¹ Vana, teererai vabari venyu munaMambo, ngkuti izvi zvakanaka. 2 ² “Reremedza baba ako namai ako,” (uyu murairo wekutanga une chigondiso,), 3 ³ “Kuti zvinake kwouri, nekuti upone makore wakareba munyika.” ⁴ Nemwi madzibaba, musatsamwisa vana venyu, asi muvarere mukudzidzisa nemukupanga kwaMambo. ⁵ Hloko, teererai madzimambo enyu ngekwenyama, ngokutkya nokuhuta, ngemwoyo wakanaka, kudai ngevanoitira Kristu. ⁶ Musikashandi ngekuoneka ngemadziso, kudai ngevanodakadza vanhu, asi kudai ngehloko dzaKristu, mwechiita kuda kwaMwari mumwoyo. ⁷ Mwechishanda ngokuda kudai ngevanoitira Mambo haiwa kuvanhu, ⁸ mwechizia kuti kunyazwi chiinyi chakanaka chaanoita munhu, unozochipuwa kubva kunaMambo, kunyazwi hloko nokuti wakasununguka. ⁹ Nemwiwo madzimambo, itai zvakadaro kwavari, murekere kuvatkyisidzira, mwechizia kuti Mambo wavo newenyuwo uri kudenga, kwaari akuna musananguro wevanhu. ¹⁰ Pakupedzisira, itai vakagwinya munaMambo nomukugwinya kwesimba rake. ¹¹ Pfekai nhumbi dzeshe dzokurwa ndidzo dzaMwari, kuti mukone kuema kurwisana nemazano akashata aDhiabhorosi. ¹² Ngokuti atidzipani nenyama nengazi, asi tinodzipana noumambo nevane simba nevanotonga nyika yechidima chino nomweya yakashata yomundau dzomudenga. ¹³ Ndizvo torai nhumbi dzeshe dzokurwa ndidzo dzaMwari, kuti mukone kurwisa pazuva rakashata nekuramba mwakaema apo mwapedza zveshe. ¹⁴ Ndizvo emai, mwakasimira gwinyiso muzviunu zvenyu, mwaisa chihlangu chepaditi chokutendeka. ¹⁵ Mwapfeka mutsoka dzenyu kunasirirwa kwevhangeri rokunyarara. ¹⁶ Muneizvi zveshe torai chihlangu chokugonda, chomunozokona kudzima ndicho misee yeshe yemirazvu yomuriro youwo wakashata. ¹⁷ Ashirai chiqoko choruponeso neshoti yoMweya, iri izwi raMwari. ¹⁸ Mukumbire nguva dzeshe muMweya, nokukumbira kweshe nokupota. Muneizvi mumipinimidzo ngwarai nokusengerera kweshe nekukumbirira vakacheneswa veshe. ¹⁹ Neniwo mundikumbirire, kuti ndipuwe izwi rokureketa ngekushinga, kuti ndidudzire zvakafishika zvevhangeri. ²⁰ Ngendaa yaro inini ndiri muemereri wakasungwa ngemaketani; kuti ndirekete ngokushinga, kudai ngezvinosisira kuti ndirekete. ²¹ Thichikusi, munukuna unodikanwa nenhunge inogondeka munaMambo, unozomuronzera zviro zveshe. ²² Ndamutumira kwomuri ngendaa iyi, kuti muzie kugara kwedu nokuti agwinyise mwoyo yenyu. ²³ Kunyarara ngakugare nevakoma, rudo pamwepo nekugonda, zvinobva kunaMwari Baba naMambo Jesu Kristu. ²⁴ Nyasha ngadzigare kwavari veshe vanomuda Mambo wedu Jesu Kristu ngerudo risikaperi.