¹ Zvino Piratu wakatora Jesu, akamuchaya. ² Nemasoja akaruka dzungudza reminzwa, akariisa padera pesoro rake, akamupfekesa gauni rakatsvukuruka. ³ Akauya kwaari echiti: “Mwauya, mambo wevaJudha!” Nawo aimuchaya ngenyara dzawo. ⁴ Naapo vapristi vakuru nevarindi vamuona, vakazhambarara vechiti: “Mukohomere, mukohomere!” Piratu wakati kwavari: “Mutorenyi imwimwi mumukohomere, ngokuti andioni ndaa kwaari.” ⁵ NaPiratu wakabudazve, akati kwavari: “Ningirai, ndinomubudisa kwomuri, kuti muzie kuti andioni ndaa kwaari. ⁶ Ndizvo Jesu wakabuda, akapfekeswa dzungudza reminzwa negauni rakatsvukuruka. Piratu wakati kwavari, “Ringirai uyu munhu!”. ⁷ VaJudha vakamupingura, vakati: “Tinechironzo, ngendaa yechironzo icho unosisira kuti afe, ngokuti iye wakadziita Mwana waMwari.” ⁸ Naapo Piratu azwa mazwi aya, wakapinda kutya. ⁹ wakapinda mumhatso yokutongera, akati kunaJesu: “Unombobva pari?” Asi Jesu aazi kumupingura. ¹⁰ Ndizvo Piratu wakati kwaari: “Aundipinguri here? Auzii here kuti ndinesimba rokukusunhura, neni ndine simba rokukukohomera?”. ¹¹ Jesu wakamupingura, akati: “Aungakoni kuanesimba padera pangu kuti usikazi kuripuwa rechibva mudenga; ndizvo uwo wakandipira kwouri unokushaisha kwakapinda kukura.” ¹² Naapo Piratu wakatsvaka kumusunhura, asi vaJudha vakazhambarara vechiti: “Kuti ukasunhura munhu uyu, auri shamwari yaSiza akadi. Kunyazwi ndiani unodziita mambo unoereketa kumukira Siza.” ¹³ Naapo Piratu azwa aya mazwi, wakabudisa Jesu kubanze, wakagara pachigaro chokutongera ndaa, pandau inozwi Yakagangatwa Mapuwe, asi ngokwechiHebheru inozwi Gabatha. ¹⁴ Zvino raiya zuva rokunasirira Phasika, rooda kuita awa rechitanhatu. Wakati kuvaJudha, “Ringirai mambo wenyu. ¹⁵ Ndizvo vakazhambarara vechiti, “Mudusenyi, mudusenyi, mukohomere!” Piratu wakati kwavari, “Ndokohomera mambo wenyu here?” Vapristi vakuru vakapingura vechiti, “Isusu atina mambo asi Siza.” ¹⁶ Ndizvo wakamupira kwavari kuti akohomerwe. Ndizvo vakatora Jesu. ¹⁷ Naye wakabuda echitwara muchinjiko kuenda kundau inozwi Denhenya, iyo inodaidzwa ngokwechiHebheru kuti, Gorogotha. ¹⁸ Apo ndipo pevakamukohomera, pamwepo nevairi vamwe, umwe ngeino noumweni ngeiyo, naJesu ngepakati. ¹⁹ Piratu wakanyorazve chinyorwa, akachiisa padera pomuchinjiko. Uku ndikwo kunyorwa kwacho: “JESU WENAZARETA, MAMBO WEVAJUDHA.” ²⁰ VaJudha vazhinji vakadzidza ichi chinyorwa, ngokuti ndau iyo yaakakohomerwa Jesu yaiya pasinde pedhorobha; nacho chaiya chakanyorwa ngechiHebheru nechiRoma nechiGiriki. ²¹ Ndizvo vapristi vakuru vevaJudha vakati kunaPiratu, “Usanyora kuti, ‘Mambo wevaJudha,’ asi kuti, ‘Iye wakati, ndiri mambo wevaJudha.’ ²² piraatu wakapingura akati: “Chendanyora, ndanyora.” ²³ Naapo masoja aiya akohomera Jesu, akatora zvokufuka zvake, akazvipaura kuita mirwi mirongomuna, soja rimwe ngarimwe murwi waro. Vakatorazve gauni rake; asi gauni rake nehanzu yake raiya risina musono, asi rakarukwa kubvira ngedera kwaro metsa kubani kwaro. ²⁴ Ndizvo vakaronzerana pakati pavo vechiti: “Tisaribaura, asi ngatiite mabhigidha, tione kuti ngerani;” kuti chinyorwa chizadzisike chinoti: “Vakakoanisirana zvokufuka zvangu pakati pavo, negauni rangu rakaitirwa mabhigidha.” Ndizvo masoja akaita izvi., ²⁵ Asi kwaiya kwakaemapo pasinde pomuchinjiko waJesu mai ake, nahurwani amai ake, Maria mukadzi waKropasi, naMaria Magadhareni. ²⁶ Naapo Jesu aona mai ake nomudzidzi uwo waaida vechiema pasindepo, wakati kunamai ake: “Dzimai, wona mukororo wako!” ²⁷ Zvino wakati kunamudzidzi uwo: “Wona mai ako!” Kubvira ngeawa iro mudzidzi uwo wakavatora kuti vagare kanyi kwake. ²⁸ Ngesure kweizvi Jesu, echizia kuti zviro zveshe zvaiya zvaperera, kuti chinyorwa chizadzisike, wakati: “Ndapera ngenyota.” ²⁹ Paiya nechidziyo chakazara ngevhini rairungura; ndizvo vakaisa siponji chakazara ngevhini rairungura pachimuti chehisopi, vakachiisa pamuromo wake. ³⁰ Naapo Jesu aashira vhini rairungura, wakati: “Zvapera.” Wakakotamisa soro rake naye wakapa mweya wake. ³¹ Zvino raiya zuva rokunasirira Phasika. VaJudha vakakumbira Piratu kuti mirenje yavo igurwe, vaduswepo kuti miiri isagara pamuchinjiko ngezuva reSabatha, ngokuti Sabatha iro raiya zuva guru. ³² Ndizvo majoni akauya, akagura mirenje yowokutanga neyoumweni, avo vakakohomerwa naye. ³³ Asi apo vaguma panaJesu, vakaona kuti waiya afa, avazi kugura mirenje yake. ³⁴ Asi umwe wemajoni wakabaya parutii pake ngomukhondo, paripo pakabuda ngazi nemvura. ³⁵ Nouwo wakazviona wakaita chapupu, nechapupu chake chine gwinyiso, naye unozia kuti unoereketa gwinyiso, kuti nemwiwo mutende. ³⁶ Ngokuti izvi zvakaitika kuti chinyorwa chizadzisike chinoti, “Akuna godo rake narimwe rinozogurwa.” ³⁷ Nechinyorwa chimwenizve chinoti, “Vanozomuringira uwo wevakabaya.” ³⁸ Ngesure kweizvi, Josefa weArimathia, uwo waiya mudzidzi waJesu, asi ngokufishika ngokutya vaJudha, wakakumbira Piratu kuti aduse muiri waJesu naPiratu wakamutendera. Ndizvo wakauya, akadusa muiri wake. Nikodhemusiwo wakauya, uwo wakauya kwaari ³⁹ pakutanga usiku, echiunza mutombo wakaita mvemve wemhura nowemuaro, wairema kuda kuguma makhirogiramu makumi matatu. ⁴⁰ Ndizvo vakatora muiri waJesu, vakauputira ngejira rakachena pamwepo nomutombo wemakha unonuhwira, kudai ngomutoo wevaJudha wokuika. ⁴¹ Zvino kwaiyapo munda pandau iyo yaakakohomerwa, nomumunda uwo mwaiya neiba idzva risikazi kumboikwamwo munhu. ⁴² Ndizvo vakaikamwo Jesu, ngokuti raiya zuva rokunasirira revaJudha, ngokuti iba iro raiya pasindepo.