¹ Kunobva pari kuambana nehasha pakati penyu? Azvibvi kuzvidisiso zvokuemura kwenyu zvinorwisana munhengo dzenyu here? ² Munoemura chiro nemwi musina; ndizvo mwechiuraya. Munoemura chiro nemwi musikakoni kuchihanira; ndizvo munoambana nokurwisana. Amuna, ngokuti amukumbiri. ³ Munokumbira musikaashiri, ngokuti munoshaisha kukumbira, kuti muzvishandise muzvidisiso ⁴ Imwimwi vaombi! Amuzii here kuti ukama nenyika ugaa naMwari? Ndizvo kunyazwi ndiani unoda kuita ukama nenyika, unodziita gaa raMwari. ⁵ Munopinimidza here kuti zvinyorwa zvinoreketa zviro zvisina shwiro zvinoti, “Mweya wakaita kuti ugare mukati mwedu unoshuwira ndurumwa here?” ⁶ Asi unopinda kutipa nyasha dzakawanda; ndizvo zvinoti: “Mwari unorwisana nevanodzikudza, asi unoitira nyasha kunevakapfaa.” ⁷ Ndizvo dzipfaisei pashi paMwari. Irwai naDhiabhorosi, naye unozomutiza. ⁸ Kwedzerai padeze naMwari, naye unozokwedzera paduze kwomuri. Shambai nyara dzenyu, imwimwi vashaishi, muchenese mwoyo yenyu imwimwi munepfungwa miiri. ⁹ Boorerai, tsumbai nekuchema. Kusheka kwenyu ngakutsanduke kuita kutsumba, nokudakara kwenyu kuita kudzimbirwa. ¹⁰ Dzininipisei pamberi paMambo naye unozomukudza. ¹¹ Hama, musareyana. Kunyazwi ndiani unoreya umweni, nokuti kutonga umweni wake, unoreketa kurwisana neMupango, naye unotonga Mupango. Asi kudai wechitonga Mupango, auri muiti weMupangopi, asi mutongi. ¹² Ngeumwe ega uri mupi weMupango nomutongi, uwo unesimba rokuponesa nokuparadza. Asi iwewe urianani unotonga muakirwana wako? ¹³ Yaeyaii, imwimwi munoti: “Nyamashi nokuti mangwani tinozoenda kudhorobha rakatikuti, tipedze gore tiriyo, techitengesa tione zvokuuyirwa ndizvo.” ¹⁴ Imwimwi amuzii zvinozoitika nechimangwani. Chiinyi kupona kwenyu? Ngokuti muri mhute inooneka mukuwo mudoodoko, apo inoparara. ¹⁵ Ngokuti mwaisisira kuronza kuti, “Kudai Mambo echizotenda, tinozorarama nokuita ichi nokuti icho.” ¹⁶ Asi zvino munodziganzisa mukudzikudza kwenyu. Kweshe kudziganzisa kwakadaro kwakashata. ¹⁷ Weshe, unozia kuita zvakanaka naye asikazviiti, kwaaari kushaisha.