Salmo 103

1 Miña alma, bendice, a Iahveh,

e bendiga todo o meu ser o seu santo nome.

2 Miña alma, bendice, a Iahveh,

e non esquezas ningún dos seus beneficios

3 El é quen perdoa todas as túas iniquidades,

el é o que cura todas as túas doenzas;

4 el é o que rescata a túa vida do foso,

el é o que te coroa de benignidade e de misericordia,

5 el é o que farta o teu anhelo de bens,

para que a túa xuventude se renove como a da águia.

6 Iahveh é o que fai xustiza,

e xuízo a todos os oprimidos.

7 El deu a coñecer os seus camiños a Moisés,

e os seus feitos, aos fillos de Israel.

8 Misericordioso e clemente é Iahveh,

lento para a ira e grande en misericordia.

9 Non reprenderá para sempre,

nen para sempre estará anoxado.

10 Non fixo con nós, conforme aos nosos pecados,

nen nos retribuíu conforme ás nosas iniquidades.

11 Porque como a altura dos ceos sobre a terra,

así é de grande a súa misericordia cos que o temen.

12 Como de lonxe está o oriente do occidente,

así fixo alonxar de nós as nosas transgresións.

13 Como un pai, que ten compaixón polos seus fillos,

así ten compaixón Iahveh dos que o temen.

14 Porque El coñece a nosa condición,

lémbrase de que somos pó.

15 Os días do home son como a herba,

florece como a flor do campo;

16 que o vento pasa por ela, e xa non é,

e o seu lugar non a coñecerá nunca máis.

17 Pero a misericordia de Iahveh

é desde a eternidade até a eternidade

sobre os que o temen,

e a súa xustiza sobre os fillos dos fillos.

18 Sobre os que gardan o seu pacto

e se lembran dos seus mandamentos para obedecelos.

19 Iahveh afirmou o seu trono sobre os ceos,

e o seu reino domina sobre todo.

20 Bendicide a Iahveh, vós os seus anxos,

poderosos en afouteza que obedecedes a súa palabra,

obedecendo a voz dos seus comandos.

21 Bendicide a Iahveh, vós todos os seus exércitos,

vós, ministros seus que executades a súa vontade.

22 Bendicide a Iahveh, todas as súas obras,

en todos os lugares onde reina,

Bendice, ó miña alma a Iahveh!