¹ Ngoona ndakabona mwitashi lya chilyo lya wezo wakushite a chuuna cha bwami ipepa ikando lilembelwe ezeulu anshi, lilamatikilwe u shilamatizho shili chiloba. ² Ndakabona mungelo ulakambauka izwi ikando ulaamba, "Nguni welele kuyalula uku kusha shilamatizho shepepa?" ³ Kwiina kwizeulu naba ano anshi nikuba kunshi ukonzha kuyalula naba kubala ipepa. ⁴ Ndakalila chinichini nkaambo kwakabula wakulozha kuyalula naba kulibala. ⁵ Pele umwi wabasololi wakenta ati, "Utalila. Langa! Shuumbwa wa mushobo wa ba Juda, muzanda wa Davida, wazunda. Walo ulakonzha kuliyalula ipepa utulamatizho twalyo." ⁶ Ndakabona mwana mbelele ulizhimine akati kati lya chuuna cha bwami alimwi awo ashintu shone shipona aakati lya basololi. Wakalibonya ukoya muyaye. Kakwete meya u meno ali chiloba alo azo nji Myoza ya Leza ituminwe mu luundu loonse. ⁷ Wakaya walibweza ipepa kuvwa mwitashi lya chilyo lya wezo wakushite a chuuna cha bwami. ⁸ Nakalibweza ipepa, shintu shone shipona u basololi bali makumi obile intwesho shone bakawila kumbele lya mwana mbelele. Umwi uumwi kakwete kalumbu u mutiba uzwile tununkilizho, yalo yezho njimipailo ya bantu basalala ba Leza. ⁹ Bakaimba lwiimbo lupiya: "Uwe ulyelele kulibweza ipepa alimwi ukutukusha tulamatizho. Ukuti wakayayiwa, alimwi ku bulowa bwako wakamulila Leza bantu kuvwa ku mishobo, milaka, bantu, alimwi u muchishi. ¹⁰ Wakapa bapaizhi u bantu basebezela Leza, alimwi balakaba bendelezhi ba chishi choonse." ¹¹ Ngoona ndakatelela mazwi a bangelo bakuzhingulukile chuuna cha bwami u basololi u shintu shipona. Mweelwe wabo koshika ku shuulu shuulu shili ikumi u shuulu shuulu. ¹² Bakamba mwizwi ikando ati, "Uwelele mwana mbelele, wezo wayayiwa, kwaamba atambule insana, lubono,busongo, bulemu, alimwi, ukutembaulwa." ¹³ Ndakatelela choonse chilenge chakuli kwizeulu aanshi alimwi u kunshi u mu lwatele-shoonse shili mo-shilaamba, "U kuli wezo ukala achuuna cha bwami alimwi uku mwanaa mbelele kube kutembaulwa, bulemu, insana, u bwendelezhi lyoonse u lyoonse." ¹⁴ Shintu shone shipona shakaamba, Ameni!" u basololi bakawa anshi ukukomba.