¹ Madzimambo, itirai hloko dzenyu izvo zvakanaka nezvinoedzana, mwechizia kuti imwimwiwo munaMambo mudenga. ² Angirai mukukumbira, mwechirinda murimwo ngokubonga. ³ Panguva imweyo mwechitikumbirirawo kuti Mwari atibeurire musiwo weizwi, kuti tirekete chakafishika chaKristu, chendiri muzvisungo ngendaa yacho, ⁴ nyengeterai kuti ndinase kuchionesa pamhene kudai ngezvendinofanira kuti ndirekete. ⁵ Hambai muungwaru kwavari vari kubanze, mwechitenga mukuwo. ⁶ Kureketa kwenyu ngakuwe nenyasha nguva dzeshe, kwechirungwa ngomunyu, kuti muzie njira inosisira kupingurana ndiyo umwe kuno umweni. ⁷ Thichikusi unozomuronzera mashoko eshe ngendaa yangu; uwo uri hama unodikanwa, mushandi unogondeka, mungani wedu unoshanda pamwepo neni munaMambo. ⁸ Ndamutumira kwomuri ngeiyi ndaa, kuti muzie ngokugara kwedu nokugwinyisa mwoyo yenyu. ⁹ Unouyayo naOnesimusi, hama inogondeka neinodikanwa, uwo uri umwe wenyu. Vanozomuronzera zveshe zvinoitwa pano. ¹⁰ Aristakhusi mungani wangu muubhanditi unomutambisa, naMarako muzukuru waBhanabhasi (uwo wemwakaashira kupangwa ngendaa yake; kudai echiguma kwomuriyo mumuashire.), ¹¹ NaJesu unozwi Justusi unomutambisa. Avo ndivo vanhu vega vakachekwa pakati pevangani vangu vendinoshanda navo muumambo waMwari, navo vakandiembedzera. ¹² Ephafrasi, umwe wenyu, muranda waKristu Jesu, unomutambisa. Nguva dzeshe unomutambudzikira mukukumbira kwake ngendaa yenyu, kuti mueme mwakaperera mwechizia ngegwinyiso icho chiri kuda kwaMwari. ¹³ Ngokuti ndinoita chapupu ndiye kuti unomushandira kukuru naavozve vari muRaodhisia nevari muHieraporisi. ¹⁴ Ruka, dhokodheya unodikanwa naDhemasi vanomutambisa. ¹⁵ Tambisai hama dziri muRaodhisia, naNyumufa nechiara chiri mumhatso yake. ¹⁶ Naapo iyi tsamba yadzidzwa pakati penyu, itaizve kuti idzidzwe muchiara chevaRaodhisia; kuti nemwiwo mudzidze tsamba inobva Raodhisia. ¹⁷ Mwechironzera Akhipusi kuti, “Ngwara kuti upedzise mushando wowakaashira kubva kunaMambo.” ¹⁸ Inini, Phauri, ndanyora kutambisa uku ngenyara yangu yemene. Karakadzai maketani angu. Nyasha ngadzigare nemwi.