¹ Mweya unoreketa pachena, kuti panguva dzinouya vamweni vachatsauka pakutenda, vachiteerera mweya inonyengera nedzidziso dzemweya yakaipa, ² vechinyengerwa nevanonyepa, vakapiswa pahana dzavo. ³ Vona vanorambidza vanhu kuwanana, nokuraira kuti zvimwe zvekurha zviregwe, zvakasikwa naMwari, kuti zvigamuchirwe nokubonga nevanotenda, vanoziya chokwadi. ⁴ Nokuti zveshe zvakasikwa naMwari zvakanaka, hakunachiro chingafanira kurashkwa, kana chechigamuchirwa nekubonga, ⁵ nokuti chinoitwa chitsvene neshoko raMwari nokunyengetera. ⁶ Kana uchiyeudzira hama zviro izvi, uchava mushumiri wakanaka waKristu Jesu, wakarerwa nemashoko ekutenda nedzidziso yakanaka, yawakateera nemoyo weshe. ⁷ Asi urambe ngano dzisine hanya naMwari nedzechembere. Uzvirovedze kunamata Mwari. ⁸ Nokuti kurovedza muviri kunobatsira zvishoma hako, asi kunamata Mwari kunobatsira pazvinhu zveshe, zvakune chipikirwa cheupenyu wazvino neunouya. ⁹ Ishoko rechokwadi, rinofanira kutendwa kwazvo. ¹⁰ Nokuti ndizvo zvatinotambudzikira nekurwira, nokuti tariro yedu iri kunaMwari mupenyu, Muponesi wevanhu veshe, zvikuru wavanotenda. ¹¹ Raira nokudzidzisa zviro izvi. ¹² Munhu ngaarege kuvapo unozvidza vadoko wako, asi uitire vanotenda makwara, pashoko nepamafambire, neparudo, nepaMweya nepakutenda, nepakuchena kwemoyo. ¹³ Shingaira pakurava, nepakuraira, nepakudzidzisa, kusvikira ndo uya. ¹⁴ Usarega kuchengeta chipiwa chiri mauri, nekuporofita, nokuiswa mavoko evakuru. ¹⁵ Shingairira zvinhu izvi, uzviite nemoyo weshe, kuti kupfurira mberi kwako kuvonekwe navanhu veshe. ¹⁶ Uzvichengete nedzidziso yako. Urambire pazviro izvi, nokuti kana wechiita izvi, uchazviponesa iwewe nevanokuzwa.