¹ Ndizvo kudai mwakamuswa pamwepo naKristu, tsvakai zviro zviri padera, apo pana Kristu, akagara ngokumudyo kwaMwari. ² Emesai mipinimidzo yenyu kunezviro zviri padera, haiwa kuzviro zviri munyika, ³ ngokuti imwimwi mwakafa, nokurarama kwenyu kwakafishwa pamwepo naKristu munaMwari. ⁴ Apo Kristu uwo uri kurarama kwenyu ooneswa, munozoonekawo pamwepo naye muuthende. ⁵ Ndizvo urayai zviemuriro zvenyu zvenyika: kuomba, kusikasukika, kuemura kwomuiri, kudisisa zvakashata nokuemura pfuma, ukwo kuri kudira muedzaniso. ⁶ Ngendaa yeizvi zviro ushungu hwaMwari hunouya padera peavo vokusikapurutana. ⁷ Kwezviri imwimwiwo mwakahamba mukati mwazvo kare, apo muchagara mukati mwazvo. ⁸ Asi zvino imwimwiwo rashai zviro zveshe izvi: kutseneka, ushungu, kunyenya, kutuka nekureketa zvinotdanisa ngemiromo yenyu. ⁹ Musanyeperana, kwechioneka kuti mwakarasha munhu wekare nezviito zvake, ¹⁰ nemwi mwakadzipfekedza munhu mutsva, uwo unomusirirwa muruziyo kuti aedzane nemuedzaniso wouwo wakamusika. ¹¹ Apachina muGiriki nokuti muJudha, wakachekwa nokuti usikazi kuchekwa, wenyika mukanza, muSkuthia, hloko nowakasununguka. Asi Kristu ndiye zveshe nomukati mwazvo zveshe. ¹² Ndizvo, kudai ngevakatsanangurwa vaMwari, vakacheneswa nevanodikanwa, pfekai pachenyu mwoyo wokuzwira urombo, nyasha, kunaaniswa, kupfaa nokusengerera. ¹³ Mwechisengerera umwe noumweni, mwechirekererana, kuti aripo munhu unendaa kunoumweni; kudai ngezvaakamurekerera Mambo, ndizvo nemwiwo munosisira kurekererana. ¹⁴ Kupinda izvi zveshe, dzipfekedzei ngorudo, rinosungira zviro zveshe pamwepo mukunyarara kwakaperera. ¹⁵ Tenderai kuti kunyarara kwaKristu kutonge mumwoyo yenyu; ndikwo kwemwakadaidzirwa mumuiri umwe. Mwechibonga. ¹⁶ Izwi raKristu ngarigare mukati mwenyu ngokuwandisa, mwechidzidzisana nokupangana umwe noumweni muungwaru weshe; mwechibonga mumwoyo yenyu embai nduyo, ngoma nengoma dzoMweya kunaMwari. ¹⁷ Kunyazwi chiinyi chemunoita, ngeizwi nokuti ngomushando, itai zviro zveshe ngezita raMambo Jesu, mwechibonga kunaMwari Baba kubudikidza ndiye. ¹⁸ Vakadzi, farirai vamuna venyu, kudai ngezvinosisira vari muna Mambo. ¹⁹ Vamuna, idai vakadzi venyu, musaita ushungu kwavari. ²⁰ Vana, yaeyai vabari venyu pazveshe, ngokuti ichi chiri mushando wenyu unodakadza Mambo. ²¹ Madzibaba, musatsenesa vana venyu, kuti mwoyo yavo isazopera simba. ²² Hloko, yaeyai madzimambo enyu omunyika ngezviro zveshe, haiwa ngokurindwa, kudai ngevanodakadzisa vanhu, asi ngemwoyo weshe, mwechitya Mambo. ²³ Kunyazwi chiinyi chemunoita, shandai ngemwoyo, kudai ngevanoshandira Mambo, haiwa vanhu. ²⁴ Mwechizia kuti munozoashira musharo wenhaka kubva kunaMambo. Munoshandira Mambo Kristu. ²⁵ Ngekuti ena unoita zvakashata unozoashira zvakashata zvaakaita, akuna musananguro.