¹ Ndizvo mazuva matanhatu Phasika risati raguma, Jesu akaguma Bhethani, apo paiya naRazarusi, uwo waakamusa kwavakafa. ² Naapo vakamunasirira kudya kwemadeekoni; Maritha wakavaburira, naRazarusi waiya umwe weavo vaigara naye pakudya. ³ Naapo Maria wakatora mafuta anoda kukwana litha okuzora enarde aidhura naye wakadzodza tsoka dzaJesu, akapukuta tsoka dzake ngebvudzi rake; nemhatso yakazara ngegwema rakanaka remafuta. ⁴ Asi Judhasi Isikarioti, umwe wevadzidzi vake, (uwo waizomupira) wakati: ⁵ “Ngenyi asikazi kutengeswa mafuta aya ngemadhora mazana matatu, apuwe varombo?”. ⁶ Izvi wakazvironza, haiwa ngokuti waivada varombo, asi ngokuti waiya mbavha, waingwarira nyede naye waitora zvaiiswamwo. ⁷ Ndizvo Jesu wakati: “Murekerei ari ega. Ngaangwaririre zuva rokuikwa kwangu". ⁸ Ngokuti varombo munavo nguva dzeshe, asi amunenipi nguva dzeshe.” ⁹ Naapo vazhinji veungano yevaJudha vakazia kuti waiyapo, vakauya, haiwa kuti vaone Jesu kwega, asi kuti vaonezve Razarusi, uwo waakamusa kubva kwavakafa. ¹⁰ Ndizvo vapristi vakuru vakapangana kuti vauraye naRazarusiwo, ¹¹ ngokuti ngepamusoro pake vazhinji vevaJudha vaienda vechitenda kunaJesu. ¹² Nechimangwani mbungano huru iyo yakauya kudhiri, yakazwa kuti Jesu unouya Jerusarema. ¹³ Yakatora matai emichindwi, yakabuda kooshongana naye, vakadaidzira vechiti: “Hosana! Unomuchena uwo unouya ngezina raMambo, Mambo waIsuraeri!”. ¹⁴ NaJesu wakaona mwana wembongoro, naye wakagadha padera payo, kudai ngezvezvakanyorwa: ¹⁵ “Usatya, iwewe mukunda weZioni. Ringira, mambo wako unouya, akagadha padera pemwana wembongoro!”, ¹⁶ Vadzidzi vake avazi kuzvizwisisa izvi pakutanga, asi apo Jesu airikidzwa, naapo vakachizokarakadza kuti izvi zvaiya zvakanyorwa ngendaa yake nokuti vakamuitira izvi. ¹⁷ Nembungano iyo yaiya naye apo paakadaidza Razarusi kubva muiba akamumusa kwavakafa yakaita chapupu. ¹⁸ Ngeiyi ndaa mbungano yakaenda kooshongana nayezve, ngokuti yaiya yazwa kuti wakaita mushamiso. ¹⁹ Ndizvo vaFarisi vakati pakati pavo umwe kunoumweni: “Munoona, amungaiti chiro; ringirai, nyika yeshe inomuteera.” ²⁰ Zvino vaiyapo vaGiriki vamweni pakati peavo vakakwira koodira kudhiri. ²¹ Ndizvo ava vakauya kunaFiripu, uwo waibva Bhethisaidha reGarire, vakakumbira kwaari vechiti:“Mambo, tinoda kuona Jesu.” ²² Firipu wakaenda, akaronzera Andreu; Andreu wakaenda naFiripu, vakaronzera Jesu. ²³ NaJesu wakavapingura echiti: “Awa raguma rokuti Mukororo woMunhu akudzwe. ²⁴ Ngegwinyiso ndinoti kwomuri, kudai tsangu yekoroni isikawi mumavhu nokufa, inondogara iriyo yega; asi kuti ikafa, inozobereka tsangu dzakawanda. ²⁵ uwo unoda kupona kwake unozokurasha, nouwo unozonda kupona kwake munyika muno, unozokungwarira kupona kusikaperi. ²⁶ Kudai munhu echindishandira, ngaanditeere, kuti pendiri naye muranda wangu unozoapowo; kuti munhu echindishandira, Baba vanozomuremekedza. ²⁷ “Zvino mweya wangu unotambudzika. Neni ndinozotinyi, ‘Baba, ndiponese kubva kuneiri awa here?’ Haiwa, ndiyo ndaa yendakauyira awa iri. ²⁸ Baba, ngarikudzwe zita renyu:” Apapo rakauya izwi rechibva mudenga rechiti: “Ndakarikudza, neni ndinozorikudzazve.” ²⁹ Nembungano yaiya yakaema apo yakarizwa, yakati: “Kwatinhira.” Vamweni vakati: “Ingirosi yaereketa naye.” ³⁰ Jesu wakapingura akati: “Iri izwi arizi kuuya ngenyaya yangu, asi ngenyaya yenyu. ³¹ Zvino kwaapano kutongwa kwenyika iyi, zvino mutongi wenyika iyi unozorashwa kubanze. ³² Neni, naapo ndamirudzwa kubva panyika, ndinozokweera vanhu veshe kwendiri.” ³³ Wakabuya izvi echionisa njira yokufa kwaaizofa ndikwo. ³⁴ Ndizvo mbungano yakamupingura yechiti: “Takazwa muMipango kuti Kristu unozogara mhera nariini. Zvino unoronzenyi wechiti: ‘Mukororo woMunhu unosisira kuti amirudzwe?’ Ndiani uyu Mukororo woMunhu?” ³⁵ Jesu wakati kwavari: “Inguva doko kujeka kuchipo pakati penyu. Hambai muchinokujeka, kuti chidima chisamubata; nouwo unohamba muchidima aatongozii paanoenda. ³⁶ Muchinokujeka, tendai kujeka, kuti muite vana vokujeka.” Naapo Jesu aronza izvi, wakabvapo akadzifisha kubva kwavari. ³⁷ Kunyazwi aiya aita mioniso mizhinji pamberi pavo, asi avazi kumutenda. ³⁸ Uku kwaiya kuzadzisa izwi raIsaya muprofeti raakaereketa, iro rinoti: “Mambo, ndiani wakatenda izwi redu, nomuoko waMambo Mwari wakaoniswa kunaani?”. ³⁹ Ndizvo vaiya vasikakoni kutenda, ngokuti Isaya unotizve: ⁴⁰ “Uwo wakapofomadza madziso avo, wakakonzisa mwoyo yavo, kuti vasazoona ngemadziso avo, vazwisise ngomwoyo yavo, vatenderuke neni ndivaponese.” ⁴¹ Isaya wakaronza izvi ngokuti wakaona uthende hwake, akareketa ndiye. ⁴² Kunyazwi zvakanyadaro vazhinji vemadzimambo vakamutenda, asi ngendaa yokutya vaFarisi avazi kumutenda ngomuromo, kuti vasadzingwa kubva mumhatso yokudira. ⁴³ Ngokuti vaipinda kuda kukudzwa ngevanhu kunokukudzwa ndiMwari. ⁴⁴ Jesu wakadaidzira akati: “Uwo unonditenda, aatendi inini akadi, asi unotenda uwo wakandituma. ⁴⁵ Nouwo unondiona unoonawo wakandituma. ⁴⁶ Inini ndakauya ndiri kujeka munyika, kuti kunyazwi ndiani unotenda kwendiri asachagara muchidima. ⁴⁷ Kunyazwi ndiani unozwa mazwi angu asikaangwariri, andimutongi inini; ngokuti andizi kuuya kootonga nyika, asi kooponesa nyika. ⁴⁸ Iye unondiramba asikaashiri mazwi angu unaye unomutonga; izwi iro rendakaereketa ndiro rinozomutonga ngezuva rokupera. ⁴⁹ Ngokuti andizi kutera kudziereketera ngesimba rangu; asi Baba uwo wakandituma iye pachake wakandipanga chendinozoronza nechendinozoereketa. ⁵⁰ Neni ndinozia kuti mupango wake uri kupona kusikaperi. Ndizvo izvo zvendinoereketa, ndinozviereketa kudai ngezvandakaronzerwa ndiBaba.”