¹ Zvino ngezuva rokutanga revhiki, Maria Magadhareni wakaenda kuiba mangwanani kuchakasvipa, wakaona buwe rakamburumbudzwa kubva paiba. ² Ndizvo wakarumba, akaenda kunaSimoni Petro nokunomudzidzi umweni, uwo waaida Jesu, akati kwavari: “Vakadusa Mambo kubva muiba, nesu atizii pevakamuradzika.” ³ Ndizvo Petro wakabuda noumweni mudzidzi vakaenda kuiba. ⁴ Zvino vakarumba vari pamwepo, asi mudzidzi umweniwo wakarumba akapindira Petro, naye wakatanga kuguma paiba. ⁵ Akakotama pashi, akaringira mukati, akaona machira akachena akaradzikwamwo, asi aazi kupindamwo. ⁶ Ndizvo Simoni Petro wakagumawo, echimuteera, wakapotera muiba. Akaona machira akachena akaradzikwa, ⁷ nedhuku iro raiya rakasungwa musoro mwake, risikazi kuradzikwa pamwepo nemachira akachena, asi raiya rakapetwa riri rega pandau imweni. ⁸ Ndizvo mudzidzi umweni, uwo wakatanga kuguma paiba, wakapoterawo akaona, akatenda. ⁹ ngokuti vaiya vasati vazwisisa chinyorwa chinoti unosisira kuti amuke kubva kwevakafa. ¹⁰ Ndizvo vadzidzi avo vakaenda kanyi kwavo. ¹¹ Asi Maria wakaema kubanze kweiba echichema. Achachema wakakotama, akaringira muiba, ¹² naye wakaona ngirosi mbiri dzakafuka zvakachena, dzakagara imwe ngokusoro neimweni ngokutsoka, apo powaiya wakaradzikwa muiri waJesu. ¹³ Nadzo dzakati kwaari: “Dzimai, unochemenyi?” Wakati kwedziri: “Ngokuti vakadusa Mambo wangu, neni andizii pevakamuradzika.” ¹⁴ Apo areketa izvi, wakakunukukira sure, akaona Jesu akaema, asi aazi kuzia kuti ndiJesu. ¹⁵ Jesu wakati kwaari: “Dzimai, unochemenyi? Unotsvaka anani?” Aye, echipinimidza kuti waiya murimi, wakati kwaari: “Mambo, kudai wakamudusa kubva pano, ndironzere powakamuradzika, neni ndimutore.” ¹⁶ Jesu wakati kwaari: “Maria!” Wakakunukuka, akati kwaari ngechiHebheru: “Rabhoni!” (Ndiwo kuti: Mudzidzisi). ¹⁷ Jesu wakati kwaari: “Usandibata, ngokuti andisati ndakwira kuna Baba. Asi enda kunevanun'una vangu, wooti kwavari, ‘Ndinokwira kuna Baba angu naBaba enyu, nokunaMwari wangu naMwari wenyu.’" ¹⁸ Maria Magadhareni wakauya, akaronzera vadzidzi kuti: “Ndaona Mambo,” nokuti wakaereketa izvi kwaari. ¹⁹ Zvino madeekoni ezuvaro rokutanga revhiki, misiwo yakakonywa umwo mwaiya nevadzidzi ngendaa yokutya vaJudha, Jesu wakauya, akaema pakati pavo, akati kwavari: “Kunyarara ngakugare kwomuri.” ²⁰ Naapo areketa izvi, wakavaonisa nyara dzake norutii rwake. Naapo vadzidzi vakadakara apo vaona Mambo. ²¹ Jesu wakatizve kwavari: “Kunyarara ngakugare kwomuri. Kudai ngezvaakandituma Baba, ngokudaro ndinomutumawo.” ²² Naapo areketa izvi wakavafemera, akati kwavari: “Ashirai Mweya Wakachena. ²³ Kunyazwi ndiani womunozorekerera zvishaishi zvake, zvinozorekererwa; kunyazwi ndiani womusikazorekereri, azvizorekererwi. ²⁴ Zvino Thomasi, umwe wegumi navairi, uwo unozwi Manyambiri, waiya asiripo navo apo Jesu paakauya. ²⁵ Ndizvo vadzidzi vamweni vakati kwaari: “Tamuona Mambo.” Asi iye wakati kwavari: “Kuti ndisaona munyara dzake mauri ezvipikiri, ndipfekemwo chinwe changu mumauri ezvipikiri, ndipfeke nyara yangu parutii rwake, andizotendi.” ²⁶ Ngesure kwemazuva masere, vadzidzi vaiyazve mumhatso naThomasi waiya navo. Jesu wakauya misiwo yakakonywa, wakaema pakati pavo, wakati: “Kunyarara ngakugare kwomuri.” ²⁷ Zvino wakati kunaThomasi: “Isa chinwe chako apa, uone nyara dzangu; utambanudze nyara yako, uipfeke parutii rwangu. Usaita usikatendi, asi unotenda. ²⁸ Thomasi wakapingura, akati kwaari: “Mambo wangu naMwari wangu!”. ²⁹ Jesu wakati kwaari: “Wazotenda ngokuti wandiona here? Vanomuchena avo vanotenda vasikazi kuona.” ³⁰ Zvino Jesu wakaita mioniso imweni mizhinji mukuona kwevadzidzi vake, isikazi kunyorwa mutsamba iyi. ³¹ Asi iyi yakanyorwa kuti imwimwi mutende kuti Jesu ndiKristu, Mwana waMwari, nokuti ngokutenda muone kupona ngezina rake.