¹ Ndakalanga chiindi mwana mbelele nakayalula kanamatizho kamwi, alimwi ndakatelela womwi akati ka shintu shipona chilaamba mwizwi likozhanya u muzuzumo wa mvula ati, "Kweza!" ² Ndakalanga kakuli i ibbiza lituba. Wakulyeenzha kakwete mutiba, amane wakapewa u mushini. Wakaba shikuzunda kwaamba azunde. ³ Mwanambelele nakayalula kanamatizho kabili, ndakatelela chntu chipona chabili chilaamba, "Kweza!" ⁴ Kumane kwakeza ibbiza limwi lisubila. Kuli wezo wakulyeenzha wakapewa insana shakukwisha luumuno ano anshi, kwaamba bantu bali ano anshi bayaane Wezu wakweenzha kapelwe icheba ikando. ⁵ Chiindi mwanambelele nakayalula kanamatizho ka tatu, ndakatelella chintu chipona cha tatu chilaamba, "Kweza!" ndakabona ibbiza lishiya amane wakulyeenzha kakwete shipimyo mwi tash lyakwe. ⁶ Ndakatelela lili ukoya izwi a shintu shipona shone lyaamba ati, "Kalwi ka maila kalasambalwa ipeni lyomwi, pele mutakwati ku mungwimba uku waini." ⁷ Chiindi mungelo nakayalula kanamatizho kane, ndakatelela izwi lya chintu chipona chane lilaamba ati, "Kweza!" ⁸ Ndakabona i bbiza ivumba. Wakulyeenzha katewa ati Lufwu, alimwi u busena bwa bafwu kabumuchilile. Bakapewa mweelwe umwi wabantu ba mu luundu kwaamba bayayiwe kusebezha icheba, inzala alimwi u bulwazhi, u banyama bamusokwe. ⁹ Chiindi mwanambelele nakayalula kanamatizho ka sanu, kunshi ku chipaililo ndakabona myoza yababo bakayayiwa nkaambo ka izwi lya Leza u bumboni mbubakukwete. ¹⁰ Bakalila iizwi ikando ati, "Nkulaale buti, Mwendelezhi wa shintu shoonse, usalala alimwi u luleme kushikila lili nukabeteka babo bapona mu luundu alimwi nkushikila lili nukaapa chisubulo babo bakatuyaya?" ¹¹ Kumane uumwi uumwi wabo wakapewa mulembo utuba, ngoona bakashimwinwa ati, balindile kushikila mweelwe wa benzhinokwabo balangilwa kuyayiwa ukoya mbubakayayiwa ukwane. ¹² Nakayalula bulembe bwa chiloba, ndakebela kwakaba kuzungana kwa nshi. Izuba lyakashiya mbi awo mwezhi wakasubila ukoya bulowa. ¹³ Asho intongwezhi sha mwizeulu shakawila ano anshi, ukoya ikuzu mbuliwisha inkuzu shitana kubizwa kwakuli iwuwo ikando. ¹⁴ Izeulu lyakamwaika ukoya ipepa lyavungwa. Mapili oonse u shilwa shakushiwa ngushakubele. ¹⁵ Kumane bami ba ano anshi ubamwi bantu balemekwa, uba shikalumba bakando, bavubi, bashinsana, u boonse bantu, bazhike ubabo batali bazhike, bakazuba mushilindi u mumpili. ¹⁶ Bakambila mapili u mabwe ati, "Amutulimbe! mutuseseke kuvwa kubushu bwa wezo ushite a chuuna cha bwami alimwi uku bukali bwa mwaambelele. ¹⁷ Ukuti buzuba bukando bwa bukali bwabo bwashika. Nguni ukonzha kuzhima?''