¹ Ngoona ndakabona chitondezho chimwi mwizeulu, chikando ulimwi chebeshi: Kakuli bangelo bali chiloba bakukwete miika ili chiloba yalo injiyo miika yamamanino, ukutimulinjiyo bukali bwa Leza bulamaninina ² Ndakabona chili ukoya lwatele lubekabeka lusangene u bulowa. Bazhimine kumbali ku lwatele mbubabo bakazunda munyama u chibumbwa chakwe alimwi u mweelwe u zhiminina mazhina akwe. Kabakwete tulumbu ntubakapewa kwa Leza. ³ Kabaimba lwiimbo lwa Mozesi, musebezhi wa Leza, alimwi u lwiimbo lwa mwanaambelele: Shilazoosha alimwi nshibotu nshuuchita, u Mwami Leza Shinsana shoonse. Bululami alimwi u bwini ni nzhila shako, Mwami wa mashi. ⁴ Nguni wezo utakonzha kukutiya, Mwami, alimwi ukupa bulemu izhina lyako? Ukuti ndiwe ichenana nusalala. Mashi oonse alakashika kumbele kwako kukomba nkaambo bululami bwako bwazubululwa." ⁵ Nishakaita sheshi shintu, ndakalanga, alimwi chikombelo chisalala cha bumboni chakayalulwa kwizeulu. ⁶ Mu chikombelo mwakavwa bangelo bali chiloba bakukwete miika ili chiloba. Kabasamine shikobelo shebeshi shibekabeka alimwi kabalyangile a shamba shabo masani a golide. ⁷ Uumwi wa shintu shone shipona wakatambika mutiba ku bangelo uzwile bukali bwa Leza, walo upona lyoonse u lyoonse. ⁸ Chikombelo chakazula bushi buvwa ku bulemu bwa Leza alimwi uku nsana shakwe. Kwiina wakukonzha kunjila kushikila miika ya bangelo bali chiloba yamana.