¹ Ngokuti umambo womudenga hunoyezaniswa nomundhu uri mune wenhumba, uwo wakafumira mangwanani maishi kootola vashandi vomunda wake vemivhini. ² Naapo atenderana nevashandi ngechigurwa chesirivha ngezuva, wakavatuma kumunda wemivhini. ³ Paakabhudhazve panguva yochitatu, akaona vamweni vakaema pandau yomusika, vasikashandi. ⁴ Wakati kwavari, ‘Mesiendawo mumunda wemivhini, neicho chinomusisira ndinozomupa.’ Navo vakaenda. ⁵ Wakabhudhazve looda kuita nguva yechitanhatu nerechipfumbamwe, wakaitazve kudaro. ⁶ Looda kuita awa lochigumi narimwe wakabuda, akaona vamweni vakaema, akati kwavari, ‘Munoema panapa ngenyi zuva rese musina chomunoshanda?’ ⁷ Vakati kwaari, ‘Ngokuti apana munhu watitora.’ Wakati kwavari, ‘Mesiendawo mumunda wemivhini''. ⁸ Pakaita madheekoni mambo womunda wemivhini wakati kunenunge yake, ‘Dhaidja vashandi, uvape misharo yavo, utange ngouwo wokugumisira kumbhera kuguma kunouwo wokutanga''. ⁹ Kwakati vesiviya avo vakatorwa ngeawa lochigumi narimwe vakawashira chigurwa chesirivha. ¹⁰ Kwakati avo vokutanga vooviya vakapinimidza kuti vangatutsirwa; navo ngokudalo vakawashira mundhu wese chigurwa chesirivha. ¹¹ Naapo vawashira, vakavhuruvhutira munewenhumba, ¹² vesiti, ‘Ava vokupedjisira vashanda ava rimwe lega, newe waita kuti vaedzane nayesu, yesu takatwala mutwalo nokupisa kwezuva''. ¹³ Asi yena wakapingula, akati kunoumwe wavo, ‘Shamwari, andito kukuitira chakashata. Auto kutenderana neni here ngechigurwa chesirivha? ¹⁴ Tola icho chiri chako uyende. Ndinodha kumupawo uwu wokupedjisira kudhai ndiwe. ¹⁵ Akutenderwi here kwendiri kuti ndiite icho chendinoda ngezviri zvangu? Nokuti dziso rako raita godo ngokuti inini ndakanaka here?’ ¹⁶ Ndizvo avo vesure vanozoita vepamberi, nevepamberi vanozoita vesure''. ¹⁷ Apo Jesu akwira Jerusarema, wakatola vadjidji gumi navaviri vari vega mugwanja, nayena wakati kwavari/ ¹⁸ “Penhai, tinokwira Jerusarema; noMwabns woMundhu unozopuwa kuvapristi vakuru nevanhori, navo vanozomutongera rufu. ¹⁹ Navo vanozomupira kunevemadzinza kuti aitirwe jee nokuchaiwa nokukohomerwa, ngezuva lochitatu unozomuka''. ²⁰ Apo pakaviya kwaari Jesu mai wevana vaZebedi, pamwepo nevana vake, akagwadhama, esikumbira kwaari chiro. ²¹ Naye wakati kwaari, “Chiinhi chomunodha?” Wakati kwaari, “Ronza kuti ava vana vangu vaviri vagale umwe ngokumudyo kwako noumweni ngokumuoshwe kwako muumambo hwako''. ²² Asi Jesu wakapingula, akati “Amuzivi chomunokumbira. Munokona here kumwa kutsani yendichamwa inini?” Vakati kwaari, “Tinokona''. ²³ Iye wakati kwavari, “Ngegwinhiso munozomwa kutsani yangu; asi kugara ngokumudyo kwangu nokuti ngokumuoshwe kwangu, andikwopi kwangu kuhina, asi ngekwaavo vakakunasirirwa ndiBhabha angu''. ²⁴ Naapo varigumi vazwa, vakatsenekera avo vakoma vaviri. ²⁵ Asi Jesu wakavadhaidja kwaari, akati, “Munoziva kuti vatongui vemadzinza vanotonga padenga pavo, nevakuru vavo vanesimba padenga pavo. ²⁶ Asi akuzodhalopi pakati penyu; asi iye unodha kuti aite mukuru pakati penhu ngavaite mushandiri wenhu. ²⁷ Nouwo unodha kuita wokutanga pakati penhu ngavaite muranda wenhu. ²⁸ Kudhai ngoMwana woMundhu avato kuviya kushandirwa, asi kushandira nokupa upenhu wake kuita muripo wevazhinji''. ²⁹ Avo pavachabhuda kubva muJerikho mbungano huru yakamutevera. ³⁰ wonai kuti, mapofu maviri akagala pagwanja, apo akazwa kuti Jesu waizopindapo, akadhaidzira esiti, “Mambo, Mwan waDavhida, tiitire nhasha''. ³¹ Nembungano yakaakaraidza kuti anhalale. Asi akaphinda kudhaidzisa esiti, “Mambo, Mwana waDavhida, tiitire nhasha''. ³² Saka Jesu wakaema, akavadhaidja, akati, “Munodha kuti ndimuitirenhi?” ³³ Akati kwaari, “Mambo, kuti madjiso edhu apembenudjwe''. ³⁴ Ndizvo Jesu wakavazwira ulombo, akagwama madjiso awo; paripo madjiso awo akapembenudjwa, nawo akamutevera.