¹ Ngokuti ndinoda kuti muzie kuti kukura kwakaitawani kwokutambudzika kwendinakwo ngendaa yenyu, nendaa yaavo vari muRaodhisia, naavo veshe vasati vatongoona hope yangu ngokwenyama, ² kuti mwoyo yavo igwinyiswe nokubatana pamwepo murudo, kuti vawe neupfumi weshe wekuzwisisa wakakwana nokuwa neruziyo rechakafishika chaMwari, zvinoronza Kristu emene,. ³ mwaari kwakafishwa upfumi weshe weungwaru neweruziyo. ⁴ Ndinoronza izvi kuti kusazoapo naumwe unozomuchengedzera ngemazwi ourimbwi. ⁵ Ngokuti kunyazwi ndisipo ngomuiri, asi ndinemwi mumweya, ndechidakara, ndechiningira kuzwanana kwenyu nokugwinya kwokugonda kwenyu munaKristu. ⁶ Sezvamwakaashira Kristu Jesu Mambo, angirai kupona mukati mwake, ⁷ munenzinde dzakadzimikwa nokuakwa mukati mwake, mwechigwinyiswa mukugonda, kudai ngezvemwakadzidziswa, mwechizadzwa ngokubonga. ⁸ Ngwarai kuti asazoapo naumwe unomushaishira ngoungwaru wevanhu nokuchengedzera ngezvisina shkwiro, kuteera mishuma yevanhu, kudai ngokudzidzisa kwomweya yemunyika, haiwa kwaKristu. ⁹ Ngokuti mwaari munekuperera kweshe kwoUmwari kunogara mumuiri. ¹⁰ Mwaari imwimwiwo muri vakaperera, uwo uri soro padera pevatongi veshe nepadera pevane simba. ¹¹ Mwaariwo imwimwi mwakachekwa ngokuchekwa kusikaitwi ngenyara, ngokubviswa kwomuiri wenyama, mukuchekwa ukwo kuri kwaKristu. ¹² Apo pemwakaigwa pamwepo naye murubhabhatidzo, rwemwakamuswazve pamwepo naye kubudikidza ngokugonda musimba raMwari uwo wakamumusa kubva kwevakafa. ¹³ Pemwaiya vakafa mukupauka kwenyu nokusikachekwa kwenyama yenyu, Mwari wakamuita kuti mupone pamwepo naye, apo paakatikungurira kupauka kwedu kweshe, ¹⁴ atsukutidza chisungo chakanyorwa cheMupango, icho chakatiitira ndaa nemutemo yacho chinopesana nesu; naye wakachibvisa munjira, akachikohomera pamuchinjiko. ¹⁵ Wakadusapo vatongi nevane simba, akavabudisa pamhene, echivanyisa ndiwo. ¹⁶ Ndizvo musatendera munhu kuti amutonge ngendaa yezvokudya nokuti zvokumwa nokuti ngendaa yemishongano yokurha nokuti yokutawa kwomwedzi nokuti yemaSabatha. ¹⁷ Izvo zviri bvuri rezvinouya, asi muiri ngewaKristu. ¹⁸ Musatendera naumwe kuti amukorerese kuashira chipo chenyu ngokudzipfaisa ngamaune nokudira ngirosi, echibatisisa kuneizvo zvaakaona, echidzikudza kusina shwiro ngomupinimidzo wenyama, ¹⁹ asikanasi kubatirira kuSoro, kweriri muiri weshe unonasa kugutswa nokugwinyiswa ngenhengo nemidzira, unokura ngokukuriswa ndiMwari. ²⁰ Kudai mwakafa pamwepo naKristu kubva kuzvidzidziso zvokutanga zvenyika, munodzipfaisa ngenyi kungwarira zviemeso, kudai ngevachapona ngezvomunyika? ²¹ Izvo zvinoti, “Musabata, musaraira, musagwama.” ²² Mutemo iyi yeshe inoereketa ngezviro zvinopera ngokushandiswa; ndiyo mupango nezvidzidziso zvevanhu zvega. ²³ Zviro zvakadai ngegwinyiso zvinooneka zvakadai ngezvinoungwaru mukudira kwokuda nokudzipfaisa nokurekeredza muiri; asi azvina simba rokunyisa kuda kwenyama.