¹ Nazvo pakutanga kwezveshe ndinoraira kuti vanhu veshe vakumbirirwe, vanyengetererwe, varevererwe, vabongerwe; ² madzimambo, eshe vari vakuru, kuti tigare nerugare nekunyarara pakunamata Mwari kweshe, nemugarire unokudzwa. ³ Ndizvo zvakanaka, zvinofadza pamberi paMwari, Muponesi wedu. ⁴ Uyo unoda kuti vanhu veshe vaponeskwe, vaswike pakuziva chokwadi. ⁵ Nokuti kuna Mwari mumwe chete, noMureveri mumwe chete vo, pakati paMwari nevanhu, ndiye munhu Kristu Jesu. ⁶ Wakazvipa ena, kuti awe rudzikinuro rweveshe, chive chapupu panguva dzakafanira. ⁷ Ichokwadi, handinyepi, kune chinangwa chandakaitirwa muparidzi nemuapositora nemudzidzisi wevahedheni pakutenda nechokwadi. ⁸ Ndinoda kuti varume vanyengetere panzvimbo dzeshe, vachisimudza mavoko matsvene, vasina kutsamwa nenharo. ⁹ Saizvo, kuti vakadzi vashonge ngubo dzakafanira, vanekunyara nokuzvidzora; vasina nevhudzi rakarukwa, nendarama, kana maparera, kana ngubo dzinorha mari jinji. ¹⁰ Asi ngavapfeke mabasa akanaka, sezvinofanira vakadzi vanoti tinonamata Mwari. ¹¹ Mukadzi ngaadzidze nekunyarara nokudzviisa pachi kweshe. ¹² Asi handitenderi mukadzi kuti adzidzise, kana kuti ave nesimba pamusoro pomurume, asi ngaanyarare. ¹³ Nokuti Adhamu wakatanga kuvumbwa, tevere Evha. ¹⁴ NaAdhamu haana kunyengerwa, asi mukadzi wakanyengerwa akapinda pakudarika. ¹⁵ Asi uchaponeswa nokubereka vana, kana vechirambira mukutenda nerudo, neutsvene pamwepo.