¹ Naapo Jesu areketa mazwi aya, wakabuda nevadzidzi vake, vakaambuka ruseri rwebani reKedhironi, apo paiya nomunda, wakapotera mukati mwawo nevadzidzi vake. ² Zvino Judhasi, uwo wakamupira, waizia ngendau iyo, ngokuti Jesu waishonganamwo kazhinji nevadzidzi vake. ³ Ndizvo Judhasi wakatora chikwata chemasoja nevarindi vamweni vaibva kuvapristi vakuru nevaFarisi, vakaendapo vanezvibani nemasasi nezvokurwa ndizvo. ⁴ Zvino Jesu, echizia zveshe zvaizomugumira, wakabuda kwavari, akati, “Munotsvaka anani?”, ⁵ Vakamupingura, vakati, “Jesu weNazaretha.” Wakati kwavari: “Ndini.” Judhasi, uwo wakamupira, waiya akaema navo. ⁶ Naapo avaronzera kuti, “Ndini,” vakaita fundamutete, vakawa pashi. ⁷ Ndizvo wakavabvunzazve, akati, “Munotsvaka anani?” Navo vakati: “Jesu weNazaretha.” ⁸ Jesu wakavapingura, akati: “Ndamubuira kuti ndini. Ndizvo, kuti mwechitsvaka inini, rekerai vanhu ava vaende.” ⁹ Izvi kwaiya kuzadzisika kweizwi, iro raakareketa rinoti: “Avo vomwakandipa andizi kurashikirwa naumwe wavo.” ¹⁰ Zvino Simoni Petro waiya aneshoti, wakaishwamura, akatema hloko yomupristi mukuru, akagura nzee yake yokumudyo. Zina rehloko iyo uwo raiya Marikusi. ¹¹ Ndizvo Jesu wakati kunaPetro: “Hwirinza shoti yako mumakara ayo! Tsani yaakandipa Baba andizoimwi here?”, ¹² Ndizvo chikwata chemajoni nenduna nevarindi vevaJudha vakabata Jesu, vakamusunga. ¹³ Navo vakamubuira kutanga kunaAnasi, ngokuti waiya muzvere waKaiafasi, uwo waiya mupristi mukuru ngegorero., ¹⁴ Ndiye Kaiafasi uwo wakanyowedza vaJudha kuti kwaidikanwa kuti munhu umwe afire vanhu., ¹⁵ Simoni Petro wakateera Jesu, nomudzidzi umweni. Zvino uwo mudzidzi waiziikanwa kumupristi mukuru, wakapotera naJesu muruwanze rwomupristi mukuru, ¹⁶ Asi Petro akaema pamusiwo kubanze. Ndizvo mudzidzi umweni, uwo waiziikanwa kumupristi mukuru, wakabuda pabanze, akaereketa kunouwo waingwarira musiwo, akapotedza Petro. ¹⁷ Ndizvo musikana uwo waingwarira musiwo wakati kunaPetro, “Newe auri umwe here wevadzidzi vouyu munhu?” Iye wakati, “Andinipi.” ¹⁸ Zvino varanda nevarindi vakabasira muriro wamasimbe, ngokuti kwaiya nechando, navo vaiya vakaema vechigota muriro pachavo. NaPetro wakaemawo navo, echigota pachake. ¹⁹ Ndizvo mupristi mukuru wakabvunza Jesu ngendaa yevadzidzi vake nokudzidzisa kwake. ²⁰ Jesu wakamupingura, akati: “Inini ndakareketa pamhene kuvanhu venyika; nguva dzeshe ndakadzidzisa mumhatso dzokudira nomuTemperi, apo paiungana veshe vaJudha. Andizi kureketa chiro ngokufishika. ²¹ Unondibvunzirenyi? Bvunza avo vakazwa zvendakaereketa kwavari; vanozia zvendakaereketa inini. ²² Naapo aiya aereketa izvi, umwe wevarindi vaiya vakaema apo wakamakaya Jesu ngepama echiti, “Unopingura mupristi mukuru kudaro here?” ²³ Jesu wakamupingura echiti: “Kudai ndareketa zvakashata, pupura ngezvakashata. Asi kudai ndareketa zvakanaka, unondimamisirei?” ²⁴ Ndizvo Anasi wakamutumira akasungwa kunaKaiafasi mupristi mukuru. ²⁵ Zvino Simoni Petro wakaema echigota muriro. Ndizvo vakati kwaari: “Newe auri umwe here wevadzidzi vake?” Iye wakavapingura, akati: “Inini andisiri umwe wavo.” ²⁶ Umwe wevaranda vomupristi mukuru, waiya hama youwo waakatema nzee Petro, wakati: “Andizi kukuona unaye mumunda here?” ²⁷ Ndizvo Petro wakarambazve; paripo jongwe rakarira., ²⁸ Ndizvo vakakweya Jesu kubva kunaKaiafasi vechienda naye kumhatso yokutongera. Kwaiya achimangwanani. Ivo vemene avazi kupotera mumhatso yokutongera, kuti vasazosvipiswa, asi kuti vadye Phasika. ²⁹ Ndizvo Piratu wakabuda kwavari, akati, “Indaa yenyi yomunoitira uyu munhu?” ³⁰ Vakapingura, vakati kwaari, “Kudai uyu munhu asiri muiti wezvakashata, taidai tisikazi kumupira kwouri.”, ³¹ Ndizvo Piratu wakati kwavari: “Mutorenyi imwimwi pachenyu mumutonge kudai ngemipango yenyu.” VaJudha vakati kwaari: “Akutenderwi kuti isusu tiuraye munhu nokuti ngouri.” ³² Uku kwaiya kuti rizadzisike izwi iro raakareketa Jesu echionisa kuti injiranyi yaaizofa ndiyo. ³³ Ndizvo Piratu akapindazve mumhatso yokutongera, adaidza Jesu, akati kwaari: “Iwewe uri mambo wavaJudha here?”. ³⁴ Jesu wakapingura echiti, “Unoereketa izvi pachako here nokuti wazvibuirwa ngevamweni ngendaa yangu?” ³⁵ Piratu wakapingura, akati: “Inini ndiri muJudha here? Dzinza rako nevapristi vakuru vakakupira kwendiri. Chiinyi chowakamboita?”, ^{36 37} Jesu wakapingura, akati: “Umambo hwangu angohwomunyika muno akadi. Kudai umambo hwangu hwaiya hwomunyika muno, varanda vangu vangadai vakandirwira, kuti ndisapirwa kuvaJudha. Asi zvino umambo hwangu auhuri hwomuno akadi.” 37Ndizvo Piratu wakati kwaari: “Ndizvo uri mambo here?” Jesu wakapingura akati: “Iwewe unorobuya kuti ndiri mambo. Ngeiyi ndaa ndakabarwa, ngeiyi ndaa ndakauya munyika, kuti ndipupurire gwinyiso. Kunyazwi ndiani uri wegwinyiso unozwa izwi rangu.”, ³⁸ Piratu wakati kwaari: “Gwinyiso chiinyi?” Aereketa izvi, wakabudazve kuvaJudha, akati kwavari, “Andioni ndaa kwaari. ³⁹ Asi imwimwi muno mutoo wokuti ndisunhure umwe kwomuri ngePhasika. Ndizvo munoda here kuti ndisunhure kwomuri mambo wevaJudha?” ⁴⁰ Ndizvo vakazhambararazve vechiti: “Haiwa uyu munhu, asi Bharabhasi!” Zvino Bharabhasi waiya dzongoni.