¹ Kuvwa awo ndakabona bangelo bone balizhimine mu nja shone shachishi, balikwatilile chinichini myoza yone kwaamba kutabi nikuunga muuwo anshi, a lwatele nikuba ku masamu. ² Ndakabona mungelo umwi ulavwila kwiwe, wakukwete chikanto cha Leza Upona. Wakapozomoka izwi ikando ku bangelo bone bakupelwe insana shakupenzha luundu u lwatele: ³ "Mutalupenzha Luundu, u Lwatele, naaba masamu kushikila tubike chikanto ankumu shabo ba sebezhi ba Leza wesu.'' ⁴ Ndakatelela mweelwe wa bantu babo bakabikwa shikanto: Shuulu shili mwaanda u makumi one ushitwesha shone, balo bakabikwa shikanto kuvwa ku mishobo yoonse ya bana Izilayeli: ⁵ Shuulu ikumi u shuulu shobile kuvwa ku mushobo wa Juda bakabikwa shikanto, shuulu ikumi u shuulu shobile ku mushobo wa Lubeni, shuulu ikumi u shuulu shobile ku mushobo wa Gadi, ⁶ shuulu ikumi u shuulu shobile ku mushobo wa Asha, shuulu ikumi u shuulu shobile ku mushobo wa Nafutali, shuulu ikumi u shuulu shobile ku mushobo wa Manase, ⁷ shuulu ikumi u shuulu shobile kuvwa ku mushobo wa Simiyoni, shuuulu ikmi u shuulu shobile ku mushobo wa Levi, shuulu ikumi u shuulu shobile ku mushobo wa Isaka, ⁸ shuulu ikumi u shuulu shobile kuvwa ku mushobo wa Zebuluni, shuulu ikumi u shuulu shobile ku mushobo wa Josefa, alimwi u shuulu ikumi u shuulu shobile kuvwa ku mushobo wa Benjamini bakabikwa shikanto. ⁹ Nishakamna shintu sheshi ndakalanga, kakuli makamu makamu a bantu alo aina muntu ukonzha kubala - kuvwa ku shishi shoonse, mishobo, bantu, alimwi u milaka balizhimine kumbele ya chuuna cha bwami alimwi kumbele lya Mwana mbelele. Kabasamine shikobelo shituba alimwi kabakwete malala mu matashi abo, ¹⁰ alimwi kabalila chakupozomoka ati: "Lufutuko lulavwila kwa Leza wesu, walo u shite a chuuna cha bwami, alimwi uku Mwana mbelele!'' ¹¹ Boonse bangelo kabazhimine balizhingulukile ku chuuna cha bwami u bakando bakando u shintu shipona shone, bakafukamakumbelelya chuuna cha bwami. Bakamukomba Leza, ¹² balaamba ati, "Ameni! Kutembaulwa, bulemu, busongo kulumbwa kulemekwa insana shibe kwa Leza wesu shikwense u shikwense! Ameni!'' ¹³ Ngoona umwi wa bakando wakambuzha ati, "Mbubani baba, basamine shikobelo shituba, alimwi bavwila kwi?" ¹⁴ Ndakamwambilla ati, "Uwe, ulizhi,'' ngoona wakanshimwina ati, "Baba imbabo bakazunda mapenzhi. Bakasanzha shikobelo shabo shatuba bu mu bulowa bwa Mwana mbelele. ¹⁵ Nchichecho nchibazhimina kumbele lya chuuna cha bwami cha Leza, alimwi balamukomba muunza u mashiku mu chikombelo chakwe. Wezo ushite a chuuna cha bwami ulakavungulula itente lyakwe ali mbabo. ¹⁶ Kwiina nibaya kufwa linji inzala, naba kufwa inyotwa alimwi. Izuba liina niliya kubatenta niliba ibanga banga. ¹⁷ Ukuti Mwana mbelele akati ka chuuna cha bwami ulabakwabilila alimwi ulabasololela ku tulonga twa meenzhi a bumi, alimwi Leza ulakakashuula misozhi ku menso abo."