¹ Zvino painga munhu wevaFarisi, zita rake ndiNikodhemusi, mutongi wevaJudha. ² Uyu munhu wakaenda kunaJesu usiku wakati kaari: “Rabhi, tinozia kuti iwewe uri mudzidzisi wakabva kunaMwari; ngokuti akuna naumwe ungakona kuita iyi mioniso younoita, kwega kuti Mwari arinaye.” ³ Jesu wakapingura, akati kaari: “Ngeshokwadi ndinoti kwouri, kudai munhu asabarwa ngokwomudenga, aakoni kuona umambo hwaMwari.” ⁴ Nikodhemusi wakati kwaari, “Munhu ungaita mabarirwenyizve apo aamusharuka? Ungakona here kuti apotere ngokwechipiri mundani yamai ake, abarwezve?”, ⁵ Jesu wakapingura echiti, “Nge chokwadi, chokwadi, ndinoti kouri: kuti munhu asabarwa ngemvura noMweya, aangakoni kupotera muumambo waMwari. ⁶ Uyana unobarwa nge nyama inyama, unobarwa nge Mweya mweya. ⁷ Usa shamaswa ngokuti ndati kwouri: ‘Kunosisira kuti ubarwezve. ⁸ Mututu unovhuvhuta peunoda, newe unozwa chaungira charo, asi auzii perinobva neperinoenda. Zvakadaro kavari veshe vanobarwa ngomuMweya.” ⁹ Nikodhemusi wakapingura, akati kwaari: “Izvi zvingaita maitikirenyi?” ¹⁰ Jesu wakapingura akati kwaari: “Iwewe uri mudzidzisi waIsuraeri, auzwisisi izvi here?, ¹¹ Nge chokwadi ndinoti kouri, tinoreketa chetinozia, nesu tinopupura ngeicho chetakaona; nemwi amuashiri uchapupu hwedu. ¹² Kuna ndamureketera zviro zvemunyika nemwi amuzi kuzvitenda, hino munozoita matenderenyi kudai ndechimubuira ngezviro zvomudenga? ¹³ Akuna naumwe wakambokwira mudenga, asi uwo wakadzaka kubva mudenga, Mwana wakadzuka. ¹⁴ Kudai ndiMosi wakamurudza nyoka mushango, ngokudaro kunosisira kuti Mwana woMunhu amurudzwe, ¹⁵ kuti kunyazwi ndiani unomutenda aone kupona kusikaperi.” ¹⁶ Ngokuti Mwari wakaida nyika kudai, wakayipa Mwana wake wakabarwa ari ega, kuti veshe vanomutenda vasafa asi vaone kupona kusikaperi. ¹⁷ Ngokuti Mwari aazi kutuma Mwana wake munyika kuti atonge nyika, asi kuti nyika iponeswe kubudikidza ndiye. ¹⁸ Uwo unotenda kaari aatongwi; asi uwo usikatendi watotongwa nazvino, ngokuti aazi kutenda zita rouwo wakabarwa ari ega Mwana waMwari. ¹⁹ Uku ndikwo kutongwa: kuti kujeka kakaguma munyika, nevanhu vakada chidima kakurutu kupinda kujeka, ngokuti mushando yavo yaiya yakashata. ²⁰ Ngokuti weshe unoita zvakashata unozonda kujeka naye aauyi mukujeka, ngokuti mushando yake inozooneka pamhene. ²¹ Asi uwo unoita zvinegwinyiso unouya mukujeka, kuti mushando yake inase kuoneka kuti yakaitwa munaMwari. ²² Ngesure kweizvi, Jesu nevadzidzi vake vakaenda munyika yeJudhia; naye wakagaramo navo echibhabhatidza. ²³ NaJohani waibhabhatidza muAenoni paduze peSarimu, ngokuti yaiapo mvura yakawanda; vanhu vakauya vakabhabhatidzwa. ²⁴ Ngokuti Johani waiya asati aiswa mutirongo. ²⁵ Zvino kwakaapo kuphikisana pakati pevadzidzi vaJohani nomuJudha ngendaa yokucheneswa. ²⁶ Navo vakauya kunaJohani, vakati kwaari:“Rabhi, uwo waiya newe seri kweJorodhani, uwo wowakaita chapupu ndiye, uyu uri pano, unobhabhatidza, navo veshe vanoenda kwaari.” ²⁷ Johani wakapingura, akati: “Munhu aakoni kuashira chiro kunyazwi ngechiri kuti asikazi kuchipuwa kubva mudenga. ²⁸ Imwimwi mwemene mwakaita chapupu ndini kuti ndakati, ‘Inini andiriyepi Kristu, asi ndakatumwa pamberi pake.’, ²⁹ Uwo una nyamuroorwa ngewe muroora; asi shamwari yomuroora, iyo inoema yechimuzwa, inodakara ngendaa yeizwi renyamuroora; ndizvo uku kudakara kwangu kwazadkisika. ³⁰ Zvishafanira kuti iye akuriswe, asi inini ndinofanira kuti nditsonge.” ³¹ Uwo unouya echibva mudenga uri padera pazvo zveshe; uwo unobva munyika ngowenyika, naye unoereketa zvomunyika. Uwo unobva mudenga uri padera pazvo zveshe. ³² Naye unopupura ngeizvo zvaakaona nezvaakazwa, asi akuna munhu unoashira chapupu chake. ³³ Uwo unotenda zvanobuya, wakagwinyisa kuti Mwari igwinyiso. ³⁴ Ngokuti uwo waatuma Mwari unoereketa mazwi aMwari, ngokuti iye aapi kwaari Mweya ngechipimo. ³⁵ Baba vanoda Mukororo, navo vakapa zviro zveshe munyara dzake. ³⁶ Uwo unotenda Mwana waane kupona kusikaperi; nouwo usikatendi Mwana aazooni kupona, asi ushungu waMwari hunozogara padera pake.