¹ zvino apo ishe aziva kuti vaFarisi vaiya vazwa kuti Jesu waiita nokubhabhatidza vadzidzi vakawanda kupinda Johani. ² (kunyazwi Jesu emene aazi kubhabhatidza, asi vadzidzi vake). ³ Wakabva Judhia, akaendazve Garire. ⁴ Waisisira kuti ahambe ngomuSamaria. ⁵ Ndizvo wakaguma muguta revaSamaria rinozwi Sikha, pasinde pomunda uwo waakapa Jakobe kune mwana wake Josefa. ⁶ Chinyuka chaJakobe chaiyapo, ndizvo Jesu aremba ngomuhambo wake, wakagara pashi pabhiri pechinyuka. Rooda kuita awa rechitanhatu., ⁷ Kwakagumapo dzimai reSamaria koochera mvura. Jesu wakati kweriri: “Ndipewo mvura ndimwe.”, ⁸ Ngokuti vadzidzi vake vaiya vaenda muguta kootenga zvokurwa. ⁹ Ndizvo dzimai reSamaria rakati kaari: “Ngenjiranyi kuti iwewe, uri muJudha, ukumbire mvura yokumwa kwendiri inini, dzimai reSamaria?” (Ngokuti vaJudha avaiyani nevaSamaria.) ¹⁰ Jesu wakapingura, akati kweriri: “Kudai waizia iwewe chipo chaMwari, nokuti ndiani uwo unokumbira kwouri kuti, ‘Ndipewo mvura, ndimwe’, iwewe waizokumbira kwaari, naye waizokupa mvura yokupona.” ¹¹ Dzimai rakati kwaari: “Mambo, auna chidziyo chokuchera ndicho, nechinyuka chakadzama. Ndizvo mvura yokupona unoiona pari? ¹² Uri mukuru here iwewe kupinda baba edu Jakobe, uwo wakatipa ichi chinyuka, naye wakamwa kwechiri emene, nevana vake nezvifuyo zvake?” ¹³ Jesu wakapingura akati kweriri, “Kunyazwi ndiani unomwa kuneiyi mvura unozozwazve nyota,, ¹⁴ asi kunyazwi ndiani unomwa mvura yendinozomupa inini, aachazozwizve nyota mhera nariini. Mvura iyo yendinozomupa inozoita chinyuka chemvura mukati make, chechivherukira kupona kusikaperi.” ¹⁵ Dzimai rakati kwaari: “Mambo, ndipe mvurayo, kuti ndisachazozwa nyota nokuti ndisachazouya panozve koochera mvura.”, ¹⁶ Jesu Wakati kweriri: “Enda, woodaidza mwamuna wako, muuye pano.” ¹⁷ Dzimai rakapingura rikati kaari: “Andina mwamuna.” Jesu wakati kweriri: “Wanasa kupingura zvakanaka zvewati: ‘Andina mwamuna;’ ¹⁸ ngokuti waimboiya nevamuna vashanu, nouwo woutori naye aasiri mwamuna wakopi! ngeizvi waereketa gwinyiso." ¹⁹ Dzimai rakati kwaari, “Mambo, ndinoona kuti imwimwi muri muprofeti. ²⁰ Madzibaba edu akadira kuneiri dunhu; nemwi munoti muJerusarema ndiyo ndau inosisira kudiriramwo.” ²¹ Jesu wakati kweriri: “Dzimai, nditende, nguva ichauya apo pemusikachazodiriri Baba kuneiri dunhu kunyazwi muJerusarema. ²² Imwimwi munotenda chomusikazii; isusu tinotenda chetinozia, ngokuti ruponeso runobva kuvaJudha. ²³ Asi awa rinouya, nazvino raapano, apo vadiri vegwinyiso vanozodira Baba muMweya nomugwinyiso, ngokuti Baba vanotsvaka vakadaro kumudira. ²⁴ Mwari ndiMweya, naavo vanomudira vanosisira kuti vamudire muMweya nomugwinyiso.” ²⁵ Dzimai rakati kwaari: “Ndinozia kuti Mesia unouya: (uwo unozwi Kristu). “Naapo oouya, unozotironzera zviro zveshe.” ²⁶ Jesu wakati kweriri:“Inini unoereketa newe ndini ndemene.” ²⁷ Panguvayo vadzidzi vake vakauya. Vakashamiswa ngokuti waiereketa nedzimai, asi apana naumwe wakati kwaari: “Unotsvakenyi?” nokuti, “Unoereketa naro ngenyi?”, ²⁸ Dizvo dzimai rakasiya nhuvi yaro yemvura, rakahwirira kuguta, rikati kuvanhu. ²⁹ “Uyai, muone munhu uwo wandironzera zveshe zvendakaita. Uyu ungaita Kristu here?”. ³⁰ Vakabuda kubva muguta vechiuya kwaari., ³¹ Panguva iyo vadzidzi vake vakamukumbira vechiti:“Rabhi, irwai.” ³² Asi wakati kwavari: “Inini ndinakwo kurwa kwomusikazii imwimwi.” ³³ Ndizvo vadzidzi vakati umwe kunoumweni: “Uripo here munhu wamuunzira chokudya?” ³⁴ Jesu wakati kwavari: “Kurwa kwangu ndikwo kuita kuda kwouwo wakandituma nokupedza mushando wake. ³⁵ Amubui here kuti: ‘Kwasara mwedzi mirongomuna, naapo kukukura kwaguma?’ Ndinomuronzera, mirudzai madziso enyu, muringire muminda, ngokuti yachena zvino yoda kukukurwa. ³⁶ Uwo unokukura unoashira misharo, naye unounganidza michero yokupona kusikaperi, ndizvo uwo unosima naye unokukura vadakare veshe pamwepo. ³⁷ Ngokudaro chisana ichi chineshokwadi chinoti: "‘Umwe unokusha noumweni unokukura.’" ³⁸ Ndakamutuma kuti mukukure izvo zvomusikazi kushanda; vamweni vakashanda yaamho, nemwi mwapotera mumushando wavo.” ³⁹ Vanhu vajinji vemuguta revaSamaria vakamutenda ngendaa yeizwi redzimai, rerakapupura rechiti: “Wandironzera zveshe zvendakaita.”, ⁴⁰ Ndizvo apo vaSamaria vaguma kaari, vakamunyengerera kuti agare navo; naye wakagarapo mazuva mairi. ⁴¹ Nevajinji vamweni vakamutenda ngendaa yeizwi rake. ⁴² Navo vakati kunedzimai: “Zvino tinotenda, haiwa ngendaa yemazwi ako, asi ngokuti tadzizwira temene, nesu tinozia kuti uyu ngegwinyiso ndiye Muponesi wenyika.” ⁴³ Ngesure kwemazuva mairi wakabvapo, akaenda muGarire. ⁴⁴ (Ngokuti Jesu emene wakapupura kuti muprofeti aaremekedzwi munyika yake.) ⁴⁵ Ndizvo apo aguma muGarire, vaGarire vakamuashira, ngokuti veshe vaiya vakaona zveshe zvaakaita muJerusarema padhiri, ngokuti navowo vakaenda kudhiri. ⁴⁶ Ndizvo Jesu wakauyazve muKhana reGarire, apo paakapindudza mvura kuita waini. Kwaiyapo nduna yaiya nomwana wayo wairwara muKhapernaume. ⁴⁷ Naapo nduna iyi yazwa kuti Jesu waiya abva Judhia aguma muGarire, yakaenda kwaari, yakamunyengerera kuti adzake aponese mwana wayo, ngokuti waiya ooda kufa. ⁴⁸ Ndizvo Jesu wakati kweiri: “Kuti musikaoni mioniso nemishamiso amuzotendi. ⁴⁹ Nduna yakati kwaari: “Mambo, dzaka mwana wangu asati afa.” ⁵⁰ Jesu wakati keiri: “Enda; mukororo wako unozopona.” Munhuwo wakagonda izwi rakaereketwa kwaari ndiJesu naye wakaenda. ⁵¹ Naapo achadzaka, varanda vake vakasangana naye, vakamurobuira kuti mwana wake wapona. ⁵² Ndizvo wakabvunza awa iro raakatanga kuitanane ndiro, navo vakati kwaari: “Zuro ngeawa rechinomwe mutsarara wakamusiya.” ⁵³ Ndizvo baba akazia kuti ndiro awa raakaereketa Jesu kwaari kuti: “Mukororo wako unozopona.” Naye pachake wakatenda nevemhatso yake yeshe. ⁵⁴ Uyu ndiwo muoniso wechipiri waakaita Jesu, abva Judhia apo aguma Garire.