¹ Umwi wa bangelo bakukwatilile mitiba ili chiloba wakeza kwaamba kwangu ati, Kweza, ndakutondezha mbwakasubulwa mweleenze ushite mu meenzhi manji manji, ² walo wezo bami ba mu luundu ngukachita aze mamambe, alimwi kuvwa ku waini wa mamambe akwe boonse bana luundu bakakolwa." ³ Ngoona mungelo wakambweza ku moza wantola ku lukula, mane ndakabona mukaintu ulishite a munyama u subila uzwile mazhina a matushi. Munyama kakwete mitwi ili chiloba u meeya ali ikumi. ⁴ Mukaintu kasamine shisani shisubila pyu alimwi kasamine twebeshi twa golide, mabwe mebeshi abeka beka. Mwitashi lyakwe kakwete inkapu ya golide izwile shintu shitazandika alimwi u busofwazhi bwa mamambe akwe. ⁵ Ankumu yakwe kakulembelwe izhina, lyakusesekelwe: "Babiloni mukando, muzhali wa beleenze alimwi u wa shintu shoonse shitazandika ano anshi." ⁶ Ndakabona ati mukaintu wakakolwa u bulowa bwa bantu ba Leza alimwi u bulowa bwa bantu bakayaiwa nkaambo kakukanana makani a Jeso. Nindakamubona ndakazhingwa chinichini. ⁷ Pele mungelo wakanshimwina ati, "Nkaambo nzhi wazhingwa? Ndakupandulwila maseseke a mukaintu u munyama u muzemwine mukaintu, Wezu munyama ukwete mitwi ili chiloba u meeya ali ikumi. ⁸ Munyama nguwakabona kaliko, kuchiindi cheno teko inzho ulalangilwa kuvwa mwilambwe liteeli. Amanizha ulaya kuya buzonauna. Babo bapona mu luundu mono, babo bakwete mazhina atalembelwe mwi Buka lya Bumi kuvwa luundu nilwakaanzwa -balakazoowa bakamubona munyama, nkaambo kaliko, inzho teko, pele amana ati ulakeza. ⁹ Chechi chilazanda babo bakwete busongo. Mitwi ili ikumi milundu awo mukaintu ngashite. ¹⁰ Alimwi mbami bali chiloba. Bami bali bosanwe bakawa, womwi ulaboneka amana umwi tana kuboneka, alimwi akashika, ulakashaala kwa kaindi kashoonto. ¹¹ Wezo munyama wakuliko, pele inzho teko, pele inguwe mwami wa lusele. Wezu ulahulilwa kuli wa chiloba alimwi ulaya ku luzonauko. ¹² Meya azo nguwakabona mbami bali ikumi balo batana kutambula bwami, pele balakatambula insana sha bwami kwe woola lyomwi antoomwi u munyama. ¹³ Baba balendelana, alimwi balapa insana shabo ubwendelezhi ku munyama. ¹⁴ Balakazanda kulwisha mwana mbelele. Pele mwana mbelele ulakabazunda nkaambo walo inguwe Mwami wa bami-alimwi babo bali aze baletiwa, basale, alimwi bashomeka." ¹⁵ Mungelo wakaamba kwangu ati, "Meenzhi manji manji nguwakabona, awo mweleenze ngakakushite, mbantu, makamu makamu, mashi, alimwi mishobo. ¹⁶ Meya ali ikumi nguwakabona - balo u munyama balakamusula mweleenze. Balakamumwaala ukumusamununa, balakalya buzani bwakwe, aliwmi balakamutenta kumaninina u mulilo. ¹⁷ Ukuti Leza wakachibika mu myozo yabo kwaamba bobweze muzeezo wakwe kwiita mukuhumina kupa insana shabo sha bwendelezhi ku munyama kushikila mazwi a Leza akazuzukizhiwe. ¹⁸ Mukaintu nguwakabona munzhi mukando walo ukwete insana shakwendelezha bami bali ano anshi."