¹ Nakayalula bulembe bwa chiloba, kwakaba kuliinza kwizeulu kumana kwa chisela che woola lyomwi. ² Ngoona ndakabona bangelo bali chiloba bazhima kumbele lya Leza alimwi bakapewa impeta boonse. ³ Kwakeza mungelo umwi wakukwete mutiba wakukwete tununkilizho, kazhimine ku chipaililo cha tununkilizho. Wakapewa tununkilizho tunji kwaamba akonzhe kukombela antoomwi mipailo ya bantu ba Leza boonse a chipaililo cha tununkilizho cha golide.kumbela lya chuuna cha bwami. ⁴ Bushi bwa tununkilizho-antoomwi u mipailo ya bantu ba Leza basalala - shakaya kubushu bwa Leza kuvwa ku matashi a mungelo. ⁵ Mungelo wakabweza mutiba wa Tununkilizho wozuzha mulilo kuvwa ku chipaililo. Ngoona wakasowela anshi ano, ngoona kwakaba mizuzumo indabo shinji alimwi ukuzhangama kwanshi. ⁶ Bangelo boonse bakukwete impeta shili chiloba bakalibambila kwamba bashilizhe impeta. ⁷ Mungelo mutaanzhi wakalizha impeta yakwe, kwakawa chivula mabwe u mulilo usangene u bulowa. Shakasowelwa anshi chakuti mweelwe wa shintu shili mo shakapiya, mweelwe mukando wa masamu akapiya abo bwizu buteke bwakapiya, ⁸ Mungelo wabili wakalizha impeta yakwe, inzho chimwi chili ukoya lupili lukando luzaka mulilo chakasowelwa mu Lwatele. Chipanzha chimwi cha Lwatele bwakaba bulowa, ⁹ mweelwe umwi wa shintu shipona mu lwatele shakafwa, alimwi u mweelwe wa mato amwi akazonauka. ¹⁰ Mungelo wa tatu wakalizha impeta yakwe, kumane intongwezhi inkando yakawa kuvwa kwizeulu ilamweka ukoya muzenge mu shipanzha shimwi sha milonga u tuzhiba twa meenzhi. ¹¹ Intongwezhi ilatewa ati Kulula. Meenzhi amwi akalula, alimwi u bantu banji bakafwa nkaambo ka meenzhi akalula. ¹² Mungelo wane wakalizha impeta yakwe, chipanzha chimwi che zuba chakazhima, kubikilizha u cha mwezhi iintongwe. Shipanzha sheshi shaka shiya; chiindi chimwi muunza ucha mashiku chakabula mumuni. ¹³ Ndakalanga, ndakatelela shikwaze wakuulukila mwizeulu uloompolola iizwi ikando ati, "Mawe, mawe, mawe, ukuli babo bakala ano anshi, nkaambo ka mpeta shichisheele kulizhiwa u bangelo botatwe."