¹ Uyai zvino, imwimwi makapfuma, mucheme nokuboorera ngamadambudziko anozouya padera penyu. ² Upfumi wenyu waora nezvokufuka zvenyu zvadyiwa ngounundu. ³ Mukore wenyu nesirivha yenyu zvaane chinguraurwe, nechinguraurwe chazvo chinozoita chapupu chokumuitira ndaa, nacho chinozodya nyama yenyu kudai ngemuriro. Mwakadziunganidzira upfumi wenyu mumazuva ekupedzisira. ⁴ Ningira mubadaro wevashandi avo vakacheka minda yenyu, wemwakasara nawo musikazi kubhadhara ngourimbwi, unodaidzira nokudaidzira kwaavo vakacheka kwakazwika munzee dzaMambo wehondo. ⁵ Mwakararama munyika mukushadaya nomukudakara; mwakakodza mwoyo yenyu ngezuva rekuuraya. ⁶ Mwakamurasha nokumuuraya uwo wanaka, uwo usikarwisani nemwi. ⁷ Ndizvo iwai vanoshingirira, hama, metsa kuuya kwaMambo. Wonai murimi unogarira muchero inomutengo mukuru yenyika, echishingirira, metsa iashire mvura yekuamba neyokupedzisira. ⁸ Nemwiwo itai vanoshingirira kudaro. Simbisai mwoyo yenyu, ngokuti kuuya kwaMambo kwaapaduze. ⁹ Hama, musamangarana umwe kunoumweni, kuti musazotongwa. Ningirai mutongi unoema pamusiwo! ¹⁰ Hama, kudai ngechionero chokutambudzika nokushingirira, ashirai vaprofeti vakareketa ngezita raMambo. ¹¹ Ngegwinyiso tinoti vanomuchena avo vakashingirira. Mwakazwa ngekushingirira kwaJobe, mwakaona kupedzisira kwaMambo, kuti Mambo wakadzara ngokukungurira nenyasha. ¹² Asi kupinda zveshe, hama dzangu, musazopika, kunyazwi ngedenga nokuti ngenyika nokuti ngokupika kumweni, asi itai kuti: “Eya” wenyu aite eya, na “Haiwa” wenyu aite haiwa, kuti musapinda mukutongwa ¹³ Uripo here pakati penyu unotambudzika? Ngaakumbire. Uripo here pakati penyu unodakara? Ngaaembe nduyo yokukudza. ¹⁴ Uripo here pakati penyu unorwara? Ngaadaidze vakuru vechiara, ngavamukumbirire, vechimudzodza ngemafuta ngezita raMambo. ¹⁵ Mukumbiro wokugonda unozoponesa unorwara, naMambo unozomumusa; kudai akaita zvishaishi, zvinozorekererwa kwaari. ¹⁶ Ndizvo reurirai zvishaishi zvenyu umwe kunoumweni, mukumbirirane umwe kuneumweni, kuti mutambiswe. Mukumbiro wemunhu wakanaka une simba guru mukushanda kwawo. ¹⁷ Erija wainga munhu ngechibarirwe wainga akadai tisu, naye wakakumbira kurutu kuti isazonaya, akuzi kunaya makore matatu nemwedzi mitanhatu. ¹⁸ Wakakumbirazve, nedenga rakanayisa mvura nenyika yakabereka muchero yayo. ¹⁹ Hama dzangu, kudai aripo pakati penyu unopauka kubva kugwinyiso noumwe echimutendeudza, ²⁰ munofanira kuzia kuti kunyazwi ndiani unotendeudza mushaishi kubva mukupauka kwake, unozoponesa mweya womushaishi kubva murufu, naye unozofukidza zvishaishi zvakawanda.