¹ Imwimwi mwanga vakafa muzvipaukwa nomuzvishaishi, ² Muneizvo zvemwakahamba pakati pazvo kare, mwakateera mitoo yeii nyika, mukateera njira yemuzvare wesimba remweya wekudenga, mweya uwo unoshanda zvino mukati mwevanakomana vokusikazwisisa. ³ Taigara teshe pakati pavo kare, tiri mukuemura kwenyama yedu, techiita kuda kwenyama nokwemipinimidzo, ngechibarirwe tainga vana veushungu, kudai ngevanhu vamweni. ⁴ Asi Mwari, unenyasha dzakawanda, kubva murudo rwake rwakakura rwaakatida ndirwo, ⁵ kunyazwiapo tainga takafa kubudikidza ngezvipaukwa zvedu, wakaita kuti tipone pamwepo naKristu (mwakaponeswa ngenyasha.) ⁶ Wakatimusa pamwepo naye, akaita kuti tigare pamwepo naye mundau dzemudenga munaKristu Jesu, ⁷ kuti ngenguva dzinouya aonise kuwanda kukuru kweupfumi wenyasha dzake nerudo rwake kwetiri muna Jesu Kristu. ⁸ Ngokuti mwakaponeswa ngenyasha kubudikidza ngokugonda; izvi zvisikaitwi ndimwi, asi chipo chaMwari. ⁹ azviitiki kubudikidza ngemishando, kuti kusazoapo naumwe ungaganza. ¹⁰ Ngokuti isusu tiri mushando wake, takasikirwa munaKristu Jesu kuti tiite mishando yakanaka, yaakaemesa kare Mwari kuti tihambe mukati mwayo. ¹¹ Ndizvo karakadzai kuti kare imwimwi mwainga vemadzinza ngokwenyama, mwaizwi kuti, “Vasikazi kuchekwa,” ngaavo vanozwi, “Vakachekwa,” izvo zvinoitwa munyama ngenyara. ¹² Karakadzai imwimwi kuti ngeiwo nguva mwainga mwakaparadzana naKristu, musikaiyani norudzi revaIsuraeri, muri vapara kuzvitenderano zvechigondiso, musina negonda, musina Mwari munyika. ¹³ Asi zvino muna Jesu Kristu imwimwi kare mwainga kure mwakwedzedzwa pasinde ngengazi yaKristu. ¹⁴ Ngokuti ena uri kunyarara kwedu, uwo wakaita kuti teshe tiite umwe naye, wakaputsa rukumbati rwougaa raiparadzanisa ngepakati. ¹⁵ Aparadza ngemuiri wake mutemo wemupango nezviemeso, kuti adzisikire mukati mwake munhu umwe mutsva kuti vasaita vairi, kuti paite kunyarara. ¹⁶ Kuti aiyanise zvikwata zveshe zviiri munaMwari mumuiri umwe kubudikidza ngemuchinjiko, auraye ugaa kubudikidza ndiwo. ¹⁷ Jesu wakauya, akaparidzira kunyarara kwomuri imwimwi mwainga kuretu nekunyarara kwavari avo vainga paduze. ¹⁸ Ngokuti kubudikidza kwa Jesu, isusu teshe tinokona kupinda paMweya umwe kunaBaba. ¹⁹ Ndizvo zvino amuchaiti vapara nevaeni, asi mwaita dzinza rimwe pamwepo nevakacheneswa, muri vemhuri yaMwari. ²⁰ Mwakaakwa padera petsikiro revapostori nerevaprofeti, Jesu Kristu emene ndiye buwe guru repakhona. ²¹ Mwaari mhatso yeshe inonasa kushonganiswa pamwepo nokukura kuita temperi rakachena munaMambo. ²² Mwaari imwimwiwo munoakwa pamwepo kuita ugaro waMwari muMweya.