¹ Zvino nguva yeDhiri rePhasika isati yaguma, apo Jesu echizia kuti nguva yake yaguma kuti abve munyika muno aende kunaBaba, avada vake avo vaiya munyika, wakavada metsa kumagumo. ² Vachadya kudya kwemadeekoni, Sathani waiya atopinda mumwoyo mwaJudhasi, mukororo waSimoni Isikarioti, kuti amupire. ³ Jesu, echizia kuti Baba vaiya vamupa zveshe munyara dzake nokuti wakabva kunaMwari nokuti unoenda kunaMwari. ⁴ wakamiruka kubva pakudya kwemadeekoni, wakakhumura zvokupfeka zvepadera zvake, wakatora jira rokupukuta ndiro, akasungira muchiunu chake. ⁵ Naapo wakadurura mvura muchidziyo chokushambira, akatanga kushamba tsoka dzevadzidzi nokudzipukuta ngejira raaiya akasungira muchiunu. ⁶ Ndizvo wakaguma panaSimoni Petro; Petro wakati kwaari: “Mambo, iwewe unoshamba tsoka dzangu here?”. ⁷ Jesu wakapingura, akati kwaari, “Icho chendinoita inini, iwewe auchizii zvino, asi unozochizwisisa ngesure kweizvi.” ⁸ Petro wakati kwaari, “Auzoshambi tsoka dzangu nariini.” Jesu wakamupingura, akati, “Dai ndisikakushambi, auna chikoaniswa neni.” ⁹ Simoni Petro wakati kwaari: “Mambo, kusachaita tsoka dzangu dzega asi nadzo nyara dzangu nesoro rangu”. ¹⁰ Jesu wakati kwaari: “Iye washambwa muiri weshe aachatami chiro chimweni kwega kushambwa tsoka dzake, asi wacheneswa yaamho. Nemwi mwacheneswa, asi haiwa mweshe.” ¹¹ Ngekuti Jesu waimuzia uwo waizomupira; ndizvo wakati: “Amuzi kucheneswa mweshe.” ¹² Naapo Jesu aiya ashamba tsoka dzavo nokutora zvokupfeka zvake nokugara pandau yake, wakati kwavari: “Munozwisisa here chendaita? ¹³ Munondidaidza kuti Mudzidzisi nokuti Mambo; nemwi munonasa kuronza, ngokuti ndini. ¹⁴ Zvino kudai inini, Mambo noMudzidzisi wenyu, ndashamba tsoka dzenyu, nemwiwo kunosisira kuti mushambane tsoka dzenyu. ¹⁵ Ngokuti ndamupa chionero, kuti nemwi muite kudai ngezvandaita kwomuri. ¹⁶ Ngegwinyiso ndinoti kwomuri, muranda aasimukuru kupinda mambo wake, nokuti wakatumwa aakuri kupinda uwo wakamutuma. ¹⁷ Kudai mwechizia izvi zviro, munomuchena kudai mwechizviita. ¹⁸ Andiereketi ndimwi mweshe akadi; ndinovazia avo vendakatsanangura; asi kuti chinyorwa chizadzisike chinoti: ‘Uwo unodya chingwa changu, wakandimirudzira chisisinho chake kurwisana neni.’ ¹⁹ Zvino ndinomuronzera izvi zvisati zvaitika, kuti apo zvaitika mutende kuti ndini. ²⁰ Ngechokwadi ndinoti kwomuri, iye unoashira uwo wendinotuma unoashira inini; nouwo unondiashira unoashira uwo wakandituma.” ²¹ Naapo Jesu aiya aereketa izvi, wakatambudzika mumweya wake, wakapupura akati: “Ngegwinyiso ndinoti kwomuri, umwe wenyu unozondipira." ²² Vadzidzi vakaningirana vechishamiswa kuti unoreketa ndiani. ²³ Umwe wavadzidzi vake waiya akatseama paditi raJesu, uwo waidiwa ndiJesu. ²⁴ ndizvo Simoni Petro wakamukopera akati kwaari: “Tironzere, ndiani waanoereketa ndiye". ²⁵ Ndizvo uwo wakatseyama paditi raJesu wakati kwaari: “Mambo, ndiani?”, ²⁶ Jesu wakapingura akati: “Ndiye uwo wendinozosheya mushuva ndimupe.” Naapo asheya chigurwa chechingwa wakaupa Judhasi, mwan waSimoni Isikarioti. ²⁷ Naapo ngesure kwechigurwa chechingwa, Sathani wakapotera kwaari. Ndizvo Jesu wakati kwaari: “Izvo zvounoda kuita zviite ngokukasira.” ²⁸ Paiya pasina munhu pakudya wakazia singwisingwi yezvaakaereketa kwaari. ²⁹ Ngokuti vamweni vakapinimidza kuti, ngokuti Judhasi waiya nenyede yemare, Jesu waimuronzera echiti, “Tenga zvetinoda paDhiri rePhasika,” nokuti ape chiro kuvarombo. ³⁰ Ndizvo iye aashira chigurwa chechingwa, paripo wakabuda kuenda. Hwaiya hwaa usiku. ³¹ Naapo aiya abuda, Jesu wakati: “Zvino Mwana woMunhu wakudzwa naMwari wakudzwa mukati mwake. ³² Kudai Mwari akudzwa mukati mwake, Mwari unozomukudzawo mukati mwake emene, naye unozomukudza paripo apapo. ³³ Vana vadoko, inguva doko ndichinemwi. Munozonditsvaka; kudai ngezvandakaronza kuvaJudha, ndizvo ndinoti kwomuri: ‘Pendinoenda, amukoni kuuyapo.’ ³⁴ Ndinomupa mupango mutsva, kuti mudane umwe kunoumweni; kudai ndini ndakamuda, ngokudaro imwimwiwo mudane. ³⁵ Ngeichi vanhu veshe vanozozia kuti imwimwi muri vadzidzi vangu: kudai muno rudo umwe kunoumweni.”, ³⁶ Simoni Petro wakati kwaari: “Mambo, unoenda kuri?” Jesu wakapingura, akati: “Pendinoenda, aukoni kunditeera zvino; asi unozoteera sure kweizvi.” ³⁷ Petro wakati kwaari: “Mambo, andikoni kukuteera zvino ngenyi? Ndinozofa ngepamusoro pako.” ³⁸ Jesu wakapingura, akati: “Unozofa ngepamusoro pangu here? Ngegwinyiso ndinoti kwomuri, jongwe arizoriri usati wandiramba katatu.