¹ Ngeii ndaa inini Phauri, bhanditi raKristu Jesu ngendaa yenyu imwimwi vemadzinza. ² Ngegwinyiso mwakazwa ngounhunge wenyasha dzaMwari dzakapuwa kwendiri ngendaa yenyu ³ Ndinonyora ngenjira yakaziiswa chakafishika chakaitwa kuti chiziikanwe kwendiri ngokuoniswa. Ichi ndicho chokwadi chakafishika chendakambonyora ngemazwi mashomani. ⁴ Mukudzidza izvi mungazwisisa kuzia kwangu ngechakafishika chaKristu. ⁵ Icho chisikazi kuziikanwa kuvamwanakomana vevanhu mumibarirwana imweni, dai ngezvechakaoniswa kuvapostori vake vakacheneswa nevaprofeti ngeMweya. ⁶ Ichi chokwadi chakafishika ngeche kuti vemadzinza vanogara nhaka pamwepo nesu navo vari venhengo dzemuiri umwewo pamwepo nesu vanokoanisirwawo chigondiso chiri kunaKristu Jesu kubudikidza ngevhangeri. ⁷ Ngeiri vhangeri ndakaitwa mushandiri waro, kudai ngechipo chenyasha dzaMwari chendakapuwa ngekushanda kwesimba rake. ⁸ Mwari wakapa Kwendiri chi[o ichi, kunyazwi inini ndiri mudoko wokupedzisira wavo veshe vakacheneswa, nyasha idzi dzakapuwa, kuti ndichumaire kune vemadzinza upfumi usikatsvakiki waKristu. ⁹ Chipo chaMwari kwendiri ngeche kuita kuti vanhu veshe vaone urongwa wechakafishika chainga chakafishwa kubvira pakutanga munaMwari uwo wakasika zviro zveshe, ¹⁰ kuti kubudikidza ngechiara uwo ungwaru hwaMwari muzviemo zvakaparadzana zvino uziikanwe kuvatongi nevane simba mundau dzemudenga. ¹¹ Izvi zwakaitika ngekuda nekuronga kwake kwemhera nariini, ukwo kwaakaita muna Kristu Jesu, Mambo wedu, ¹² mwaari tinoshinga kupinda kubudikidza ngegonda kwekutenda kwedu mwaari. ¹³ Ndizvo ndinomukumbira kuti musademera ngekutambudzika kwangu ngendaa yenyu, kuri uthende wenyu. ¹⁴ Ngeii ndaa ndinogwadama ngemabvi angu pamberi paBaba, ¹⁵ kubva mwaari mhuri dzeshe dzemudenga nedzomunyika dzinodaidzwa ngezita ravo. ¹⁶ kuti Ena amupe, kudai ngouwandu hwouthende wake, kuti mugwinyiswe ngesimba kubudikidza ngeMweya wake mumunhu wemukati. ¹⁷ Ndino namata kuti Kristu agare mumwoyo mwenyu kubudikidza ngekugonda, kuti imwimwi, muane nzinde netsikiro zvakagwinya murudo. ¹⁸ Ndino namata kuti muve nesimba reshe rekuzwisisa, pamwepo nevakacheneswa veshe, chiinyi kupambhama nokureba nokukwira nekudzama. ¹⁹ Nekukura mukuzia rudo raKristu runopinda ruziyo rweshe, kuti muzadzwe ngekudzara kweshe kwaMwari. ²⁰ Kwaari uwo ngesimba rinoshanda mukati mwedu unokona kakuru kuita zvakawanda kupinda zveshe zvetinokumbira nezvetinopinimidza, ²¹ kwaari ngakua nouthende muchiara nemunaKristu Jesu kunemazero eshe nekusingaperi. Ameni.