¹ Naapo Jesu wakavereketa kumbungano nokuvadjidji vake, ² esiti, “Vanhori nevaFarisi vanogala pachigalo chaMosi. ³ Ndizvo zviro zvese zvevanomupanga, zviitei muzvingwarire; asi musaita kudhai ngemushando yavo; ngokuti vanotera kuvereketa vasikazviiti. ⁴ Ngokuti vanosunga mutwalo inorema, inokonja kutwala nokuiisa pamapfudzi evandhu, asi ivo vositereti avatendi kumirudza chinwe chavo kuvadhetsera kutwala mutwalo iyo. ⁵ Asi mushando yavo yese vanoiita kuti vaoneke ngovandhu; vanosungira zvibokisi zvikuru zvine mavhesi pahuma djavo, vechikurisa mupendero yomaguemenzi avo. ⁶ Vanodha zvigalo zvepamberi mumishongano yokudya nezvigalo zvepamberi mumba djokunamatira, ⁷ nokuchungamidjwa pandau djomusika, nokudhaidjwa ngovandhu kuti ‘Rabi''. ⁸ Asi yemwi musatenda kudhaidjwa kuti ‘Rabi;’ ngokuti umwe uri Mudjidjisi wenhu neimwimwi mese muri hama. ⁹ Musadhaidja mundhu kunhazwi ngouri munhika kuti ‘Bhabha,’ ngokuti umwe uri Bhabha enhu, vari mudhenga. ¹⁰ Zve musadhaidjwa kuti ‘Matenzi,’ ngokuti Tenzi wenhu umwe ndiKristu. ¹¹ Asi mukuru pakati penhu unozoita mushandi wenhu. ¹² Kunhazwi ndiani unozodjikurisa iye unozopfaiswa; nouwo unozodzipfaisa unozokuriswa. ¹³ Asi kwamuri vanori nevaFarisi, vadziitisi! Ngokuti munokonhera umambo womudhenga kuvandhu ngokuti amupoteri yemwi, zve amutenderi avo vanodha kupotera kuti vapotere. ¹⁴ Hokoyo kwamuri vanhori nevaFarisi, vadziitisi, ngokuti munopedja nhumba djoshirikadji, ngokudjiitisa munoita mukumbiro yakarebha, ndizvo munozowashira kutongwa kwakapinda kukura. ¹⁵ “ kwamuri vanhori nevaFarisi, vadziitisi! Ngokuti munowambuka ruandhle nenhika kutsvaka mudjidji umwe, naapo atenderuka, munomuita kakapetwa kaviri kuita mwana weGehena kupinda yemwi. ¹⁶ “kwamuri yemwi vatungamiriri mapofu,munoti, ‘Kunhazwi ndiani unopika ngeTemperi, aanandaa; asi uwo unopika ngomukore womuTemperi, ndiye unendaa yemhiko yake''. ¹⁷ Yemwi mapenji mapofu; ngechiri chakapinda kukula, golidi nokuti Temperi, iro rinochenesa golidi? ¹⁸ Zve munoti, ‘Kunhazwi ndiani unopika nge aritar, nada; asi kunhazwi ndiani unopika ngechipo chiri padenga paro, unendaa'. ¹⁹ Imwimwi mapofu; ngechiri chakapinda kukula, chipo nokuti aritar iro rinochenesa chipo? ²⁰ Ndizvo uwo unopika nge aritar, unopika ndizvo zvese zviri padenga palo. ²¹ Nouwo unopika ngeTemperi, unopika ndilo nouwo unogala mukati malo. ²² Nouwo unopika ngedenga, unopika ngedendemaro laMwari nouwo unogala padenga palo. ²³ womuri vanyori nevaFarisi, vadziitisi! Munohina chimwe chegumi cheminte neanise nokumini, nemwi mareguera kuita zvakakula zveMupango, kutonga kwakwo nenhasha nokugondeka; kwaisisira kuti muzviite izvi, musikasii zvimweni zvisikazi kuitwa. ²⁴ Yemwi vatungamiriri mapofu, munohluza nhunzi mwechitangurira kamera. ²⁵ Pane kwamuri vanhori nevaFarisi, vadziitisi! Ngokuti munosuka kubhanze kwetsani nekwendiro, asi mukati makazala ngokuzala nokudjidha. ²⁶ Yewe muFarisi uri bhofu, suka kutanga mukati momuviri wako kuti pabherere pachenewo. ²⁷ “Pane kwamuri vanhori nevaFarisi, vadziitisi! Ngokuti mwakadhai nguemaibha akacheneswa, awo nguegwinhiso anooneka akanaka ngokubha, asi ngomukati akazala ngemagodho evakafa nezvese zvinetsvina. ²⁸ Ngokudhalo nemwi kubherere munooneka muri vakarurama kunevandhu, asi ngomukati mwakazala ngokudziitisa nokushata. ²⁹ “Pane kwamuri vanhori nevaFarisi, vadziitisi! Ngokuti yemwi munovaka maibha evaprofiti nokunamisa maibha evakarurama. ³⁰ Nemwi munoti, ‘Kudhai taivapo nguemazuva emadjibhabha edhu, tingadhai tisikazi kutenderana navo mukupaladja ngazi yevaprofiti''. ³¹ Ndizvo munodjipupurira kuti yemwi muri vana vavo vakaulaya maprofiti. ³² Zadjisai yemwi chipimo chomadjibhabha enhu. ³³ Yemwi nhoka, yemwi vana vemabhoola, mungaita mapokonhokerenhi kubva mukutongwa nokukandirwa muGehena? ³⁴ Ndosaka,ninguiranhi ndinotuma kwamuri vaprofiti nevakangwala nevanhori; vamweni vavo munozovaulaya nokuvakohomera; nevamweni vavo munozovalova mumbao djenyu djokunamatira nokuvatambudja kubva kudoroba rimwe kuenda kunerimweni, ³⁵ kuti padenga penhu iviye ngazi yese yevakarurama yakapaladjwa munhika, kubvira kungazi yaAberi wakarurama, kumbhera kuguma kungazi yaZekharia, mwana waBarakia, uwo wemwakaulaya pakati peruwanze nearita, ³⁶ Ngegwinhiso ndinoti kwamuri, izvi zvese zvinozoitika kunouwu mubharirwana. ³⁷ Jerusarema, Jerusarema,yewe unoulaya vaprofiti, wechivafula ngomapuwe avo vanotumwa kwauri, kuwandanhi kwemikuwo yendakadha kuunganidja vana vako pamwepo, kudhai ngemhambo inounganidja zvitiyo zvayo pasi pemapapiro ayo, nemwi amutokutenda! ³⁸ Penhai, nhumba yenyu yasiiwa kwamuri iri dhongo., ³⁹ Ngokuti ndinoti kwmuri, amuchatongozondioni kumbhera munozoti, ‘Unomuchena uwo unoviya ngezina laMambo.