¹ José Egiptoog aubeejierram. Potiphar, Faraón thʉajem ajim agjo õor por khasieejim ma egipciopierr ajim, Ismaelitapien juagaaita peraujim, makhʉʉnauta maig aubeejierram. ² Ẽwandam José dʉi siejim maigmua ich beewia mag woun wajapha nʉrrapim khĩir ajim. José joobasiejim anʉm ich por di aig egipcio. ³ Chi porou oojim Ẽwandam José dʉi siejim maigmua chi Ẽwandamau magjim thumwe ich diu wau sim wajaug sim anʉm. ⁴ Joseeu oojim anʉm i dau na khaiper nʉm. Ich diuta Potiphar neminaam waujeejim anʉm. Potiphar José joota aadejim ich diupaita ich di aig khaphʉ sisijim anʉm, maigmugua Joseegta deejim anʉm thumwe neminaam khap apimkhĩir. ⁵ Mag dichwia ich diu di thumwe khap sisijim anʉm maigmua neminaam mag deg thʉnʉm, Chi Ẽwandamau chi di Egipciom José gaai mua bendisieejim. Ẽwandamau mag bendisieetarran Potiphar ich deg neminaam thumwe wai sim gaai mua maigmua ich phidkhaajem aarja agjú. ⁶ Potipharrau ich diu thumwe waisierr Joséeg thʉapim khĩir deejim. Potipharr ich neminaam khĩirjũgba magnaa okhobpha sisijim ich opodpaita khĩirjũg siejim. Nau José wajaphata khitajú maigmua õor ichig eudʉ aujujoomo siejú. ⁷ Mag mʉm ee chi por ʉʉirau José khõchag aadejim. Chi ʉʉirau magjim:" Mʉ dʉi khãitarrau." ⁸ Mamʉ ich diu khõchkhaba maigmua magjim ich por ʉʉirag: oobá, mʉ porou mʉrʉg ooba aajem mʉg di aig phidag wau nʉm aig, maigmua ich diu mʉrʉg deewai siejim mʉrʉg wajapha thʉapim khĩir. ⁹ Ni ãbam khʉʉnja mʉ khãyãu mʉg di aig pomaam khabam. Ich diu mʉrʉg neminaam igkhaba sim pʉrʉgan igkhabama sim, khãnjãgwia agá pʉ i ʉʉi aawai. ¿ magan khanjãgwia mua Ẽwandam dauna neminaam khaiba wawaag agá maigmua Ẽwandam dakhĩir pod pekau waubam? ¹⁰ Edeempierr chi ʉʉirau Joseeg iekhaajeejim anʉm Joseeu khõchkhaba aajeejim chi ʉʉi dʉi khãyãag magba mʉm ãba naag ithee. ¹¹ Khãai ãb José ich di aar phidag wawaam majim. Ni ãbam khʉʉn emkhooin ag degam khʉʉn di aig khaba naajim. ¹² Chi ʉʉirau José khãjũa gaai pʉrauwia maigmua magjim:" khãitarrau mʉ dʉi ajim. Ich pʉrathaawai Josseu ich khãjũa jũasierr chi ʉʉi jua ee ẽreupʉajim, maigmua dawag khapid petajim. ¹³ Mag dichwia chi ʉʉirau oowai Joseeu ich khãjũa i jua ee aupʉawia maigmua dawag khapidjim, ¹⁴ Ich diu ag degnaarr khʉʉn õor thʉ̃rkha aujim maigmua magjim:" ooba Potipharrau hebreopierr aubeetarr maar khĩir lokag pheegta aubeejim. Ich mʉ dʉi khãyãanta beejim maigmua mua ääajim . ¹⁵ Magwia mʉ äa atarr ũr ataawai, ich put mʉ aig aupʉajim, maigmua dawag khapid petajim. ¹⁶ Ich diu chi put ich bigaau ausiujim anʉm ich jaai di aig barche nʉm ora. ¹⁷ Magwia ich diu mʉgta jaaujim:" Pʉ chog hebreopierr pua maar aig aubeetarr, mʉ seukhaanta beejim. ¹⁸ Magwia mua äa awia, ich diu ich put aupʉajim mʉ dʉi maigmua dawag petajim. ¹⁹ Magwia Potipharrau ũr athaawai chi ʉʉirau irig jaaubaadejim anʉm:" Pʉ chogau mʉgta mʉ waujim," Potipharr meeukhabaadejim. ²⁰ Chi porou José pʉrauwia õor phãarjem ee dugpʉijim, mamta chi reyiu ich õor phãarkhawia oberpiba aajeejim. Ich õor phãarkha thʉnʉm aig thʉbajim anʉn. ²¹ Mamʉ Ẽwandam José dʉi sierraawai maigmua irig oopijim chadcha i iek ʉkhatarr aawai i dʉi. Chi Ẽwandamau õor phãarjem khʉʉn por khasimʉg jaaujim José dau aukhaupim khĩir. ²² Chi õor phãarkha thʉnʉm khʉ̃ʉn thʉajemua Joseeg juapa deejim õor phãar thʉnʉm khʉʉn thʉapim khĩir. Joseeuta khap aadejim ierr õor phãarkha thʉnʉm khʉʉn neminaam akhãrag waupimaaugau. ²³ Chi õor thʉajerr atarrau ya agʉg ooba aadejim juapa chukhu aadeewai, ma khanjãgwia aji chi Ẽwandam i dʉi sieraawai. Thumwe ich diu neminaam wau sim Ẽwandamau i dʉi siejim wajapha inʉrram khĩir.