¹ Hama dzangu, imwimwi nokuita kwenyu kunemukheto munotenda kuna Jesu Kristu, Mambo wedu wouthende here? ² Ngekuti kudai munhu unendandazi yemukore, naye akasimira zvakanaka echipotera mumhatso yenyu yokudira, munhu murombo unezvokusimira zvine tsvina echipoterawomwo. ³ Nemwi kudai mwechireremedza uwo unosimira zvokufuka zvakanaka mwechiti: “Gara pano pandau yakanaka,” mwechiti kumurombo, “Ema apo,” nokuti: “Gara pashi pechitambarariro chetsoka dzangu,” ⁴ ngokuita kudaro amuzikuita mukheto pakati penyu nokuita vatongi vepfungwa yakashata here? ⁵ Yaeyai, hama dzangu dzinodikanwa. Mwari aazi kukheta varombo munyika kuti vaite wapfumi wekugonda nevanogara nhaka yeumambo uhwo waakagondisa kwavari vanomuda here? ⁶ Asi imwimwi amuzi kuremeredza murombo. Andivopi wapfumi wanomutambudza here? Andivopi vanomukweya kuenda pazvigaro zvekutongwa here? ⁷ Andivopi vanotuka zita rinoreremedzeka romunodaidzwa ndiro here? ⁸ Asi kudai mwechizadzisa mupango weumambo kudai ngezvakanyorwa kuti, “Unozomuda muakirwana wako kudai ngezvounodzida iwewe pachako”, munoita zvakanaka. ⁹ Asi kudai mwechiita vanomukheto kuvanhu, munoshaisha mwechiitirwa ndaa ngeMipango kuti muri vapauki. ¹⁰ Ngokuti kunyazwi ndiani unozongwarira Mupango yeshe, asi echipumhuwa ngerupande rimwe, ena waita unendaa kweiri yeshe. ¹¹ Ngokuti uwo wakati: “Usazoomba,” wakatizve, “Usazouraya.” Zvino kudai usikaombi, asi wechiuraya, waita mupauki weMupango. ¹² Mwechireketa nokuita kudai ngevanozotongwa ngeMupango yokusunhurika. ¹³ Ngokuti kutonga akuzoiti nyasha kwaari usikazi kuonisa nyasha. Nyasha dzinodziganzisa dzechinyisa pakutonga! ¹⁴ 4 Kunodetsereyi, hama dzangu, kudai munhu echironza kuti unokugonda, asi asina mushando? Kugonda ukwo kungamuponesa here? ¹⁵ Kudai hama mwamuna nokuti mukadzi ari mutitinini, echitama zvokudya zvezuva ngezuva. ¹⁶ Kana umwe wenyu echiti kwaari: “Endai mukunyarara, mwechiita vanodziirwa nokugutiswa,” asi musikavapi zvinotamika kumuiri, kunodetsereyi? ¹⁷ Ndizvo kugonda kwega, kuti kusina mushando, kwakafa. ¹⁸ Asi umweni unozoti: “Iwewe unokugonda, neni ndine mushando. Ndionise kugonda kwako kusina mushando, neni ndinozokuonisa kugonda kwangu ngemushando yangu.” ¹⁹ Unotenda iwewe kuti Mwari ndiumwe; unoita zvakanaka. Kunyazwi namadhimoni anotendawo nokuhuta. ²⁰ Unoda kuoniswa here, iwewe munhu usina shkwiro, kuti kugonda kusina mushando kwakafa? ²¹ Abrahama, baba edu, avazi kupembedzwa here ngemushando, apo pevakapira Isaka mwana wavo kuita mudiro paarita? ²² Unoona kuti kugonda kwakashanda pamwepo nemushando yake, nokugonda kwakaitwa kwakaperera ngemushando. ²³ Nechinyorwa chakazadzisika chinoti: “Abrahama wakagonda Mwari, nakwo kwakaerengerwa kwaari kuti kunaka”, naye wakadaidzwa kuti ishamwari yaMwari. ²⁴ Munoona kuti munhu unopembedzwa ngemushando, haiwa ngokugonda kwega. ²⁵ Ngokudaro, Rahabhi chifebi aazi kupembedzwa here ngemushando, apo paakaashira vatumwa nokuvatizisa ngenjira imweni? ²⁶ Ngokuti kudai ngomuiri usina mweya wakafa, ndizvo kugonda kusina mishando kwakafawo.