavapanga Jesu. ⁷ Navo vakaunza mbongoro netsiru layo, vakaisa zvokufuka zvavo padenga padjo, vakamugadzika padenga payo. ⁸ Norupande ruzinji lombungano rwakachinga zvokufuka zvavo mugwanja; nevamweni vakatema matai emiti, vakaawara mugwanja. ⁹ Nembungano yaihamba pamberi paJesu, neiyo yaitevera ngosure yakadhaidjira yesiti, “Hosana kuMwana waDavhida! Unomuchena uwo unouya ngozina laMambo! Hosana mudengadenga''. ¹⁰ Naapo Jesu apotera muJerusarema, vedoroba lese vakaita nhongano vesiti, “Ndiani uyu?” ¹¹ Nembungano yakati, “Uyu muprofiti Jesu, unobva Nazaretha reGarire''. ¹² NaJesu wakapotera muTemperi, wakabhudisa avo vese vaitengesa naavo vaitenga muTemperi, naye wakapinduridja matafula eyavo vaitenganisana mare nezvigaro zvaavo vaitengesa njia. ¹³ Wakati kwavari, “Kwakanyorwa kuti, ‘Mhatso yangu inozozwi imhatso yokudira; asi imwimwi mwaiita bako rembavha.''. ¹⁴ Mapofu nezvirema zvakauya kwaari muTemperi, naye wakavaponesa. ¹⁵ Asi apo vaprista vakuru nevanhori vawona izvo zvinoshamisa zvavakaita, nevana vaidaidzira muTemperi vechiti, “Hosana kuMwana waDavhida,” vakatseneswa, ¹⁶ navo vakati kwaari, “Unozwa here icho chevanovereketa ava?” NaJesu wakati kwavari, “Eya. Amuto kutongodjidja here, kuti kubva kumulomo yendumure neyevanoamwa unowashira kukudjwa kwakaperera?” ¹⁷ Naye wakavasiya, akabhuda mudorobha, akaenda Bhethani, naye wakaata apo. ¹⁸ Mangwanani apo esihwirira kudoroba wainga nonjala. ¹⁹ Naapo aona muonde phedho pogwanja, wakaguma kwauri, akaona usina chiro, asi masakani ega, naye wakati kwauri, “Muchero isachazoberekwa kwauri kunoti mhera nariini.” Paripo muonde wakazeketera. ²⁰ Kakati vadjidji vaona, vakashamiswa vesiti, “Muwonde wazeketera ngokukasira ngenhi?” ²¹ Jesu wakapingula, akati kwavari, “Ngegwinhiso ndinoti kwamuri, kudhai munokutenda musikagonondi, amungazoiti chega icho chakaitwa kunemuonde, asi kunyazwi mwechizoti kunouyu mutunhu, ‘Ibva panapa, ukandirwe muruandhle,’ chinozoitika. ²² Nazvo zvese zvomunozokumbirira mumikumbiro ngokugonda, munozozviwashira''. ²³ Naapo Jesu angena muTemperi, vapristi vakuru nevakuru vevandhu vakaviya kwavari wakadjidjisa, vakati, “Ngesimba raani rounoita izvi ndiro? Ndiani wakakupa simbalo?” ²⁴ Jesu wakapingula, akati kwavari, “yeni ndinozomubvunjawo chiro chimwe, kuti mukandironzera, ndinozomuronzerawo kuti isimba raani rendinoita izvi ndiro., ²⁵ Rubhabhatidzo laJohani lakabva kuri? lakabva mudenga here, nokuti lakabva kuvandhu?” Navo vakapangana pakati pavo vesiti, “Kuti tikaronza kuti, ‘lakabva mudenga,’ unozoti kwetiri, ‘Ndizvo amuzikumutenda ngenhi?’ ²⁶ Asi kuti tikaronza kuti, ‘lakabva kuvandhu,’ tinothya vandhu; ngokuti vese vanoti kuti Johani waiva muprofiti''. ²⁷ Navo vakapingula kunaJesu vakati, “Atizii.” Naye wakati kwavari, “Ininiwo andimuronzeri kuti ndinoita izvi ngesimba lani. ²⁸ “Asi munopinimidzenyi? Mundhu waiya nevana vaviri; naye wakaenda kunewokutanga, akati, ‘Mwana, enda nhamasi ushande mumunda wemivhini''. ²⁹ Naye wakapingula, akati, ‘Andidhi’, asi ngesure wakatenderuka, akaenda. ³⁰ Naye wakaenda kunewechipiri, wakavereketa ndizvo ndizvo. Iye wakapingula, akati, ‘Ndinoenda, bhabha’, asi ngesure aato kuenda ³¹ Ndiani pavaviri wakaita kudha kwabhabha wake?” Vakati, “Uwo wokutanga.” Jesu wakati kwavari, “Ngegwinhiso ndinoti kwamuri, vabharisi nemhombo vanomutangira kupotera muumambo hwaMwari. ³² Ngokuti Johani wakauya kwomuri munjira yokururama, nemwi amuzi kumutenda; asi vabharisi nemhombo vakamutenda; nemwi apo mwaona izvo amuzi kutenderuka ngesureni, kuti mugonde kwaari. ³³ “Izwai muyezaniso umweni. Kwaiyapo munewenhumba wakatikuti, wakasima munda wemivhini, wakaushoshera ngerusvingo, wakatsvaka pokukamurira vhini mukati mwawo, naye wakaaka chitumba akauhina kuti ungwarirwe ngevarimi, akaenda kunhika imweni., ³⁴ Naapo nguva yokuibva kwemichero yakwedzera, wakatuma varanda vake kuvarimi avo, kuti vawashire chikoaniswa chake chemichero. ³⁵ Nevarimi avo vakatola varanda vake, vakalimaza umwe, vakaurala umweni, vakafula umweni ngemapuwe. ³⁶ Wakatumazve varanda vamweni vakapinda kuwanda kunevavo vokutanga, navo vakaita kwavari ndizvo ndizvo. ³⁷ Asi pakupedjisira wakatuma kwavari mumwana wake esiti, ‘Vanozoreremekedja mumwana wangu''. ³⁸ Asi apo varimi vaona mumwana uwo, vakati pachavo, ‘Uyu ndiye unogala naka. Uyai ngatimuulaye, titole naka yake''. ³⁹ Navo vakamubhata, vakamubhudisa kubanze kwomunda wemivhini, vakamuurala. ⁴⁰ Ndizvo apo mambo womunda wemivhini ouya, unozoitenhi kuneavo varimi?” ⁴¹ Vakati kwaari, “Unozoulaya vandhu vakashata ngokuulaya kwakashata, naye unozohina munda uwo wemivhini kuvarimi vamweni, avo vanozohina kwaari michero ngemikuwo yayo''. ⁴² Jesu wakati kwavari, “Amuto kuzvidjidja here muzvinhorwa kuti, ‘Bhuwe iro lakarambwa ngevaaki, ndiro lakaitwa soro repakona; ichi chakabva kunaMambo, nacho chinoshamisa mukuona kwedu? ⁴³ Ndizvo ndinoti kwamuri kuti, umambo waMwari hunozobiswa kwamuri, nahwo hunozohinwa kudzinza iro rinobhereka muchero yahwo. ⁴⁴ Naye uwo unozowa padhenga pebhuwe iri, unozoputika; asi iye werinowa padhenga pake, rinozomukuya kuita bhukuta. ⁴⁵ Naapo vapristi vakuru nevaFarisi vazwa miyezaniso yake, vakaziva kuti unovereketa ndivo. ⁴⁶ Naapo vakatsvaka kuti vamubhate, vakathya mbungano ngokuti iyi yaigonda kuti muprofiti.