¹ Ndizvo itai vatedzereri vaMwari, dai ngevana vanodikanwa. ² Muhambe murudo, kudai ndiKristu wakatida, akadzipira ngepamusoro pedu, kuita mudiro nemubairo kunaMwari zviite gwema rakanaka. ³ Asi kuomba nezvinosvipisa zveshe nekuemura zvisazoreketwa ndizvo pakati penyu, kudai ngezvinosisira pakati pevakacheneswa. ⁴ Musatendera kuti kuapo tsvina nokuti kureketa zvoupenzi nokuti kutsvina zvisikasisiri, asi ngakuepo kubonga. ⁵ Muwe negwinyiso reizvi, kuti akuna muombi nekuti munhu wakasvipiswa nokuti unoemura kuronza kuti mudiri wemiedzaniso, unodya nhaka muumambo hwaKristu nohwaMwari. ⁶ Musachengedzerwa ngomunhu ngemazwi asina shkwiro, ngekuti ngendaa yeizvi zviro ushungu waMwari unouya padera pevana vokusikazwisisa. ⁷ Ndizvo musazwanana navo. ⁸ ngekuti imwimwi kare mwainga chidima, asi zvino muri kujeka muna Mambo. Hambai kudai ngevana vokujeka, ⁹ ngekuti muchero wekujeka unooneka kunezveshe zvakanaka nokurtendeka negwinyiso,) ¹⁰ mwechiedza kudzidza zvinonasa kudakadza Mambo. ¹¹ Musikaiyani nemushando akujeka, ¹² Ngekuti zvinodanisa kunyazwi kureketa ngeizvo zvinoitwa ndivo mukufishika. ¹³ Zviro zveshe pezviinobudiskwa pakujeka chinooneka, ¹⁴ Ngekuti chiro cheshe chinooneka chiri kujeka. Ndizvo ena unoti: “Muka, iwewe unoata, muka kubva kwevakafa, naKristu unozokuvhenekera.” ¹⁵ Ndizvo nasai kungwara mukuhamba kwenyu, musikadai ngevanhu vasikazi kungwara, asi mudai ngevakangwara, ¹⁶ mwechitenga nguva, ngekuti mazuva ari akashata. ¹⁷ Ndizvo musaita mapenzi, asi mwechizia chiri kuda kwaMambo. ¹⁸ Musadakwa ngevhini, iro rinopara kusikadzibata, asi mwechizadzwa ndiMweya, ¹⁹ mwechireketa umwe kuneumweni ngenduyo nengoma nekuemba kweMweya, mwechiemba ngokutetemba ngemwoyo yenyu kunaMambo. ²⁰ Mwechibonga kunaMwari Baba ngezviro zveshe ngenguva dzeshe ngezina raMambo wedu Jesu Kristu. ²¹ Mwechipfairana umwe kuneumweni mukutkya Kristu. ²² Vakadzi, zvipirei kuvamuna venyu, kudai ngezvomunoita kunaMambo. ²³ Ngekuti mwamuna uri soro remukadzi, kudai ndiKristu ari soro rechiara, muiri uwo waari muponesi. ²⁴ Asi kudai ngechiara chinomupfaira Kristu, ndizvo vakadzi ngavazvipire kuvamuna vavo ngezviro zveshe. ²⁵ Vamuna, idai vakadzi venyu, kudai ndiKristu wakachida chiara, akadzipira ngepadera pacho. ²⁶ Ena wakachiita kuti achichenese, echisuka ngekushamba ngemvura neizwi, ²⁷ kuti adziisire chiara kwaari chiri chiara chinounaku, chisina ndemo nokuti kuonyana nokuti chiro chimweni chakadaro, asi kuti chiite chakacheneswa, chisina neara. ²⁸ Ngekudaro kunofanera kuti vamuna vade vakadzi vavo kudai ngezvevanoda miiri yavo. Uwo unoda mukadzi wake unodzida pachake. ²⁹ Ngekuti apana munhu wakambonyenya nyama yake, asi unoikodza nokuingwarira, kudai ngezvaanoitawo Kristu kunechiara, ³⁰ ngokuti isusu tiri nhengo dzemuiri wake. ³¹ “Ngeii ndaa munhu unozosiya baba ake namai ake, unozonamatira kumukadzi wake, naavo vairi vanozoita nyama imwe.” ³² Ichi chakafishika chikuru, asi ndinoereketa ngendaa yaKristu nechiara. ³³ Asi umwe ngaumwe wenyu ngaade mukadzi wake kudai ngezvaanodzida pachake nomukadzi ngaangwarire kuti areremedze mwamuna wake.