¹ “Mwoyo yenyu isatambudzika; tendai kunaMwari, mutendewo kwendiri. ² Mumhatso mwaBaba angu huriyo ugaro hwakawanda. Kudai zvisakadaro, ndaizodai ndisikazi kumuronzera here kuti ndinoenda koomunasirira ugaro? ³ Kudai ndechienda koomunasirira ugaro, ndinozouyazve nokumuashira ndemene, kuti pendiri inini, nemwi mungazoapowo. ⁴ Nependinoenda munoizia njira.” ⁵ Thomasi wakati kwaari, “Mambo, atizii pounoenda. Njira tingaizia ngenyi? ⁶ Jesu wakati kwaari, “Inini ndiri njira negwinyiso nokupona. Akuna unouya kunaBaba, asikauyi ndini. ⁷ Kudai mwakandizia, mwaizodai mwakamuzia Baba anguwo. Kubvira pano munomuzia, nemwi mwamuona. ⁸ Firipu wakati kwaari: “Mambo, tipangidzire Baba, nesu tikwaniswe". ⁹ Jesu wakati kwaari, “Ndakagara nemwi mukuwo wakadai kureba, asi ausati wandizia here, Firipu? Iye wakandiona inini wakaona Baba. Unoronza ngenyi kuti: ‘Tipangidzire Baba? ¹⁰ Autendi here kuti inini ndiri mukati mwaBaba naBaba vari mukati mwangu? Mazwi endinoereketa kwomuri andidziereketeri ngesimba rangu; asi Baba vanogara mukati mwangu ndivo vanoita mishando yavo. ¹¹ Tendai inini kuti ndiri mukati mwaBaba naBaba vari mukati mwangu; asi kudai musikatendi kudaro, tendai ngepamusoro pemishando yemene. ¹² Ngegwinyiso ndinoti kwomuri, uwo unonditenda mishando yendinoita unozoitawo; mishando yakakura kupinda iyi unozoiita, ngokuti inini ndinoenda kunaBaba. ¹³ Kunyazwi chiinyi chomunozokumbira ngezina rangu ndinozochiita, kuti Baba vairikidzwe kubudikidza ngoMwana. ¹⁴ Kudai mwanyazokumbirenyi kwendiri ngezina rangu, inini ndinozochiita., ¹⁵ Kudai mwechindida, munozongwarira mipango yangu ¹⁶ Neni ndinozokumbira Baba, naye unozomupa umweni Muembedzeri, kuti agare nemwi nokusikaperi. ¹⁷ ndiye Mweya wegwinyiso; nyika aikoni kumuashira, ngokuti aimuoni nokuti kumuzia. Imwimwi munomuzia, ngokuti unogara nemwi, naye unozogara mukati mwenyu. ¹⁸ “Andizomusii muri nherera; ndinozouya kwomuri. ¹⁹ Kuchinenguva doko nenyika aichazondioni, asi imwimwi munozondiona; ngokuti inini ndinopona, nemwi munozoponawo. ²⁰ ”Ngeiro zuva munozozia kuti inini ndiri mukati mwaBaba angu, nemwi muri mukati mwangu, neni ndiri mukati mwenyu. ²¹ Uwo unemipango yangu echiingwarira, uwo ndiye unondida; nouwo unondida unodiwa ndiBaba angu, neni ndinozomuda nokudzionisa pachangu kwaari. ²² Judhasi (haiwa Isikarioti) wakati kwaari: “Mambo, unozoita maitirenyi kuti unozodzionisa kwetiri, usikadzionisi kunyika?”. ²³ Jesu wakamupingura, akati kwaari: “Kunyazwi ndiani unondida unozongwarira mazwi angu, naBaba angu vanozomuda, nesu tinozouya kwaari tiite ugaro hwedu pamwepo naye. ²⁴ Uwo usikandidi aangwariri mazwi angu. Neizwi romunozwa arisirangu akadi, asi ngeraBaba avo vakandituma. ²⁵ “Izvi zviro ndamuronzera apo ndichakagara nemwi. ²⁶ Asi Muembedzeri, Mweya Wakachena, waachazotuma Baba ngezina rangu, uwo unozomudzidzisa zviro zveshe, amucherechedzise zveshe zvendakamuronzera. ²⁷ Kunyarara ndinokusiya kwomuri; kunyarara kwangu ndinomupa. Andimupi kudai ngokupa kwenyika. Mwoyo yenyu isatambudzika, isakarukazve. ²⁸ Mwakazwa kuti ndakati kwomuri: ‘Ndinoenda, neni ndinozouyazve kwomuri.’ Kudai mwakandida, mwaizodakara kuti ndinoenda kunaBaba, ngokuti Baba vari vakuru kwendiri. ²⁹ zvino ndamuronzera zvisati zvaitika, kuti apo zvoozoitika mutende. ³⁰ Ngesure kweizvi andichazoereketi zvizhinji nemwi, ngokuti mutongi wenyika iyi unouya. Aana simba padera pangu. ³¹ Asi ndinoita kudai ngezvaakandipanga Baba, kuti nyika izie kuti ndinomuda Baba. Mirukai, ngatibve pano.