¹ Hama dzangu, musaita vadzidzisi vazhinji, mwechizia kuti tinozoashira kutongwa kwakapinda kurema. ² Ngokuti isusu teshe tinoshaisha ngezviro zvakawanda. Kudai aripo usikashaishi pamazwi, ndiye munhu wakaperera, unokona kubata muiri weshe nawo. ³ kudai techiisa mikhayo mumuromo yemahachi, kuti azwisise, tinotungamirira muiri wawo weshe. ⁴ Ningirai ngarava, kunyazwi dzakanyakura kudini, dzinohambiswa ngedutu rine simba, dzinotenderudzwa ngechikombe apo paanoda muhambisi wengarava kuti aende. ⁵ Ndizvo rIrumi inhengo doodoko, narwo runoganza zvakakura. Wonai kukura kwakaita gwasha rinopishwa ngomuriro wakatsonga! ⁶ Rirumi muriro. Rirumi inyika yakazara ngEekushata pakati penhengo dzedu; runosvipisa muiri weshe, runopisha njira yeshe yekupona, narwo runopishwa pacharwo ngemuriro weGehena. ⁷ Ngokuti mbeu dzeshe dzezvikara nedzeshiri nedzezvinotamanda nezviri muruandhle zvinopeteka, nazvo zvakapetwa ngevanhu, ⁸ asi apana munhu ungapeta rirumi, ndirwo chiro chakashata chisikapeteki, chakazara ngeukaira unouraya. ⁹ Ndirwo tinokudza Mambo naBaba, ndirwozve tinotuka vanhu vakasikwa ngomutodzaniso waMwari. ¹⁰ Kubva pamuromo umwewo panobuda kubonga nekutuka. Hama dzangu, azvifaniri kuti izvi zviitike kudaro. ¹¹ Chinyuka chinobudisa here ngomuromo umwe mvura inotapira neinovava? ¹² Hama dzangu, muonde ungabereka here maorivhi, nokuti muvhini ungabereka here maonde? Zve, mvura inemunyu aingakoni kubudisa inotapira. ¹³ Ndiani wakangwara neunozwisisa pakati penyu? Ngaaonise ngekupona kwake kwakanaka mishando yake mukupfaa kwoungwaru. ¹⁴ Asi kuti munendurumwa inovava nokudisisa kwakashata mumwoyo mwenyu, musaganza, musanyepera gwinyiso. ¹⁵ Ungwaru wakadaro andiwopi unobva mudenga, asi nge womunyika, usina mweya, ngehwemadhimoni. ¹⁶ Ngokuti apo pane ndurumwa nokudisisa kwakashata, paripozve kukangaidzwa nezviito zveshe zvakashata. ¹⁷ Asi ungwaru unobva mudenga kutanga wakaperera, zve, unokunyarara, wakapfaa, unoreruka kupotwa, wakadzara ngenyasha nemuchero yakanaka, usina mukheto, usina kudziitisa. ¹⁸ Nemuchero yokunaka inokushkwa mukunyarara ngaavo vanoita kunyarara.