¹ Mag ed mʉgta ajim anʉm Judau ich ẽudeem khʉʉn aupʉawia maigmua adulamita naan dʉi thʉba sisijim anʉm, ma Hira thʉ̃r siejim anʉm. ² Maita chi kha khaug aujim anʉm woun ãb kananeam ma Súa thʉ̃r siejim anʉm. Ich warag mag ʉʉi dʉi pajim anʉm maigmua agdʉi khãijim anʉm. ³ Maig ich jõorwia ich chaai thaabʉ aujim. Chi chaai thʉ̃rjim Er. ⁴ Ich chi ʉʉi deeu jõorjim maigmua deeu chaai thaabʉ aujim. Chi ʉʉirau mag chaai thʉ̃rjim Onán. ⁵ Deeu ũmaai chaai oojim ma thʉ̃rjim Sela. Ma Quezibta thaabʉjim. ⁶ Judau Er ithee ʉʉi jʉraujim, warrpem chaai ithee. Chi ʉʉi thʉ̃r siejim Tamar. ⁷ Er, warrpem chaai Juda den ajim. Ẽwandam dauna khaibagta ich siejeejim. Magta Ẽwandamau thõopʉijim. ⁸ Judau Onánag magjim: " Pʉch naam ʉʉi dʉi khãibá. Magta waujim chi wachau ich wach ʉʉi dʉi maigmua chaai bãau athá ajim pʉch naam ithee ⁹ Onáu khaphʉ siejim chi chaai iden khabam. Ich naam ʉʉi dʉi khãaiwai, ich diu ich nem dibeeu gaaita jĩupʉiijeejim, magta ich naam ithee chaai oobajim anʉm. ¹⁰ Ẽwandam dauná irua wautarr akhãragta siejim. Magta Ẽwandamau deeu thõopʉijim. ¹¹ Magbaarwai Judau Tamarag magjim anʉm, pʉ ãig: " khoopaar ʉʉi aawai pʉch aai di aig joobaba ajim Sela, mʉ iewaa bãau nʉm ora." Ich diu khĩirjũgwai: Sela meekhayajú ajim anʉm, mag ich naam meetarrjo awia, Tamar petajim ich aai di aar jooba sisijim, ¹² Mag nʉʉ awia, Súa kha Juda i ʉʉi, meejim. Juda ich gaai machag dichpiwia maigmua majim anʉm i obeja khaar thaarjem khʉʉn aar Timnat, ich awia maigmua i khapeer Hira chi adulamita. ¹³ Tamarag jaaujim: " Ooba, pʉ chaaijooi Timnatag mam pʉ obeja khaar tharaan. " ¹⁴ ich khoopatarr khãjũa jũasierr ẽreu phʉiwia maigmua putiu ich pʉʉrpʉijim. Jubjim Enaim puerti aig, ma Timnat khʉd eeta thʉba sim. Maig irua oowai Sela dʉʉcha aadejim anʉm mamʉ ich agdʉi pabajim anʉm. ¹⁵ Judau maawai oojim, ich diu khĩirjũg wai ich mor peerjem ʉʉi piisiejim khanjagwia aji ich khĩir putiu borrwai nʉrrar aawai. ¹⁶ Ich chi ʉʉi aar majim khʉd ee maigmua magjim: " Mau pidú, mʉ idʉraa pʉch dʉi khãaipibá"mamʉ ich diu khauba siejim ich ãig, maigmua ich diu magjim: "¿ Khanta pua mʉrʉg deeg agá mʉ dʉi khãai nʉm jũrr ? " ¹⁷ Ich diu magjim: " Mua pʉrʉg chibdam deepʉijú mʉch den eem. " ʉʉirau magjim: " ¿ Mʉrʉg deeba pʉch diu jũa nʉrrʉm mʉrʉg deepʉi nʉm ora?" ¹⁸ Ich diu magjim: ¿ Khanta mua jũajem pʉrʉg deegauma ?" Ich diu mʉgjim:" Pʉ phĩr, maigmua pʉ jʉ̃gad wajapham maigmua chi papormie pʉ jua ee wai sim." Ich diu chi ʉʉirag deewia maigmua agdʉi khãiwia chi ʉʉi Juda den jõor sisijim anʉm. ¹⁹ Chi ʉʉi phiidʉwia maigmua patajim. Put por gaai wai sierr ẽreupʉiwia maigmua ich khoopatarr khãjũa jũapʉijim. ²⁰ Judau ich khapeer dʉi chib dam khapan thʉnʉm eem deepʉijim chi Adulamita chi ʉʉi jua eem neminaam wai sim awaag, mamʉ ich diu oobajim anʉm. ²¹ Magbaarwai chi adulamitau jeeujim wounaan aig narr khʉʉnag:"¿ Jampaitasi chi ʉʉi ich mor peerjem Enaim khʉd ee barthurtarr ?" Amach diu magjim: " Mʉichan mag ʉʉi marau oobam ajim anʉm. " ²² Magbaarwai ich majim anʉm Juda sim aar maigmua magjim anʉm: Mua oobam ajim. Maigmua, õor aignarr khʉʉnau magjim: Mʉichan mag ʉʉi beeba sim ajim anʉm." ²³ Judau jaaujim: " Idiu ich di aar thʉbapiba ajim, khĩirnaau mapha nʉm khai. Chadcha, mua mʉg chib dam ẽwaa khʉtʉm deepʉijim, mamʉ pua i oobajim." ²⁴ Ed thãrjũp nʉm ee Judag jawaan beejieram anʉm: " Tamar pʉ ãig ich mor perbaadem ajim anʉm, mag sim gaai mua jõorbaadem ajim anʉm." Judau magjim: " Mʉig aupidut magnaa phaabapʉit. " ²⁵ Mamʉ dawag jẽu aunʉm aig, ich diu ich chaijoorag iek deepʉijim: " Mag wounau mʉ wautarr aig mua chadcha mʉ jõor ʉm. " Chi ʉʉirau magjim: chadcha jaaubá ajim mʉ khʉʉn khaiden agá: phatkhon dau, jʉ̃gad wajapham maigmua chi papormie. " ²⁶ Judau khug athaawai magjim:" Ich mʉ khãyãu wajapha sim, chadcha mua mʉ iewaa Sela dʉi papibajim." Ich tag agdʉi khãiba sisijim anʉm. ²⁷ Mʉgta ajim anʉn chaai thaabʉ awaag paawai, oobat i bich ee chaain numita naajim anʉm, ²⁸ Mʉgta ajim chaai aunʉm aig juadam ãb nacha oberchejim, maigmua chi partera ʉʉirau ilodam auwia i juadam gaai jʉ̃kherjim maigmua magjim: " Mʉgdamta nacha oberjim." ²⁹ Mamʉ ich diu ich jua eudʉ athajim maigmua, oobat, chi ẽudeemta nacha oberjim. Chi partera ʉʉirau jaaujim:" ¡ Magan pua khʉdau weeutarr aawai ! " Magta chi chaai thʉ̃rjim Fares. ³⁰ Magnʉʉ awia chi naam thaabʉjim, magdamta chi ilou jua gaai jʉ̃khitarr ajim, maigmua ma thʉ̃rjierram Zara.