¹ Sure kweizvi kwaiyapo dhiri revaJudha, naJesu wakakwira Jerusarema. ² Zvino riripo muJerusarema gandwa ngepamusiwo wemakwai, unodaidzwa ngechiHebheru kuti Bhethisaidha, rinemaberere mashanu. ³ Mukati mwawo mwaiata vazhinji vairwara, vaiya mapofu nezvirema, nevakaputa, vechigarira kuvhundurwa kwemvura. ⁴ Ngokuti ngomukuwo wakatikuti, ngirosi yaidzaka mugandwa nokuvhundura mvura. Ndizvo kunyazwi ndiani waitanga kupoteramwo apo mvura yavhundurwa waiponeswa kunyazwi waiya nenhenda yakaitawani. ^{5 6} Kwaiyapo munhu umwe waiya nenhenda yake makore makumi matatu namasere. 6Naapo Jesu amuona akaata, wakazia kuti waiya aripo kwomukuwo wakareba, wakati kwaari: “Unoda kuponeswa here?” ⁷ Munhu wairwara wakapingura kwaari echiti: “Mambo, andina munhu wokundidzasa mugandwa apo mvura yoovhundurwa. Asi mukuenda kwangu, umweni unodzaka kunditangira.” ⁸ Jesu wakati kwaari: “Miruka, utore manhi ako uhambe.” ⁹ Paripo munhuwo wakaponeswa, wakatora manhi ake akahamba. Ngezuva iro raiya Sabatha ¹⁰ Ndizvo vaJudha vakati kwaari uwo wakaponeswa: “Isabatha, autenderwi kuti utware manhi ako.” ¹¹ Asi wakavapingura kuti: “Uwo wakaita kuti ndiponeswe ndiye wakati kwendiri: ‘Tora manhi ako, uhambe.’ ” ¹² Wakamubvunza vechiti: “Ndiani munhu uwo wakati kwouri: ‘Tora manhi ako, uhambe?’ ” ¹³ Asi uwo wakaponeswa aazi kuzia kuti ndiani, ngokuti Jesu waiya angarangaka mumbungano huru yaiyapo pandau iyo ¹⁴ Ngesure kweizvi, Jesu wakamuona ari muTemperi, naye wakati kwaari: “Ringira, wakaponeswa! Usachashaishazve, kuti chiro chakapinda kushata kuneicho chisazokugumira.” ¹⁵ Munhu akaenda, akaronzera vaJudha kuti ndiJesu wakamuponesa. ¹⁶ Ngendaa iyi vaJudha vaitambudza Jesu, ngokuti wakaita izvi ngeSabatha. ¹⁷ Asi Jesu wakavapingura echiti: “Baba angu vanondoshanda wanoshanda nazvino, neni ndinoshanda.” ¹⁸ Ndizvo ngendaa iyi vaJudha vakapindisisa kutsvaka kumuuraya, ngokuti iye aazi kugura Sabatha kwega, asi wakaronzazve kuti Mwari waiya Baba ake vemene, echidziita pachake unoedzana naMwari. ¹⁹ Ndizvo Jesu wakapingura, akati kwavari: “Ngegwinyiso ndinoti kwomuri, Mwana akoni kuita chiro ngokwake, asi icho chega chaanoona Baba vechiita; ngokuti kunyazwi ngechiri chaanoita Baba, Mwana unoitawo ngokudaro. ²⁰ Ngokuti Baba vanomuda Mwana, vanomupangidzira zveshe zvavanoita vemene; vanozomupangidzira mishando mikuru inopinda iyi, kuti mushamiswe. ²¹ Ngokuti kudai ndiBaba vanomusa avo vakafa nokuvapa kupona, ngokudarozve Mwana unopa kupona kuneavo vaanoda. ²² Ngokuti Baba avatongi munhu naumwe, asi vakapa kutonga kweshe kuno Mwana, ²³ kuti veshe varemeredze Mwana, kudai ngezvevanoremeredza Baba. Uwo usikaremeredzi Mwana aremeredzi Baba uwo wakamutuma. ²⁴ Ngegwinyiso ndinoti kwomuri, uwo unozwa izwi rangu, atende uwo wakandituma, waanakwo kupona kusikaperi; aachapindi mukutongwa, asi wadarika kubva mukufa kupotera mukupona. ²⁵ “Ngegwinyiso ndinoti kwomuri, awa rinouya, nazvino raapano, apo vakafa vanozorizwa izwi roMukororo waMwari, naavo vanozorizwa vanozopona. ²⁶ Ngokuti kudai ndiBaba unokupona mukati mwake, ndizvo wakapawo Mukororo kuti aanokupona mukati mwake, ²⁷ naye wakamupa simba rokutonga ndaa, ngokuti iye Mukororo woMunhu. ²⁸ Musashama ngeichi; ngokuti awa rinozouya apo veshe vari mumaiba vanozorizwa izwi rake: ²⁹ navo vanozobudamwo, avo vakaita zvakanaka mukumuka kwokupona, naavo vakaita zvakashata mukumuka kwokutongwa. ³⁰ “Inini andikoni kuita chiro ngesimba rangu. Kudai ngezvendinozwa, ndinotonga; nokutonga kwangu kwakarurama, ngokuti anditsvaki kuda kwangu asi kuda kwouwo wakandituma. ³¹ Kudai inini ndechidzipupurira pachangu, chapupu changu achina gwinyiso. ³² Uripo umwe unoita chapupu ndini, neni ndinozia kuti chapupu chaanopupura ndini chinegwinyiso. ³³ Iye waiya chibani chinobaka chinojekisa, nemwi mwakatenda kuti mudakare kwenguva doko mukujeka kwake., ³⁴ Inini andiashiri chapupu chinobva kumunhu, asi ndinoronza izvi kuti imwimwi muponeswe. ³⁵ Imwimwi mwakatuma kunaJohani, naye wakapupurira gwinyiso. ³⁶ Asi inini ndinechapupu chinopinda kugwinya kunechaJohani; ngokuti mishando iyo yaakandipa Baba kuti ndiipedze, uyo muchando wendinoita, inopupura ndini kuti Baba vakandituma. ³⁷ NaBaba uwo wakandituma wakaita chapupu pachake ndini. Amuzi kumbozwa izwi rake nakamwe nokuti kumboona muemo wake, ³⁸ nemwi amuna izwi rake rinogara mukati mwenyu, ngokuti imwimwi amuzi kutenda uwo waakatuma. ³⁹ Munotsvakisisa zvinyorwa, ngokuti imwimwi munopinikidza kuti mukati mwazvo munokupona kusikaperi; neizvo ndizvo zvinopupurua ndini. ⁴⁰ Asi nemwi amutendi kuuya kwendiri kuti muone kupona. ⁴¹ Andiashiri kukudzwa kunobva kuvanhu. ⁴² Asi ndinomuzia kuti amuna rudo rwaMwari mukati mwenyu., ⁴³ Inini ndakauya ngezina raBaba angu, nemwi amuzi kundiashira; kudai umweni echizouya ngezina rake remene, uwo munozomuashira. ⁴⁴ Mungaita matenderenyi, imwimwi munoashira kuirikidzwa kubva kuno umwe nokuno umweni, musikatsvaki kukudzwa ukwo kunobva kunaMwari ega? ⁴⁵ Musapinimidza kuti inini ndinozomuitira ndaa kunaBaba; ndiMosi unomuitira ndaa, uwo wemwakagonda imwimwi. ⁴⁶ Ngokuti dai mwakatenda Mosi, mwaizodai mwakatendawo inini, ngokuti wakanyora ngendaa yangu. ⁴⁷ Asi kuti musikatendi zvakanyorwa zvake, mungazoita matenderenyi mazwi angu?”